Payag na ang COMELEC na ituloy ang voter’s registration sa mga lugar na nasa ilalim ng MECQ mula alas-8 ng umaga hanggang alas-5 ng hapon.
Ayon ito kay COMERLEC Spokesman James Jimenez matapos magpasya ang COMELEC En Banc.
Kasabay nito, nagpasya rin ang En Banc na payagan ang pagpaparehistro sa mga mall.
Una nang itinakda ng COMELEC hanggang Seytembre 30 ang deadline sa voter’s registration. —sa ulat ni Aya Yupangco (Patrol 5)
Magpapasya na sa mga susunod na araw si Vice President Leni Robredo kung tatakbo o hindi sa 2022 National Elections.
Ayon ito kay Atty. Barry Gutierrez, tagapagsalita ni Robredo sa gitna na rin ng panawagan ng ibat-ibang sektor na tumakbo sa pagka-Pangulo sa darating na eleksyon.
Kasabay nito, sinabi ni Gutierrez na nagpapasalamat si Robredo sa tiwala at suporta ng iba’t ibang grupo at gagamitin aniya ito ng bise presidente para pinal na magpasya sa 2022 National Elections.
Una nang inihayag ni Robredo na bukas siyang tumakbo sa pagka-Pangulo subalit nagaalala siya dahil sa limitadong resources nya.
Bumaba sa 1.43 ang reproduction number ng COVID-19 cases sa Metro Manila hanggang kahapon, Agosto 31.
Ito ayon sa kay Professor Guido David, fellow ng OCTA Research Group ay mas mababa sa 1.56 na naitala hanggang nitong Agosto 24.
Sinabi ni David na bumaba rin sa 1.27 ang reproduction number ng COVID-19 cases sa Quezon City at 1.33 sa lungsod ng Maynila.
Nangunguna pa rin aniya ang NCR sa mga rehiyon sa bansa na nakapagtala ng mataas na kaso ng COVID-19 o nasa 3,515 cases hanggang katapusan ng Agosto, at sinundan ito ng Cavite – 1, 428 ..Bulacan – 810, Laguna – 698 at Cebu – 591.
Kinalampag ng ibat-ibang grupo ng healthcare workers ang tanggapan ng Department of Health (DOH) sa Sta. Cruz, Maynila sa unang araw ng Setyembre.
Kabilang sa mga nagprotesta ang Metropolitan General Hospital Employee Association, all workers unity at iba pang healthcare workers.
Patuloy na isinisigaw ng health care workers ang pagpapalabas ng kanilang mga benepisyo tulad ng Special Risk Allowance (SRA) at COVID-19 hazard pay.
Nakasulat sa mga bitbit placards ng protesters ang mga katagang “DOH panagutin, Secretary Duque patalsikin”
Una nang ipinabatid ng DOH na maaari nang i download ang sra ng healthcare workers sa regional offices ng ahensya na siyang namang mamahagi sa mga nasasakupan nilang healthcare facilities. —sa ulat ni Aya Yupangco (Patrol 5)
Hindi pa maituturing na variant of interest o concern ng WHO ang C12 variant na una nang na detect sa South Africa.
Ayon ito kay Health Undersecretary Maria Rosario Vergeire, bagamat nagsumite na ng samples sa WHO ang mga otoridad sa South Africa para mapag-aralan kung dapat nang ituring na variant of concern ang C12 variant.
Lumalabas sa paunang pagaaral na tumaas ang transmissibility nito o mabilis na paghawa at maaaring makaapekto sa immunity mula sa COVID-19 vaccines.
Binuksan na ng Manila City Government ang ilang vaccination sites para sa walk-in kahit pa hindi residente ng lungsod.
Isang grupo ng mga residente ng Carmona, Cavite ang nakitang nakapila sa labas ng isang mall sa Maynila para magpaturok ng unang dose ng COVID-19 vaccine.
Ayon sa grupo, wala pa silang nakukuhang advisory kung kailan uubrang mabakunahan sa kanilang LGU kaya’t nagbaka sakali na sa Maynila dahil kailangan nilang maturukan lalo na’t araw-araw silang lumalabas para mag trabaho.
Ipinabatid ng Manila LGU na ang walk-in vaccines ay tatanggapin sa 45 health centers sa buong lungsod bukod pa sa apat na malls dito bagama’t para lamang sa unang dose ng COVID-19 vaccine.
Tinutulungan na ng DOH ang mga ospital na dinadagsa ng mga pasyenteng may COVID-19.
Tiniyak ito ni Health Undersecretary Maria Rosario Vergeire matapos magtayo ang DOH ng modular hospitals at tents para mapalaki ang kapasidad ng health facilities na mayruoong COVID-19 cases.
Ipinabatid pa ni Vergeire na hiniling nila sa Local Government Units na i-mobilize ang Level 1 hospitals para sa COVID-19 response dahil karamihan sa mga pasilidad nito ay hindi naman nagagamit.
Nakikipag-ugnayan na rin ang DOH sa One Hospital Command Center para mabigyan ng assistance ang publiko sa paghahanap ng mga pasilidad na bukas pa sa COVID-19 patients.
Pinag-aaralan ng DOH kung uubrang pamalit ang Barictinib sa limitadong supply ng Tocilizumab para gamutin ang mga pasyenteng may COVID-19.
Ayon kay Health Undersecretary at Treatment Czar Leopoldo Vega, nakikipag-usap na sila sa distributor ng Baricitinib para madagdagan ang supply nito sa bansa.
Tulad ng Tocilizumab na isang anti inflammatory drug, ang Baricitinib ay ginagamit para gamutin ang Rheumatoid Arthritis.
Una nang pansamantalang itinigil ng National Kidney and Transplant Institute ang paggamit ng Tocilizumab maging ng Remdisivir sa COVID-19 patients maliban na lamang sa severe cases.
Winelcome ng Philippine Hospital Association (PHA) ang pag suspindi ng PhilHealth sa implementasyon ng hindi muna pagbabayad sa hospital claims na may kinalaman sa COVID-19.
Ayon kay Dr. Jaime Almora, Pangulo ng PHA, ang nasabing hakbang ng PhilHealth ay resulta ng serye ng pakikipagpulong nila at nagpapasalamat sila sa ilang mambabatas na nagsilbing boses nila.
Binigyang diin ni Almora na dapat namang bayaran ng PhilHealth ang claims maliban dun sa mapapatunayang dinaya o pineke base na rin sa magiging resulta ng imbestigasyon mismo ng PhilHealth.
Gumulong na ang pagbabakuna kontra COVID-19 ng PNP sa mga island provinces.
Ito ayon kay Lt General Joselito Vera Cruz, PNP Deputy Chief for Administration at Administrative Support for COVID-19 Task Force ay bahagi nang puspusang pagbabakuna sa iba’t ibang regional police offices sa buong bansa.
Ipinabatid ni Cruz na nakikipag-ugnayan na ang regional, medical at dental units ng kanilang health service sa mga tanggapan ng DOH para sa pagtuturok ng 200,000 doses ng Astrazeneca na ibinigay ng DOH sa PNP.
Batay sa record ng PNP health service, nasa halos 80,000 na o mahigit 43% ng kanilang mga tauhan sa police regional offices ang fully vaccinated.