Judith Estrada-Larino

Uubra nang pag-usapan at tutukan ang isyu ng booster shots.

Ito’y ayon kay health undersecretary Maria Rosario Vergeire kapag nabakunahan na kontra COVID-19 ang 50% target population at magkaroon ng sapat na suplay ng bakuna.

Sinabi ni Vergeire na ang tinutukoy na booster shots ng mga expert ay kaparehong tatak ng bakuna na ginagamit ngayon o panlaban din sa delta variant at iba pang uri ng coronavirus.

Ipinabatid pa ni Vergeire na mayroon pang bibilhing second generation vaccines na sumasailalim pa sa clinical  trial.

Posibleng sa huling quarter ng taong ito uubrang maturukan ng bakuna kontra COVID-19 ang mga Pilipinong may edad 12 hanggang 17.

Ito ayon kay FDA Chief Eric Domingo ay kung matitiyak ang sapat na supply ng COVID-19 vaccines.

Kasunod na rin ito nang inisyung Emergency Use Authorization (EUA) ng FDA sa Moderna vaccines para maiturok sa mga 12 to 17 years old Pinoys kahapon at noong nakalipas na buwan ang Pfizer vaccine para rin sa naturang age group.

Sinabi ni Domingo na maaaring i-prioritize muna ang mga kabataang may comorbidities sakaling maisama na sa vaccination program ng bansa ang mga kabataang may edad 12 hanggang 17.

Binalaan ng Food and Drug Administration (FDA) ang publiko kaugnay sa mahigit 20 produktong pagkain na hindi rehistrado sa ahensya.

Kabilang sa mga hindi rehistrado sa FDA ang Lee Kum Kee Guilin Style Chili Sauce, Tasty Vegetables na mayruong dark orange label sa glass bottle, Pickled Vegetable with boy character and bright green label sa glass bottle, Taiwan Chili Sauce na may male character at violet label sa glass bottle at Ji Xiang Ju preserved vegetable na mayroong blue at green label sa glass bottle.

Binigyang diin ng FDA na hindi nito matitiyak ang kaligtasan ng mga naturang produkto dahil hindi pa nila na evaluate ang mga ito.

Dahil dito, nagbanta rin ang FDA sa mga establishment laban sa pagbebenta ng mga nasabing produkto na walang certificate of product registration.

Umalma ang DOH sa alegasyong overpriced ang mga biniling ambulansya na ipinamagi sa CALABARZON Region.

Kasunod na rin ito nang pagbubunyag ni Senador Panfilo Lacson na overpriced ng P1-M kada unit ang biniling ambulansya ng DOH sa ilalim ng Health Facilities Enhancement Program (HEEP) ngayong 2021.

Binigyang diin ni Health Undersecretary Maria Rosario Vergeire na ang pagbili ng mga nasabing ambulansya ay dumaan sa tamang proseso ng bidding and awards committee.

Kasama rin aniya sa presyo hindi lamang ang mga ambulansyang type 1 na mayroong medical equipment at supplies na kundi maging ang training ng drivers at medical workers na magmamando sa mga naturang ambulansya.

Nasabat ng mga otoridad ang halos P37-M na halaga ng tsaa-bu o hinihinalang illegal drugs na itinago sa tsaa sa Quezon City.

Nadiskubre ang hinihinalang shabu na nakalagay sa chinese labelled tea bags sa operasyong isinagawa ng mga otoridad malapit sa isang eskuwelahan sa Misamis Road sa Barangay Sto Cristo.

Naaresto sa operasyon ang 43 anyos na CCTV installer na si Jason John Alberca alias ‘Jun Jun’ na nagsabing utusan lamang siyang ibigay ang mga items kapalit ng pera.

Sinasabing ang pagpapakalat ng naturang illegal drugs ay ginagawa hindi lamang sa Metro Manila kundi maging sa CALABARZON at Central Luzon.

Ligtas ang mga dumating na COVID-19 vaccines mula sa Moderna.

Nilinaw ito ni FDA Chief Eric Domingo matapos itigil ng Japan ang paggamit sa Moderna vaccines nang makitang kontaminado ang ilang vials.

Ipinabatid ni Domingo na ang Moderna vaccines batch na dumating sa bansa ay hindi kabilang sa mga ipinadala sa Tokyo kaya’t ligtas itong iturok sa mga Pilipino.

Nakaligtas ang isang doktor matapos mabangga ng tren ang kanyang sasakyan sa Sampaloc, Maynila.

Batay sa CCTV footage patawid ng P. Margal Street sa Barangay 474 ang nasabing SUV habang hinihintay ang pagdaan ng isang aso at nang umandar na ito ay padating naman ang tren ng PNR na kaagad sumalpok sa kaliwang bahagi ng sasakyan.

Ayon sa doktor na nagta-trabaho sa Chinese General Hospital, nanggaling siya sa duty at maniningil ng renta sa kanyang paupahang bahay nang mangyari ang insidente.

Inamin ng doktor na hindi niya nakita ang pag senyas ng tauhan ng PNR dahil madilim ang lugar maging ang tunog mismo ng tren.

Kaagad namang sumaklolo ang mga opisyal ng barangay at naalis ang SUV pasado alas-9 na ng gabi habang tumigil naman sa Laong Laan station ang nasabing sasakyan.

Naglabas na ng mga ebidensya ang nakalipas na administrasyon kaugnay sa umano’y overpriced Personal Protective Equipment (PPE) na binili noong panahon nito.

Inilabas ni Dating Deputy Spokesperson Abigail Valte sa kanyang Facebook account ang kopya ng purchase order sa mahigit 3,000 PPE na binili ilang araw bago ang pagtatapos ng termino ng Dating Pangulong Noynoy Aquino.

Kasama sa kada set na nagkakahalaga ng halos P4,000 ang googles, gloves, plastic shoe covers, coveralls, surgical gloves, N95 face masks, surgical masks at head caps.

Una nang ibinunyag ni Presidential Spokesman Harry Roque na mas mahal ang nabiling PPE noong Aquino administration kumpara sa binili ng Duterte administration bilang sagot sa pagpapa imbestiga ng mga mambabatas sa anila’y overpriced PPE na binili ng Duterte administration.

Handa si Senador Christopher Bong Go na maimbestigahan ng Senate Ethics Committtee.

Ito’y ayon kay Go dahil wala siyang itinatago, walang ginawang mali lalo na pagdating sa disorderly o unethical behavior kaya’t wala siyang kinatatakutan sakaling imbestigahan ng nasabing komite.

Binigyang-diin ni Go na iginagalang n’ya ang senado bilang institusyon na kanyang kinabibilangan at hangad lang niyang pairalin nito ang due process at fairness o pagiging patas.

Inihayag ni Go na sa ngayon ay wala pa namang naihahaing reklamo laban sa kanya, kaya hindi pa siya makakapag-komento at hindi pupuwedeng haka-haka at patutsada lang ang pagbatayan ng reklamo.

Muling iginiit ni Go na kung mapatunayang sangkot siya sa anumang korapsyon ay magbibitiw siya sa puwesto.

Dagdag sakripisyo pa sa mga guro ang pagharap sa panganib nang pagsisilbi sa eleksyon sa gitna ng COVID-19 pandemic.

Ayon ito kay senador Sherwin Gatchalian matapos igiit ang panukalang i-exempt sa buwis ang honoraria at iba pang benepisyo ng mga gurong magsisilbi sa eleksyon.

Sa inihain niyang Senate Bill number 2019 , ipinatitigil ni Gatchalian ang pagpapataw ng buwis sa honoraria, travel allowance at iba pang benepisyo na ibinibigay ng COMELEC sa mga guro at iba pang election workers batay na rin sa Republic Act 10756 o election service reform act.

Kasabay nito, ipinabatid ni Gatchalian na ini-report ng Department of Education ang pag-apruba ng COMELEC sa P3,000 na honoraria sa mga guro na magsisilbi sa mga electoral board taliwas sa rekomendasyon ng ahensya, subalit pinoproblema ng komisyon ang pondo dahil pinatapyasan ng Malakanyang ng 37% ang hiningi nilang budget para sa susunod na taon.