Nasawi sa kumplikasyon sa COVID-19 ang kapatid ni dating Senador Antonio Trillanes, IV.
Inanunsyo mismo ng dating senador sa kaniyang twitter account ang pagkamatay ng 51 anyos niyang kapatid na si Antonio “Tiny” Trillanes , III.
Ilang linggo na ring nakalipas nang sumakabilang buhay ang ina ng dating senador na si Estelita Fuentes Trillanes, 87 taong gulang dahil sa kumplikasyon naman mula sa Advanced Parkinson’s condition.
Tuloy ang mahigpit na pagpapatupad ng curfew sa Metro Manila kahit pa ibinaba na sa MECQ mula sa ECQ ang quarantine classification nito simula ngayong araw na ito.
Ayon kay MMDA chairman Benhur Abalos, mananatili sa 8pm to 4am ang curfew samantalang pupuwede na ang outdoor exercises mula alas-6 hanggang alas-9 lamang ng umaga.
Una na ring siniguro ng DOTR na walang mababago sa pag-biyahe ng mga pampublikong sasakyan kahit pa MECQ na ang Metro Manila.
Mayroon nang community transmission ng delta variant ng coronavirus sa bansa.
Ito ayon kay Dr. Cynthia Saloma, executive director ng PGC o Philippine Genome Center ay dahil maraming kaso na ng delta variant ang hindi batid kung saan nagmula.
Dahil dito, naniniwala si Saloma na may kinalaman ang delta variant sa pagtaas ng mga bagong kaso ng COVID-19 sa bansa.
Una nang nakapagtala ang bansa kahapon ng all-time-high na 17, 231 na mga bagong kaso ng COVID-19, dahilan para sumirit pa sa 1, 807,800 ang kabuuang kumpirmadong kaso ng virus sa bansa.
Umalma si dating COA commissioner Heidi Mendoza sa batikos ng ilang mambabatas hinggil sa anila’y premature na paglalabas ng COA report hinggil sa pondo ng DOH para sa COVID-19 response.
Binigyang-diin ni Mendoza na mahabang proseso ang pinagdadaanan ng kanilang pagbusisi sa paggastos ng pondo ng isang ahensya bago magpalabas ng final audit findings.
Sa katunayan, ipinabatid ni Mendoza na dumadaan sa hindi bababa sa sampung evaluation ang final report bago ito isapubliko.
Iginiit din ni Mendoza na mahigpit na sumusunod ang mga auditor sa mga regulasyon sa pagsasagawa ng audit lalo pa’t paggastos sa bilyon-bilyong piso ang kanilang ini-evaluate.
Itinaboy ng China ang mga eroplano ng AFP sa West Philippine Sea.
Ibinunyag ni Lt. Col. Bill Pasia ng Western command na limang beses itinaboy ng China ang mga eroplano ng AFP sa kanilang Chinese outpost sa WPS, gamit ang pyrotechnics signals o flare warnings sa mga intelligence, surveillance and reconnaisance team.
Ang mga flare aniya ay galing sa outpost ng Chigua, Calderon, Burgos at Mabini.
Sinabi ni Pasia na nakatanggap din sila ng mahigit 200 radio warnings mula sa China habang nagpapatrolya sila sa WPS.
Inaasahan na ng OCTA research group ang pagpalo sa mahigit 17,000 ng mga bagong kaso ng COVID-19, bagama’t napaaga ito sa unang projection ng grupo.
Ito’y ayon kay professor Guido David, fellow ng OCTA research group ay dahil hindi naman kaagad makikita ang epekto nang pinairal na dalawang linggong ECQ sa Metro Manila.
Kadalasan aniyang lumalabas sa kanilang pag-aaral na inaabot din ng halos tatlo hanggang apat na linggo matapos ang quarantine restrictions bago bumaba ang kaso ng COVID-19.
Sinasabi natin ..it’s going to get worse before it gets better, sa NCR ganu’n ‘yung sitwasyon kasi hindi naman agad-agad ‘pag nag-lockdown tayo agad bababa ‘yung bilang ng kaso, in fact last year mga 28 days bago bumaba ‘yung bilang ng kaso, earlier this year… I double check mga 3 weeks bago nagsimulang bumaba ‘yung mga bilang ng kaso. So it will take some time. Ngayon hindi natin alam kung 3 weeks, 4 weeks, 5 weeks, titingnan pa natin ‘yung sitwasyon sa Metro Manila.
Si professor Guido David, fellow ng OCTA research group sa panayam ng DWIZ.
70% porsyento na ng kabuuang populasyon sa Metro Manila ang naturukan na ng unang dose ng COVID-19 vaccine.
Ipinabatid ito ni Parañaque City mayor Edwin Olivarez, chairman ng MMC o Metro Manila Council sa gitna nang patuloy na pagbabakuna ng local government units sa NCR.
Ayon pa kay Olivarez, nasa mahigit kalahati na rin ng target population sa NCR ang fully vaccinated na.
Sa ngayon aniya ay nasa halos 4M COVID-19 vaccine na ang nagagamit ng LGUs sa NCR.
Halos 40 kama na lamang para sa COVID-19 patients sa COVID-19 field hospital sa Luneta Park ang hindi pa okupado.
Ito’y ayon sa Manila City Government kasunod ng 307 beds na okupado ng COVID 19 patients na mabilis na tumataas dahil sa delta variant ng coronavirus.
Nasa 1, 707 na ang aktibong kaso ng COVID-19 sa lungsod ng Maynila kung saan halos 70,000 ang gumaling at mahigit 1,000 na ang nasawi.
Sisimulan na ng Mandaluyong City ang pagbabakuna kontra COVID-19 sa mga hindi residente ng lungsod.
Ayon sa Mandaluyong City Government, uubrang magpa rehistro muna sa MandaVax (www.mandaluyong.gov.ph/vaccine) ang mga non-residents na nais magpa bakuna at maghintay ng tugon mula sa MandaVax call center hinggil sa kanilang schedule.
Ipinaalala ng city government ang pagdadala ng valid ID at ang pagbabakuna anito ay mahigpit na ipatutupad bu appointment kayat hindi papayagan ang mga walk-in.
Pinababa ng mga tauhan ng i-ACT sa EDSA Monumento bus carousel sa Caloocan City ang ilang pasaherong walang kaukulang dokumento o mga non-apor.
Sa gitna na rin ito nang mahigpit pa ring pagpapatupad ng health and safety protocols sa huling araw na nasa ilalim ng ECQ ang Metro Manila.
Tuluy tuloy ang pagsakay ng mga pasahero sa mga bus subalit 50% capacity o katumbas ng halos 25 hanggang 30 passengers lamang ang puwede sa kada bus.
Umabot naman hanggang Benin Street ang pila o ilang metro ang layo mula sa footbridge papuntang carousel.