Judith Estrada-Larino

Wala na umanong makakapigil pa sa kilos protesta ng health care workers para igiit ang mga benepisyong ipinangako ng gobyerno sa gitna ng COVID-19 pandemic.

Ayon ito kay Jocelyn Andamo, Secretary General ng Filipino Nurses United (FNU).

Ipinabatid ni Andamo na kumukunsulta na sila sa mga abogado para sa posibleng mga kasong isasampa laban sa mga opisyal ng DOH.

Marami aniyang buhay ang nawawala dahil sa kawalan ng resources, pondo at maging accessible na serbisyo na patunay lamang ng criminal neglect.

Binigyang diin ni Andamo na hindi excuse ang pandemya para hindi tuparin ng gobyerno ang obligasyon nto sa kada Pilipino na i-enjoy ang karapatan nito sa kalusugan.

Handa ang Department of Education (DepEd) na magsagawa ng face to face classes kapag pinayagan ito ng Pangulong Rodrigo Duterte.

Ito ayon kay Education Undersecretary Nepomuceno Malaluan ay dahil natapos na nila ang mga panuntunan para sa pilot face to face classes sa 100 eskuwelahan sa mga lugar na mayroong mababang kaso ng COVID-19.

Una nang ipinabatid ng DepEd na mayroong 600 paaralan ang kinukunsider para sa pagbabalik ng face to face classes matapos makapasa sa evaluation hinggil sa kahandaan sa nasabing sistema.

Nadagdagan pa ang mga hayop na kinakapitan ng COVID-19.

Kinumpirma ng Amerika ang kauna unahang kaso sa buong mundo ng COVID- 19 sa mga usa.

Ini report ng US Department of Agriculture ang nakitang SARS COV 2 infection sa white tail deer sa Ohio, kung saan hindi naman ito nakitaan ng mga sintomas.

Ayon kay USDA Spokeswoman Lyndsay Cole, hindi nila alam kung paanong na expose sa nasabing infection ang usa bagamat posibleng nakuha ito sa mga tao, kapaligiran, kapwa usa o iba pang hayop.

Mananatili sa MECQ status ang Metro Manila hanggang Setyembre 7.

Ipinabatid ito ni Presidential Spokesman Harry Roque, batay na rin sa naging pasya ng IATF.

Nasa MECQ rin, ayon kay Roque ang Apayao, Ilocos Norte, Bulacan at Bataan sa Region 3, Cavite, Lucena City, Rizal at Laguna sa Region 4a, Aklan, Iloilo Province at Iloilo City sa Region 6, Lapu-Lapu City, Cebu City at Mandaue City sa Region 7 at Cagayan De Oro City.

Sinabi ni Roque na nagdagdag naman ng restrictions sa dining, personal care services at religious activities ang NCR, Bataan at Laguna.

Samantala, nasa ilalim ng GCQ with heightened restrictions simula Setyembre 1 hanggang 7 ang Ilocos Sur, Cagayan, Quezon, Batangas, Naga City, Bacolod City, Capiz, Cebu Provice, Negros Orienal, Zamboanga Del Sur, Misamis Oriental, Davao City, Davao Del Norte, Davao Occidental, Davao De Oro at Butuan City.

Nasa ilalim din ng GCQ ang Baguio City, Santiago City, Quirino,Isabela, Nueva Vizcaya, Tarlac, Puerto Princesa, Guimaras, Negros Occidental, Zamboanga Sibugay, Zamboanga City, Zamboanga Del Norte, Davao Oriental, Davao Del Sur, General Santos City, Sultan Kudarat, Saranggani, North Cotabato, South Cotabato, Agusan Del Norte, Agusan Del Sur, Surigao Del Norte, Surigao Del Sur, Dinagat Islands at Cotabato City.

Ang nalalabing bahagi ng bansa ay otomatikong nasa MGCQ status.

Patay ang isang lalaki matapos magwala at sunugin ang kanyang bahay sa Paranaque City.

Problema rin ang mga kapit-bahay ng 48 anyos na suspek na si Elmer Junsay matapos madamay ang kanilang mga bahay sa ginawa nito.

Ayon sa anak ni Junsay, itinigil ng ama ang pag-inom ng gamot nito sa depression at nang magwala ito at nanakit ay hindi na rin nila malapitan.

Nagkulong umano si Junsay sa bahay na kanyang sinunog at naging dahilan ng kanyang pagkasawi.

Nagpaabot na ng ayuda ang barangay sa mga pamilya ng sampung bahay na nadamay sa ginawang panununog ng suspek sa sariling bahay.

Kinundena ng Human Rights Watch (HRW) ang anito’y tokhang style campaign ng gobyernong Duterte laban sa Insurgency.

Ayon kay HRW Senior Researcher Carlos Conde, mas lalong lalabag sa karapatang pantao ang gobyerno sa paggamit nito ng mala tokhang o drug war na paraan sa counter insurency campaign nito.

Sinabi ni Conde na gagamitin ng gobyerno ang nasabing kampanya sa target nitong mga personalidad na laban sa pamahalaan at palalabasin o aakusahang nakikipag kutsabaan sa mga komunista.

Kayat asahan na rin aniya ang pagbabahay bahay ng mga otoridad maging ang pagbisita ng mga ito sa mga tanggapan ng mga aktibista at kunwari’y papakiusapang itigil na ang pag suporta sa mga komunista.

Binigyang diin pa ni Conde na ang nasabing tokhang style campaign na nangyayari na sa Cordilleration Region at lalawigan ng Laguna ay recipe para sa mas marami pang Human Rights Disaster.

Lampas 60-M na ang mga nagparehistro para sa Mayo 2022 National Elections.

Ipinabatid ni COMELEC Spokesman James Jimenez na nasa 61.06-M na ang registered voters hanggang buwan ng Hulyo at inaasahan aniya nilang dadami pa ang magpaparehistro para sa eleksyon sa susunod na taon.

Nabalam ang patuloy na registration dahil sa pagpapatupad ng ECQ sa Metro Manila mula Agosto 6 hanggang 20.

Tatagal hanggang Setyembre 30 ang voter’s registration mula alas-8 ng umaga hanggang alas-7 ng gabi, Lunes hanggang Biyernes bukod pa sa 8am-5pm schedule naman ng pagpaparehistro kapag Sabado at holiday.

Humihingi ng dagdag na pondo ang DOH para sa Special Risk Allowance (SRA) ng mahigit 17,000 pang healthcare workers.

Bukod pa ito, ayon kay Health Undersecretary Maria Rosario Vergeire sa naunang P311-M na inirelease na ng DBM para sa SRA ng mahigit 20,000 health care workers.

Kasabay nito, ipinabatid ni Vergeire na naguusap na ang DOH at DBM para i-extend ang kontrata hanggang sa katapusan ng taon ng health care workers na kinuha sa pamamagitan ng emergency hiring program.

Aprubado na ang halos P300-M na budget ng UP Philippine Genome Centers (PGC) sa Visayas at Mindanao.

Ayon kay Health Undersecretary Maria Rosario Vergeire, ang mga naturang pondo na nai-download na noong Linggo ay magpapalakas sa lingguhang Genome Sequencing Output mula 750 patungong 2,500 samples o 1,500 sa PGC main at tig 350 sa Visayas at Mindanao.

Mas mabilis aniyang makikita ang variants of concern ng mga taga Visayas o Mindanao kung nasa rehiyon na rin ng mga ito ang genome centers na inaasahang magiging operations sa susunod na isa’t kalahating buwan.

Sinabi ni Vergeire na nagsimula na ang training ng personnel mula sa UP Visayas at Mindanao bago gamitin ang pondo sa pagbili ng reagents, kits at iba pang equipment.

Hindi ideal scenario ang pagtakbo sa iisang posisyon sa 2022 National Elections nina Davao City Mayor Sara Duterte-Carpio at Senador Christopher Bong Go .

Ayon ito kay Energy Secretary Alfonso Cusi, pangulo ng PDP Laban.

Sinabi ni Cusi na hindi magandang parehong taga Mindanao tulad nina Go at Duterte-Carpio na magsabong sa presidential race bukod pa sa magmumula ang mga ito sa parehong kampo.

Kasabay nito, muling ipinabatid ni Cusi na isusulong nila sa itinakdang convention ng partido sa Setyembre 8 ang tandem nina Pangulong Duterte at Senador Go.