Judith Estrada-Larino

Sisimulan na ng COMELEC, katuwang ang technology supplier na Voatz, sa Setyembre 11 ang unang bahagi ng internet voting test run nito.

Ayon kay COMELEC spokesperson James Jimenez, alas-8  ng umaga ng Setyembre 11 hanggang alas-8 ng gabi ng Setyembre 13 gagawin ang test run.

Sinabi ni Jimenez na ang voting list ay ipo-post sa official Facebook page ng Office for Overseas Voting na nagpapakita ng last name, first name at middle initial ng mga participant.

Bukod sa Voatz, magsasagawa rin ng test runs ang COMELEC sa Indra at Smartmatic sa buwang ito.

Hunyo nang lumagda ang COMELEC sa Memorandum of Agreement sa tatlong solution providers para sa live test runs ng Internet Voting Systems.

Fully vaccinated na ang mahigit sa kahalati ng target population sa Metro Manila.

Ipinabatid ni vaccine czar secretary Carlito Galvez, Jr., na 52.2% na ng target population o nasa 5M residents sa Metro Manila ang nakakumpleto na ng bakuna habang halos 82% o 8M naman ang naturukan na ng first dose.

Samantala, mahigit 15M Pinoy na ang fully vaccinated kontra COVID-19 habang nasa halos 21M naman ang naturukan na ng unang dose hanggang nitong Setyembre 5.

Idinipensa ng Pangulong Rodrigo Duterte ang pagbili ng gobyerno sa bilyon-bilyong pisong halaga ng PPE o Personal Protective Equipment noong isang taon.

Iginiit ng Pangulo na walang korupsyon sa pagbili ng mga nasabing PPE dahil nakabatay ito sa government Procurement Reform Act at Bayanihan To Heal As One Act.

Binigyang-diin ng Pangulo na malinaw sa Bayanihan Law ang ibinibigay na kapangyarihan sa Pangulo para gumawa ng emergency measures bilang tugon sa krisis ngayong may pandemya.

Ipinabatid pa ng Pangulo na nagsusumite ng report ang kanyang tanggapan sa Kongreso batay na rin sa Bayanihan laws na nag-o-obliga sa Pangulo na magbigay ng regular reports sa joint oversight committee.

Tila nabigo ang maraming simbahan sa Metro Manila sa paghahanda nito sa kaarawan ng Birheng Maria ngayong araw na ito.

Kasunod na rin ito nang pagbawi ng IATF sa unang anunsyo nitong ilagay na sa GCQ mula sa MECQ ang Metro Manila. Simula sana ngayong araw na ito.

Nabatid na maraming parokya ang nag-post na sa social media na pupuwede nang pumasok sa simbahan ang mga tao sa limitadong kapasidad lamang simula ngayong araw na ito, subalit nalungkot ang mga ito nang manatili sa MECQ ang NCR.

Ayon sa PACO church sa Maynila, hindi muna matutuloy ang mga pampublikong misa ngayong araw na ito hanggang sa maging maayos ang desisyon ng IATF hinggil sa quarantine restrictions sa Metro Manila.

Ganito rin ang pananaw ng Basilica Minore De San Pedro Bautista sa Quezon City, Sta Cruz church sa Maynila at Most Holy Redeemer Church sa Masambong sa Quezon City.

Dahil dito, balik muli sa livestream o online ang lahat ng mga misa sa mga gustong magsimba ngayong birthday ni Mama Mary.

Suspendido ang ilang international at domestic flights ngayong araw na ito, dahil sa bagyong Jolina.

Kabilang sa mga suspendidong biyahe pa ibang bansa, ayon sa MIA ang All Nippon Airways Manila to Haneda Flight at dalawang biyahe ng Singapore Airlines mula sa nasabing bansa pa Maynila at vice versa.

Kanselado rin ang domestic flights ng Airswift mula Maynila pa Puerto Princesa at pabalik ..gayundin ang Manila-Davao-Manila Flights ng Philippine Airlines.

Nasimulan na ng halos 45-M Pinoys ang pag proseso sa kanilang National ID.

Ayon ito kay NEDA Director General Karl Kendrick Chua kung saan hanggang nitong Setyembre 3 ay nakapagparehistro na ang mahigit 41 pinoys sa Step 1 o Demographic Data Collection.

Nasa mahigit 28-M Pinoys naman ang nakakumpleto na ng Step 2 registration o Biometrics habang nasa halos 1.6-M ang nakatanggap na ng kanilang Phil ID Cards.

Target ng gobyerno na makapag parehistro pa ng 50 hanggang 70-M individuals para sa National ID bago matapos ang taong ito.

Inalerto ng mga otoridad ang mga residente sa mga mababang lugar malapit sa Angat Riverbank matapos magpakawala ng tubig ang Ipo Dam.

Ayon sa PAGASA, dahil sa matinding ulan na dala ng bagyong Jolina, lumampas na sa spilling level na pumalo na sa 101m ang water level sa Ipo Dam kaya’t nagpakawala na sila ng tubig.

Sinabi ng PAGASA na inaasahan ding tataas pa ang tubig sa Ipo Dam dahil sa patuloy na buhos ng ulan.

Kabilang sa mga pinagiingat sa posibleng pagbaha ang mga residente ng Norzagaray, Angat, San Rafael, Bustos, Baliuag, Pulilan, Plaridel at Hagonoy .

Hindi pakikialaman ng Pangulong Rodrigo Duterte ang mga Pilipinong nahaharap sa kasong illegal drugs sa ibang bansa.

Kabilang dito, ayon sa Pangulo ang mga OFW na nahaharap sa execution dahil sa drug conviction.

Sinabi ng Pangulo na maaaring kumilos ang mga sugo ng bansa sa mga pinoy na nahaharap sa executuon subalit hindi niya tutulungan ang mga ito.

Nag positibo sa COVID-19 si Pasay City Congressman Antonio Calixto.

Ayon kay Calixto, naka-isolate na siya matapos makumpirmang dinapuan ng COVID-19 nang magpatingin sa doktor kasunod nang naranasang mild cough noong Lunes.

Nag negatibo naman sa COVID-19 ang close contacts ni Calixto kabilang ang mga miyembro ng pamilya nito, bagama’t naka quarantine na ang mga ito sa susunod na 14 na araw.

Hindi titigilan ni Senador Panfilo Lacson ang DOH hangga’t hindi napapanagot ang nasa likod nang pagbili ng overpriced ambulance ng ahensya.

Sinabi sa DWIZ ni Lacson na patutunayan niya sa pagdinig muli ng senador sa Martes ang may overpricing sa mga nasabing ambulansya kumpara sa binili ng LGU bagama’t pare-pareho ang loob at labas nito.

Ayon pa kay Lacson, hindi uubra ang pag depensa ng DOH na higit na mayroong kalidad ang binili nilang mga naturang ambulansya kumpara sa binli ng LGUs dahil ang isyu rito aniya ay overpricing na malinaw na malinaw na nangyari. —sa ulat ni Cely Ortega Bueno (Patrol 19)