Judith Estrada-Larino

Nanawagan si Marikina City Mayor Marcelino Teodoro ng collaboration sa pagbabakuna sa Local Government Units sa National Capital Region plus para maabot ang herd immunity rito.

Ayon kay Teodoro, hinihintay nila ang polisiya sa national vaccine operations center para makatulong ang lahat at maabot ang herd immunity hindi lamang sa NCR kundi sa mga kalapit na lugar.

Sinabi ni Teodoro na nag commit ang city government sa operations center na tutulong sila sa pagbabakuna sa mga kalapit na bayan at lungsod.

Binigyang diin ni Teodoro na ang daylight population o mga taong regular na nagtutungo sa Metro Manila para sa trabaho, school o negosyo ay dapat masakop ng vaccination efforts ng NCR LGU’s.

Tiwala ang dalawang miyembro ng OCTA Research Group na magandang pasko ang naghihintay sa mga Pilipino sa gitna nang patuloy na paglaban sa COVID-19.

Ito ayon kay Professor Ranjit Rye ay kapag naabot na ang vaccine goals o population protection kahit sa NCR muna sa buwan ng Oktubre.

Naniniwala si Rye na magtatagumpay ang gobyerno laban sa Delta variant dahil sa pinabilis na pagbabakuna partikular sa NCR.

Subalit maaaring dalawa hanggang tatlong taon pa bago makabangon ang bansa sa mga epekto ng pandemya.

Nakikita rin ni Professor Guido David ang masayang pagtatapos ng 2021 dahil maaaring mangyari sa bansa ang tagumpay ng India na nakabangon sa matinding hagupit ng COVID-19 cases partikular ng Delta variant.

Ipinabatid ni David na posibleng tumaas pa ang kaso ng COVID-19 sa mga unang linggo ng Setyembre subalit ma e-enjoy ng mga Pilipino ang huling quarter ng taong ito.

Kinuwestyon ng COA ang halos P190 milyon na ipinasuweldo ng People’s Television (PTV) network incorporated sa mga regular employee nito kasama ang contractual at contract of service.

Sa report ng 2020 audit report ng COA, bigo ang PTV management na isumite ang mga daily time records ng mga nasabing empleyado taliwas sa nakasaad sa Government Auditing Code of the Philippines at COA Circular.

Ayon sa audit team ng COA, ilang taon na ring hindi nasusunod ang dapat sa pagsusumite ng mga kumpletong supporting documents partikular ng DTR’s para sa bayad ng suweldo ng mga empleyado ng gobyerno, anuman pang estado ng mga ito.

Ipinabatid ng state auditors na ang DTR’s ng contract of service personnel mula January hanggang June 2020 ay isinumite nuong Disyembre subalit ibinalik dahil kulang ang lagda ng mga kinauukulang empleyado at kawalan ng approval ng kani kanilang supervisors.

Nangako naman anito ang PTV management na isusumite ang lahat ng mga kinakailangang dokumento.

Magdo-donate pa sa Pilipinas ng 1 milyong doses ng COVID-19 vaccine ang Sinopharm.

Sa isang Facebook post, ipinabatid ni Chinese Ambassador to the Philippine Huang Xilian na ang mga nasabing supply ng bakuna ay inaasahang darating bukas at sa Sabado.

Sinabi ni Huang na kailangang bilisan ang pagbabakuna dahil sa pagsirit ng kaso ng COVID-19.

Agosto 11 nang unang mapasakamay ng Pilipinas ang kauna unahang shipment ng Sinopharm vaccine mula sa United Arab Emirates.

Itinigil pansamantala ang bakunahan sa dalawang sites sa Navotas matapos mangailangan ng dagdag personnel sa isang isolation facility.

Ayon sa Navotas City Government, halos 1,000 doses ang ibinaba sa arawang target ng lungsod ngayong linggo dahil na rin sa pangangailangan ng frontliners na maserbisyuhan ang mga nasa quarantine facilities.

Bukod dito, nangangailangan ng health workers para i-monitor ang mga naka home quarantine kaya’t natigil rin pansamantala ang house to house vaccination para sa mga bedridden patients.

Sinabi ni Navotas City Mayor Toby Tiangco na nananatiling trend ang household transmission kaya’t nakakasa ang ilang residential lockdown.

Kasabay nito, tiniyak ni Tiangco ang patuloy na pagbibigay ng ayuda sa kanilang constituents kung saan mahigit P95 milyon mula sa halos P200 milyon na pondo ang naibigay sa beneficiaries.

Naghahanda na ang gobyerno para sa panibagong repatriation o pagbabalik sa bansa ng 100 pang Pinoy mula sa Afghanistan na una nang nakontrol ng Taliban fighters.

Ayon ito kay OWWA Chief Hans Leo Cacdac matapos dumating sa bansa nuong Martes ang 35 Pinoy na una nang ini-evacuate ng kani kanilang mga kumpanya mula sa Afghanistan.

Tinatrabaho na aniya ng DFA ang ikalawang repatriation flight para sa mga Pilipinong gusto nang umalis sa Afghanistan.

Kasabay nito, inihayag ni Cacdac na hindi lahat ng mga Pilipino sa Afghanistan ay nais umuwi ng Pilipinas na mas ligtas gawin sa ngayon.

Handa aniya silang tulungan ang mga umuuwing Pinoy, documented man o hindi.

Target ng DICT na makapag isyu ng COVID-19 vaccination certificate sa unang bahagi ng Setyembre.

Ang nasabing certificate ayon kay DICT Undersecretary Emmanuel Caintic ay nakabatay sa mga panuntunan ng World Health Organization (WHO) at kikilalanin sa ibang bansa.

Sinabi ni Caintic na magbubukas ng online portal ang DICT para makita ng publiko ang vaccination details na kung tutugma sa mga impormasyon sa database ng gobyerno, kaagad maipapalabas ang inoculation certificate.

Nasa ikatlong linggo na aniya ang local government sa pagsasanay para matulungan ang kanilang constituents na mayruong mga concern o problema hinggil sa vaccination certificate.

Tiniyak ni Caintic na ang data para sa certificates ay protektado ng private ecryption at pangangasiwaan ng DICT at DOH.

Plano ng Duterte administration na bumili ng COVID-19 booster shots sa 2022 sa halagang P45 bilyon.

Ipinabatid ito ni Presidential Spokesman Harry Roque kung saan ang pondo ay nasa ilalim ng unprogrammed appropriations o nangangahulugan na popondohan lamang ito ng gobyerno kung mayruong mapagkukunan ng pondo para rito.

Una nang inihayag ni Roque na may garantya naman sa ilali ng 2022 budget ang pondo para sa pagbili ng COVID-19 vaccine booster shots.

Tumanggi ang Miss Universe Malaysia na makiisa sa 70th Miss Universe pageant na idaraoas sa Eilat, Israel sa Disyembre.

Ipinabatid ng Miss Universe Organization na hindi nakapagsagawa ng sariling Miss Universe Malaysia ang bansa dahil sa tumitinding problema sa COVID-19 dahilan kayat limitado ang international at domestic travel.

Ipinaabot naman ng organizer ng local Miss Universe Malaysia ang pagbati sa mga delegado at tiwalang makikiisa sa nasabing kumpetisyon sa mga susunod na pagkakataon.

Ang Malaysia ay kinatawan ni Francisca Luhong James sa Miss Universe 2020 competition nitong nakalipas na buwan ng Mayo.