Judith Estrada-Larino

Isinantabi na ng PhilHealth ang circular nito hinggil sa pansamantalang pagsuspindi sa pagbabayad ng claims sa mga ospital.

Ito ayon kay PhilHealth Spokesperson Dr. Shirley Domingo ay habang nakikipag usap sila kay Health Undersecretary Leopoldo Vega at mga ospital kaugnay sa hindi pa nababayarang claims.

Idinipensa ni Domingo na dapat din nilang tugunan ang posibleng insurance fraud sa claims ng ilang ospital kaya’t maaaring ibalik ang nasabing circular sa mga susunod na araw.

Nakasaad sa circular ang mga panuntunan sa Temporary Suspension of Payments of Claims (TSPC) bilang preventive measure laban sa healthcare providers na iniimbestigahan pa.

Apektado na ang mga Pilipino sa krisis sa ekonomiya sa Lebanon.

Bukod sa madalas na black-out at mga insidente ng karahasan, patuloy din ang pagtaas ng presyo ng petrolyo at mga pangunahing bilihin sa Lebanon na niyayanig umano ng matinding korupsyon at political instability.

Nag a alala ang mga Pilipinong nasa Lebanon sa kanilang magiging kapalaran sa gitna ng kaguluhan sa nasabing bansa.

Partikular dito ang ilang domestic workers na ang kontrata ay hindi na ni renew ang kanilang mga kontrata.

Mahaharap sa usaping legal ang panukalang pagkakasa ng bakuna bubbles para ihiwalay ang mga fully vaccinated kontra COVID-19 mula sa mga hindi pa bakunado.

Ito ayon kay Justice Secretary Menardo Guevarra ay dahil pasok sa nasabing hakbangin ang isyu ng diskriminasyon.

Sinabi ni Guevarra na mayroong valid medical reasons ang ilang tao kaya’t hindi dapat mabakunahan kontra COVID-19.

Binigyang diin pa ni Guevarra na ang panukalang pagkakaroon ng bakuna bubbles ay kailangan para protektahan ang mga nabakunahan na gayundin ang mga hindi pa natuturukan, himukin ang mga hindi bakunado para magpa bakuna na at makatulong na mapalakas ang ekonomiya ng bansa.

Ito aniya ay bagamat hindi pa available ang bakuna sa ilang lugar.

Tuloy na mamayang alas-3 ng hapon ang paglulunsad sa himpapawid ng dalawang cube satellites na dinivelop ng Pilipinas.

Kasunod na rin ito ng masamang panahon na pumigil kahapon sa itinakdang lift-off ng nasabing satellites sakay ng spacecraft mula sa Kennedy Space Center sa Amerika.

Ayon sa US National Aeronautics and Space Administration (NASA), ang lift-off ng Space x 23rd Commercial Resupply Services Mission ay magdadala rin sa Maya 3 at Maya 4 sa International Space Station.

Ang dalawang cubesats na kabilang sa Space x Dragon Flight ay dinivelop sa ilalim ng Stamina 4 Space Program sa tulong ng DOST, UP Diliman, Kyushu Institute of Tehcnlogy, Philippine Space Agency at iba pang tanggapan sa ilalim ng DOST.

Large scale corruption at hindi lamang Plunder ang sangkot sa pondo ng DOH na para sana sa COVID-19 response.

Binigyang diin ito ni Senador Panfilo Lacson matapos luminaw aniya sa pinakahuling pagdinig ng Senado na bilyun-bilyong piso ang nakurakot sa pondong inilaan para sa paglaban sa pandemya.

“Hinding hindi kami matitinag kasi maliwanag naman, meron tayong tinutumbok dito na large scale corruption. Hindi na nga Plunder ang tawag dito e. At saka what makes it worse, yung sa gitna ng pandemya may pagsasamantala pa ng mga bilyones. Diba? Maliwanag yun e. Halos na-establish naman yun na yun ang nangyare. Dahil sa mga na-reveal, tsaka mga dokumentong naipalabas, maliwanag na talagang merong malaking, sabihin na natin nakurakot na pera na para sa pandemya sana,” si Senador Panfilo Lacson, sa panayam ng DWIZ.

Tila namamaltrato ang pakiramdam ng medical workers sa gitna nang paggigiit nila sa hindi pa nababayarang claims ng PhilHealth sa mga ospital.

Binigyang diin ito i Dr. Maricar Limpin, Pangulo ng Philippine College of Physicians (PCP) matapos mabunyag sa pagdinig ng Kamara na nasa mahigit P21-B pa ang utang ng PhilHealth sa mga ospital.

Ayon kay Limpin, umaasa silang tatratuhin sila ng tama ng PhilHealth matapos na ilang ospital pa ang hindi pa nakukuha ang kanilang claims sa ahensya simula pa Marso 2020.

Gayunman, tiniyak ni Limpin na tuluy-tuloy ang trabaho nilang gamutin ang COVID-19 patients kahit palagiang nandyan ang panganib sa kanilang buhay.

Kasabay nito, nanawagan si Limpin sa PhilHealth na tukuyin  ang mga ospital na nabayaran na nito.

Siyam na lugar sa bansa ang nag positibo sa Red Tide Toxin.

Kasunod na rin ito nang isinagawang test ng BFAR at Local Government Units sa katubigang bahagi ng mga nasabing lugar.

Ayon sa BFAR, kabilang sa mga lugar na nagtataglay ng red tide toxin ang Milagros sa Masbate, Coastal Waters ng Dauis at Tagbilaran City sa Bohol, San Pedro Bay sa Western Samar, Coastal Waters ng Biliran Islands, Carigara Bay sa Leyte, Matarinao Bay sa Eastern Samar, Dumanquilas Bay sa Zamboanga Del Sur, Murcielagos Bay sa Zamboanga Del Norte at Lianga Bay sa Surigao Del Sur.

Dahil dito, ipinaalala ng BFAR na hindi uubrang kainin ang anumang uri ng shellfish at maging alamang na makukuha mula sa mga nabanggit na coastal areas.

Uubra naman anitong kainin ang mga isda, pusit, hipon at alimasag subalit kailangang hugasan at lutuing mabuti ang mga ito.

Tutok sa monitoring ang mga otoridad laban sa posibleng sympathy attack ng ISIS inspired group sa Mindanao dahil sa kaguluhan sa Afghanistan.

Tiniyak ito ni Lt. Col. John Paul Baldomar, Spokesman ng 6th Infantry Division dahil hindi nila hahayaang umabot sa bansa ang kaguluhang dulot nang pagpapasabog sa Kabul Airport.

Sa ngayon aniya ay tahimik pa naman ang BIFF o Dawlah Islamiah kasunod na rin nang pagsuko ng ilang miyembro nito, bagamat mahigpit silang naka-monitor sa sitwasyon sa Mindanao.

Isinusulong sa Kamara ang panukalang patuloy na alalahanin ang kabayanihan ng Filipino Olympians.

Sa pamamagitan ito ng House Bill 10096 na ini akda ni House Deputy Speaker Eric Martinez.

Nakasaad sa panukala na ipangalan kay Simeon Toribio, 1932 Olympic High Jump Bronze Medalist ang New Clark Athletics Stadium sa Capas, Tarlac kung saan isinusulong din ni Martinez na mapagtayuan ng isang museum.

Nais din ni Martinez na ipangalan kay Teofilo Yldefonso, Olympic Bronze Medalist sa 200 Meter Breaststroke noong 1928 at 1932.

Bukod pa ito sa pagpangalan sa hurdler na si Miguel White na nag uwi ng olympic medal sa track and field noong 1936 sa Berlin, sa Philippine Institute of Sports Football and Athletics Stadium na dating Ultra sa Pasig City.