Judith Estrada-Larino

Inaasahang balik trabaho na bukas, Lunes, si Vice President Leni Robredo.

Ito ay matapos makumpleto ni Robredo ang 14 day quarantine kasunod nang pagiging close contact ng isang staff member nitong nag positibo sa COVID-19.

Agosto 25 nang ianunsyo ni Robredo ang pagsailalim sa mandatory quarantine kahit nag negatibo sa COVID-19 test matapos ang exposure sa nasabing staff nya.

Kasabay nito, pinayuhan ni Robredo ang mga empleyado na magkanya-kanya kapag kumakain sa opisina dahil mas mabilis kumalat ang virus kung kakain nang sabay sabay kung saan nakaalis lahat ang face mask.

Maaaring makatulong para mapigilan ang hawahan ng COVID-19 ang panukalang pagpapatupad ng granular lockdown ng Local Government Units (LGUs).

Ayon ito kay Professor Guido David, fellow ng OCTA Research Group bagamat kailangan ng LGUs ng dagdag na mga tao para maging epektibo ang pagkakasa ng granular lockdown.

Sinabi ni David na base sa kasaysayan ng bansa, walang ebidensyang epektibo ang ipinatutupad na granular lockdown ng LGU’s sa gitna nang pagsirit ng kaso ng COVID-19.

Para maging epektibo ang granular lockdown, ipinanukala ni David ang pagbuo pa ng LGUs ng maraming paraan kabilang ang dagdag na manpower

Tinukoy ni David ang mga magbabantay na mga taong  barangay kapag nagsara ang isang kalye gayundin ang mga maghahatid ng pagkain.

Kaugnay nito, binalaan ni David ang LGUs na limitahan ang pagpapatupad ng granular lockdown sa kada area lamang dahil hindi ito magiging epektibo kung kalat na sa mga komunidad ang kaso ng COVID-19.

Mahigit 300 OFW mula sa Dubai ang dumating sa Davao City, sakay ng isang chartered flight.

Dahil dito, ipinabatid ng DFA na nasa mahigit 6K OFW na mula sa UAE ang balik bansa simula nang ideklara ang pandemya.

Binigyang-diin ni DFA undersecretary Sarah Lou Arriola na tuloy-tuloy ang pagpapauwi nila sa mga OFW na apektado ng COVID-19 kung saan 14 na special flights ang naikasa na nila sa pagitan ng mga buwan ng Hunyo hanggang Setyembre.

Dapat maipamahagi sa tamang oras ang Special Risk Allowance (SRA) ng health workers.

Ayon ito sa infectious disease expert Dr. Rontgene Solante, sa gitna na rin ng resignation ng ilang healthcare workers dahil sa stress at panganib sa kalusugan ngayong pandemya.

Sinabi pa ni Solante na overwhelmed na ang healthcare workers dahil nadadapuan din sila ng COVID-19 habang nag-aalaga sa mga pasyente.

Habang committed ang ilang medical workers, hinimok ni Solante ang gobyerno na ibigay ang kinakailangang suporta sa health workers kasunod nang patuloy na pagdagsa ng mga dinapuan ng COVID-19 sa mga ospital.

Pinangangambang pumalo pa sa 30,000 ang mga bagong kaso ng COVID-19 hanggang sa katapusan ng Setyembre sa gitna na rin nang pagkalat ng Delta variant ng Coronavirus sa bansa.

Ayon ito kay Professor Guido David, fellow ng OCTA Research Group sa kanilang pagtaya kung saan mas sisirit pa ang bagong kaso ng infection sa susunod na linggo.

Gayunman, sinabi ni David na hindi  naman papalo sa 40,000 ang posibleng maitalang bagong kaso ng COVID-19 sa Metro Manila.

Samantala, ipinabatid ni David na tumaas ang reproduction number ng COVID-19 sa Metro Manila na ngayo’y nasa 1.41 mula sa 1.39 bagamat pababa na ang over all trend ng COVID 19 cases sa rehiyon.

Ang reproduction number ay tumutukoy sa bilang ng nahahawahan ng isang infected ng virus.

Nasunog ang bahagi ng National Archives sa UN Avenue sa Maynila.

Ayon sa BFP-NCR, ala-1 ng madaling araw nagsimula ang sunog sa Chief Administrative Office sa ika-6 na palapag ng PPL Building.

Umabot ng ikalawang alarma ang nasabing sunog bago tuluyang naapula pasado alas-3 ng madaling araw.

Sinabi ng mga otoridad na hindi naman naapektuhan ng sunog ang mga mahahalagang dokumento sa National Archives bagama’t umabot sa P800,000 ang danyos dito.

Walang ibang tanggapan sa nasabing gusali ang nadamay sa naturang sunog.

Tuloy na sa Lunes, September 6 ang soft launch ng VaxCertPH o pag-iisyu ng vaccination certificate para sa mga fully vaccinated.

Ipinabatid ni Presidential Spokesman Harry Roque na uunahin sa unang yugto ng VaxCertPH ang mga OFW at mga lalabas ng bansa mula Metro Manila at Baguio City.

Pagbabatayan ng VaxCertPH ang data na isusumite ng Local Government Units sa pamamagitan ng vaccine information management system.

Una nang inihayag ng DITC na ang VaxCertPH ay posibleng maging fully implemented sa susunod na buwan.