Judith Estrada-Larino

Hindi na kakailanganin ang quarantine pass simula bukas, Agosto 21 kung kailan ipatutupad na sa Metro Manila ang MECQ.

Ayon ito kay Paranaque City Mayor Edwin Olivarez, Chairman ng Metro Manila Council (MMC).

Sinabi ni Olivarez na isa ang paggamit ng quarantine pass na pagkakaiba ng ECQ at MECQ, gayundin ang pagpayag na sa indoor at al fresco dine in services at personal care services.

Mananatili naman aniya sa 8pm-4am ang curfew para na rin malimitahan ang pagkilos at paglalabas labas lalo na ng mga hindi otorisadong lumabas.

Hindi dapat masamain ng mga ahensya ng gobyerno ang report na ipinalalabas ng commission on audit hinggil sa paggastos nila sa kanilang budget.

Ayon ito kay Vice President Leni Robredo matapos sunud sunod na ilabas ng COA ang annual report nito sa mga ginastos na pondo ng mga ahensya ng gobyerno.

Binigyang diin ni Robredo na dapat malinaw sa government agencies na kailangan ang mga ganitong proseso at regulasyon para matiyak na walang korupsyon o hindi makatuwirang paggastos sa gobyerno.

Uubra naman aniyang tumugon at magpaliwanag ang mga nasabing ahensya ng gobyerno sa paganahin ang transparency sa kani kanilang sistema at proseso.

Kasabay nitoM hinimok ni Robredo ang state auditors na ipagpatuloy lamang ang kanilang trabaho para matiyak ang good governance.

Dalawang lugar pa sa Muntinlupa ang isinailalim sa dalawang linggong total lockdown.

Huwebes ng tanghali nang ianunsyo ang Extreme Localized Community Quarantine sa limang kalye sa Katarungan Village na isang private subdivision sa Barangay Poblacion matapos makapagtala ng 17 aktibong kaso.

Sa mga nasabing kalye rin nakatira pa ang maraming high risk group tulad ng senior citizens, kabataan at buntis.

Hinarangan na ang mga nasabing kalye at pinagbawalan nang lumabas ang mga residente maliban na lamang kung mayruong emergency.

Inaasahan ang deklarasyon ng state of calamity sa bayan ng Guagua sa Pampanga dahil sa pagsirit ng kaso ng COVID-19.

Ayon kay Guagua Mayor Dante Torres, nasa 437 na ang active cases ng COVID-19 sa kanilang bayan at 109 na ang nasawi.

Sinabi ni Torres na dalawang barangay din ang naka lockdown at halos punuan na ang mga ospital at quarantine facilities.

Dahil sa mabilis na hawahan ng COVID-19, pinasasalang na rin sa testing ng lokal na pamahalaan hindi lamang ang mga direktang nakasalamuha ng mga COVID-19 positive kundi maging ang mga secondary contact.

Bukas ang isang grupo ng social media content creators at influencers sa pag-iisyu ng BIR ng memorandum hinggil sa pagbabayad ng buwis ng mga ito.

Pinapurihan din ng Creator and Influencer Council of the Philippines ang BIR sa paglalabas ng mga panuntunan para malaman nila ang lahat ng dapat nilang bayarang buwis sa gobyerno dahil sa kanilang trabaho.

Sinabi ng CICP na nakasaad naman sa memo ng BIR kung paano magbebenepisyo ang kanilang mga miyembro sa ilang tax treaties sa pagitan ng Pilipinas at partner countries nito para makaiwas na rin sa double taxation.

Naharang ng Philippine Coast Guard ang tangkang pagpuslit ng iligal na droga sa isang isolation hotel sa Bonifacio Global City sa Taguig.

Ayon sa coastguard, napigilan nila sa magkahiwalay na oras ang delivery ng dalawang riders ng shabu sa dalawang returning ofw na nasa isolation sa isang hotel.

Batay sa report ng PCG Task Group Bantay Bayanihan, alas-4 ng hapon ng dumating ang unang rider na may dalang package kung saan sa online declaration ng sender ay may lamang damit at cellphone.

Subalit nang inspeksyunin ng mga tauhan ng PCG at Bureau of Quarantine mayroong nakitang plastik na may lamang hinihinalang shabu sa likod ng cellphone cover kaya’t dinala ang rider at nasabing package sa Taguig police station kung saan napatunayang walang alam ang rider sa laman ng  kinuhang package.

Makalipas ang isat kalahating oras, isa pang rider ang dumating sa isolation hotel at nagpakilalang pinsan ng isa pang ROF na paghahatiran ng damit na laman ng dala niyang package na nang inspeksyunin ay nakita rin sa plastic ang hinihinalang shabu.

Nakatakdang kasuhan ng mga otoridad ang dalawang OFW na naka quarantine at isang delivery rider na pinsan ng isa sa mga ito dahil sa paglabag sa Republic Act 9165 o Comprehensive Dangerous Drugs Act of 2002.

Nagbabala si Presidential Adviser on Entrepreneurship Joey Concepcion hinggil sa matagal na lockdown matapos ang buwan ng Agosto o umabot pa ng hanggang fourth quarter ng taon.

Ito ay bagamat pabor naman si Concepcion na ibaba sa MECQ mula sa ECQ ang quarantine classification ng National Capital Region hanggang Agosto 31.

Sinabi ni Concepcion na hindi naman nakakagulat at tama namang gawin ang paghihigpit sa quarantine lalo nat patuloy ang pagtaas ng kaso ng COVID-19.

Dahil dito, iginiit ni Concepcion ang pagkakaroon ng vaccinated bubble o polisiya na pumapayag na tanging fully vaccinated people lamang ang dapat magkaroon ng access sa pampublikong sasakyan, workplace, malls at dinig establishments simula sa susunod na buwan.

Ito aniya kung kailan inaasahang 50% ng mga residente sa Metro Manila ay fully vaccinated na.

Binigyang diin ni Concepcion na dapat protektahan ang mga unvaccinated at gamitin naman ang mga vaccinated para sa consumer spending at mapagalaw ang ekonomiya.

Dapat nang ipaubaya ng Local Government Units sa National Task Force against COVID-19 ang pagpapasya kaugnay sa pagbili ng mga bakuna.

Sagot ito ni Marinduque Governor Presbitero Velasco, Jr. sa pahayag ni Senador Juan Miguel Zubiri na kailangan pang pirmahan ng National Government, LGU’s at vaccine makers ang lahat ng mga dokumento kaugnay sa kanilang kasunduan dahilan kayat nade delay ang pagbili ng bakuna ng mga lalawigan.

Sinabi ni Velasco na ang problema sa supply ng bakuna ang maaaring nagtulak sa NTF na i-hold muna o huwag munang ituloy ang paglagda sa nasabing tripartite agreements.

Mayruon din naman aniyang pagkakataong hindi pipirmahan ng ntf ang tripartite agreements dahil kailangan naman nitong i prioritize ang supply ng COVID-19 vaccines ng  national government.

Ayon kay Velasco, hindi na rin muna u ubra ang paglagda sa kasunduan sa pagbili ng mga bakuna dahil sa isyu ng kakulangan ng bakuna.

Bahagyang lumakas ang bagyong Isang habang kumikilos pa Kanluran sa ibabaw ng Philippine Sea.

Ayon ito sa PAGASA bagamat wala pang tropical cyclone wind signal.

Sinabi ng PAGASA na hindi rin maaapektuhan ng bagyong isang ang Southwest Monsoon.

Ang sentro ng bagyong isang ay pinakahuling namataan sa layong 975 kilometers Silangan ng dulong Northern Luzon.

Taglay ng bagyong isang ang pinakamalakas na hanging umaabot sa 55 kilometero kada oras malapit sa gitna at may pagbugso ng umaabot sa 70 kilometero kada oras.

Ang bagyong isang ay inaasahang kikilos pa kanluran sa bilis na 20 kilometers kada oras.

Kuwestyonable ang paglilipat ng DOH ng halos P42 bilyon sa DBM Procurement service.

Ayon ito kay House Committee on Public Accounts Chairman Jose Benito Singson, Jr. matapos sumalang sa virtual hearing si Health Secretary Francisco Duque II  kaugnay sa mahigit P67 bilyon na deficiencies ng COVID-19 response fund ng DOH batay sa annual COA report.

Sinabi ni Singson na hindi tama ang ginawa ng DOH dahil mayruon itong sariling budget.

Wala aniyang discretionary powers ang DOH o anumang ahensya ng gobyerno dahil ang budget ng mga ito ay inaaprubahan ng DBM base sa paglalatag ng gastusin ng mismong tanggapan ng pamahalaan.