Judith Estrada-Larino

Bahala na ang IATF na pinal na magpasya kaugnay sa panukalang pagkakasa ng granular lockdown ng dalawang linggo kapalit ng ECQ status.

Ayon ito kay DILG undersecretary at spokesman Jonathan Malaya matapos aniyang magpasya ang iba’t ibang  ahensya ng gobyerno na ipatupad ang granular lockdown.

Tiniyak ni Malaya ang suporta ng national government sa LGUs sa pagbibigay ng pagkain sa mga apektadong residente.

Sa dalawang linggong granular lockdown, sinabi ni Malaya na sasagutin ng LGUs ang food assistance sa unang linggo at bahala na ang national government at DSWD sa pagbibigyan ng pagkain sa ikalawang linggo.

Sumirit na sa 2 million mark ang kumpirmadong kaso ng COVID-19 sa Pilipinas.

Ito ay ayon sa DOH matapos maitala sa 14,216 ang mga bagong kaso ng COVID-19.

Dahil dito, pumalo na sa halos 141,000 ang active cases ng virus kung saan 96. 1% ang mild, 1.1% ang asymptomatic, 1.2% ang severe at 0.6% ang critical condition.

Sumipa naman sa mahigit 1.8 million ang total recoveries kabilang na ang 18,754 patients na mga bagong gumaling sa COVID-19.

Samantala, umakyat na sa 33,533 ang death toll kung saan 86 ang mga pasyenteng pinakahuling nasawi sa nasabing virus.

Mahigit 4,500 doses ng COVID-19 vaccines ang nasayang.

Inamin ito ni health undersecretary Myrna Cabotaje sa pagdinig ng House Committee on Health sa 2022 budget ng ahensya, bagama’t maituturing pang mababa ang nabasurang doses ng bakuna kontra COVID-19 mula Marso hanggang nitong nakalipas na Agosto 20.

Maliban sa ilang report na nasunugan o na frozen na ang mga bakuna, binigyang-diin ni Cabotaje na nananatiling nasa maingat at maayos na pangangasiwa ang cold chain facilities para sa COVID-19 vaccines.

Pumapalo na sa mahigit 33 million doses ng bakuna ang naiturok na sa mga Pilipino.

Itinanggi ng Malakanyang na bumili ang gobyerno ng umano’y  overpriced PPE o nasa 1, 700 kada isa.

Ang tinutukoy ni Presidential Spokesperson Harry Roque ay ang P8.6-B na halaga ng face mask, face shield at PPE na binili ng gobyerno sa kumpanyang Pharmally na binubusisi ng mga senador.

Binigyang-diin ni Roque na presyo at kalidad ang pinagbasehan sa pagbili ng medial supplies at maaari aniyang mayroong kumita rito, subalit hindi sa administrasyon.

Dahil dito, binalikan ni Roque si senate minority floorleader Franklin Drilon at sinabihang tanungin ang mga kakampi nito noong nakalipas na administrasyon na bumili ng mahigit P3,000 halaga ng kada isang PPE noong 2015 at 2016.

Kinuwestyon ni Senador Risa Hontiveros ang pakikipagtransaksyon ng gobyerno sa mga fugitive o mga wanted na tao.

Kasunod na rin ito nang nakuhang impormasyon ni Hontiveros na mayroong warrant of arrest sa Taiwan ang mag amang Chinese na may-ari o officers ng Pharmally Pharmaceutical Corporation.

Ayon kay Hontiveros, wanted sa Taiwan si Huang Wen Lie na kilala rin bilang Tony Huang, chairman ng Pharmally International Holdings dahil sa kasong securities fraud, stock manipulation at embezzlement samantalang anak nitong si Huang Tzu Yen, incorporator ng Pharmally Pharmaceutical Corporation at pharmally biological incorporated ay wanted naman dahil sa kasong stock manipulation.

Sinabi ni hontiveros na nagtataka siya kung bakit hindi naamoy ng gobyerno ang mga kaso ng mag-ama at binigyan pa ng multi bilyong pisong kontrata para sa aniya’y overpriced medical supplies.

Bukod dito, inihayag ni Hontiveros na ang chairman ng full win group na si Zheng Bingquiang ay wanted din sa kasong stock manipulation at ang chairman ng Philippine Version ng nasabing kumpanya ay si Michael Yang na dating presidential economic adviser at malinaw aniyang kasabwat ng mga taong tinutugis ng taiwan authorities.

Hindi na dapat administrasyong Duterte o sinumang kandidato nito ang maupo sa Malacañang para matiyak na matutukan at masolusyunan ang COVID-19 pandemic sa Pilipinas na kabilang sa anito’y “worst in asia”.

Binigyang-diin ito ni 1Sambayan convenor Neri Colmenares dahil nakita na ng publiko kung paanong tumugon ang administrasyong Duterte sa COVID-19 pandemic na hindi na dapat maulit dahil sa mga kapalpakan at pangungurakot.

Tinukoy ni Colmenares ang bilyong overpriced pandemic deals na iniimbestigahan ngayon ng Senate Blue Ribbon Committee, lumutang na sangkot sa kuwestiyunableng kontrata ang malapit na kaibigan ni Pangulong Duterte na si dating Presidential Economic Adviser Michael Yang.

Si Yang ang sinasabing nagpakilala sa Pangulong Duterte sa mga opisyal ng Pharmally Pharmaceuticals na nakakuha ng P8.6-B kontrata para bumili ng medical supplies noong 2020 gayong may ilang buwan pa lamang nag-o-operate at may capital lang na 625,000 pesos.

Sinabi ni Colmenares na si Davao City mayor Sara Duterte ay katulad lamang din ng ama niya na sakaling maupo sa Malacañang ay ipagpapatuloy lamang ang incompetence, corruption, patayan at proteksyunan ang Pangulong Duterte at iba pang opisyal ng pamahalaan para hindi makasuhan sa korupsyon.

Kasabay nito, minaliit ng 1Sambayan ang pahayag ng Pangulong Duterte na walang mananalong oposisyon sa 2022 elections na anito’y pagpapahiwatig ng malakas na posibleng dayaan para paboran ang mga kandidato ng administrasyon.

Kakailanganin pa ng batas para maibigay ang SRA o Special Risk Allowance ng healthcare workers na mayroong “indirect exposure” sa COVID-19 patients.

Inihayag ito ni health secretary Francisco Duque III sa pagdinig ng 2022 budget ng DOH sa kamara.

Binigyang-diin ni Duque na nakasaad sa Bayanihan to Recover as One Act o Bayanihan 2 ang mga benepisyo para sa healthcare workers na direktang nakakasalamuha o gumagamo sa mga COVID-19 patients.

Hindi naman aniya uubrang ipaubaya na lamang sa pinuno ng ahensya ang interpretasyon sa nasabing batas na sa pamamagitan lamang din ng batas maaaring amyendahan at kung hindi ay hahabulin tiyak ng COA ang mga pinuno ng ospital o iba pang pinayagan ito.

Umabot na sa full capacity ang isolation facilities sa lalawigan ng Laguna matapos sumirit ang kaso ng COVID-19.

Dahil dito, ipinabatid ni Dr. Cj Cofreros, facility manager ng Ligtas COVID Center sa Cabuyao, Laguna, nagpapatupad sila ng palit-ulo scheme kung saan kaagad mayroong kapalit ang isang pasyente na nakatakda nang i-discharge o lumabas.

Sinabi ni Cofreros na nagtalaga sila ng tao para mag-mando sa mga ipapalit sa mga lalabas na pasyente, depende sa mga makukuhang impormasyon mula sa mga naka-standby na pasyente.

Ganito rin aniya ang sistemang pinaiiral nila sa iba pang pasilidad sa bayan ng Calamba.

Tapos na ang giyera sa Afghanistan.

Ayon ito kay US President Joe Biden matapos ipagmalaki ang aniya’y kakaibang tagumpay ng US military sa paglikas partikular sa mga mamamayan ng nasabing bansa.

Sinabi ni Biden na tinupad na niya ang isa sa mga pangako n’ya noong kampanya na tatapusin ang aniya’y pinakamahabang giyera ng Amerika sa loob ng 20 taon.

Kuntento rin aniya siya sa ginawang paghahanda ng militar sa naturang paglilikas.

Halos 95 % na ng cash aid ang naipamahagi sa mga naapektuhan ng ECQ na ikinasa sa Metro Manila noong Agosto 6 hanggang 20.

Ipinabatid ni DILG Undersecretary at Spokesperson  Jonathan Malaya, halos 11 million recipients na ang nakakuha na ng ayuda hanggang kahapon, Agosto 31.

Kabilang sa mga nakakumpleto na aniya nang pamamahagi ng cash aid ang Caloocan City, Malabon City, Navotas, Pasig City, Maynila at Quezon City.

Sinabi ni Malaya na maraming hindi pa nakakapag-claim ng kanilang ayuda, kaya’t maaari itong ibigay sa mga dagdag na beneficiary.