Judith Estrada-Larino

Isinusulong ni Senate President Pro Tempore Ralph Recto ang pagbabalik ng “buy Filipino provision sa pambansang budget, matapos ang umano’y malaking kinita ng mga sangkot sa pagbili ng mahal na medical supplies sa China.

Sinabi ni Recto na kaya naman palang gumawa ng may kalidad at mas murang PPE’s, face shields at face mask ng mga Pilipino kaya’t hindi na kailangang bumili pa sa ibang bansa.

Binigyang diin ni Recto na sa ilalim ng Marcos at Aquino administration ay palaging may probisyon ng buy Filipino rule sa General Appropriations Act na nawala sa 2014 budget.

Noon anya ay mandated ang gobyerno na i-prioritize ang pagbili ng mga produktong gawa sa pilipinas upang matulungan ang local manufacturers na makapagpatuloy sa kanilang operasyon at makapagpa suweldo sa kanilang mga manggagawa kaya’t dapat  ibalik na ang  buy Filipino provision sa national budget.

Iginiit ni Recto na kung noong wala pang COVID ay mayroon buy Filipino policy, mas kailangan anya ito ngayong naghihingalo ang  mga lokal na kumpanya para manatili silang bukas at hindi magtatanggal ng mga manggagawa. —ulat mula kay Cely Ortega-Bueno (Patrol 19)

Sinuspinde na ng Manila at Caloocan City governments ang pasok sa kani-kanilang mga tanggapan.

Kasunod na rin ito ng masamang panahon dulot ng bagyong Jolina.

Alas-2 ng hapon nang pauwiin ng tanggapan ni Manila Mayor Isko Moreno ang mga empleyado ng City Hall samantalang alas -3 naman ng hapon nang suspendihin ang trabaho ng mga tauhan ng Caloocan City Government.

Gayunman, pinaiwan ng Manila at Caloocan LGU’s ang mga tauhan nilang may kinalaman sa rescue and monitoring para tumutok sa sitwasyon ng mga lungsod habang bumabayo ang bagyong Jolina.

Mahigit walong libong indibidwal na mula sa regions 5, 6 at 8 ang inilikas matapos manalasa ang bagyong Jolina.

Ipinabatid ito sa DWIZ ni NDRRMC Spokesperson Mark Timbal na nagsabing ang mga apektadong residente ay nananatili sa 46 na evacuation centers.

Ayon pa kay Timbal, 24 na bahay ang sinira ng bagyong Jolina na naging dahilan din kaya’t nawalan ng supply ng kuryente ang malaking bahagi ng tatlong rehiyon.

Tiniyak ni Timbal ang patuloy na pag monitor pa rin sa galaw ng bagyong Jolina gayundin ng bagyong Kiko habang nakakasa na ang kanilang tulong sakaling kailanganin ng Local Government Units.

Nasa 8,583 katao po ang na-evacuate po ngayon sa ating iba’t ibang locations sa region 5, region 6 and region 8 at nag-istay po sila sa 46 na mga evacuation centers . Although meron tayong mga kababayan na hindi  ginusto na mag-stay sa evacuation centers  na nakituloy sa mga kamag-anak nila. Sa tala po natin nasa 2,357 katao po iyan. Sila po ngayon ay inaasistehan ng mga local government  units natin, ginagamit po nila ang stockpiles for relief items,”pahayag ni NDRRMC Spokesperson Mark Timbal

Nananatili sa storm signal number 2 ang Metro Manila at 11 pang lugar sa bansa dahil sa bagyong Jolina na patungo ng lalawigan ng Cavite.

Ang sentro ng bagyong Jolina ay pinakahuling namataan sa vicinity ng San Nicolas, Batangas, taglay ang pinakamalakas na hanging umaabot sa 95 kilometro kada oras malapit sa gitna at may pagbugso sa umaabot sa 160 kilometro kada oras.

Ang bagyong jolina ay kumikilos pa hilagang kanluran sa bilis na labing limang kilometro kada oras.

Bukod sa Metro Manila ..kabilang sa nasa ilalim ng signal number 2 ang Northern at Central portions ng Oriental Mindoro at Ccidental Mindoro, Central Portion ng Quezon, Batangas, Cavite, Laguna, Rizal, Southern portion ng Bulacan, Pampanga, Bataan, Zambales at Tarlac.

Nakataas naman ang public storm signal number 1 ang Marinduque, La Union,  Southern portion ng Benguet gayundin ng Nueva Vizcaya at Aurora, Pangasinan, Nueva Ecija, nalalabing bahagi ng Bulacan, Northern at Southern portions ng Quezon, nalalabing bahagi ng Oriental Mindoro at Occidental Mindoro.

Ang bagyong Jolina ay inaasahang magla-landfall muli sa vicinity ng Bataan peninsula at tinatayang lalabas ng Philippine Area of Responsibility bukas ng gabi, huwebes o biyernes ng umaga.

Halos P300-K halaga ng shabu ang nasabat ng mga awtoridad sa Davao City jail.

Ito ay matapos madiskubre ng jailguard ang 35 sachet ng shabu na nakasiksik sa mga laman ng manok at mga sili ng adobong ipapadala sana ng suspek na si Richard Caybot sa sa male dormitory ng Davao City jail.

Ayon sa BJMP, dinala na sa Talomo police station ang suspek na nakatakda nang kasuhan.

Hunyo nang matuklasan din sa male dormitory ng nasabing kulungan ang anim na sachet ng shabu na nakasilid naman sa loob ng isang basketball na hinagpit sa compound ng bilangguan.

Pinuri ng Pangulong Rodrigo Duterte ang mga awtoridad sa dalawang drug bus operations sa Zambales at Bataan.

Magugunitang nakuha sa mga nasabing operasyon ang halos P4-B halaga ng shabu, naaresto ang tatlong chinese nationals at napatay ang apat na iba pang chinese nationals na hinihinalang may kaugnayan sa Mexican drug cartel na Sinaloa.

Ayon sa Pangulo, isa sa mga nasawi na nakilalang si Youhua Xu ay kabilang sa malalaking shabu importers sa bansa at miyembro ng transnational drug trafficking organization, kaya’t nagpapasalamat siya sa mga tauhan ng PNP, AFP, Customs at PDEA sa mga naturang operasyon.

Sinabi ng Pangulo na tiyak na sira ang bansa kung naikalat na sa buong Pilipinas ang mga nasabing droga.

Halos 98% na ang naipapamahaging ayuda sa mga residente ng Metro Manila na naapektuhan ng ECQ noong Agosto 6 hanggang 20.

Ayon kay DILG secretary Eduardo Año , mahigit 11 milyong beneficiary ang nakakuha na ng cash aid na sinimulang ipamahagi noong Agosto  11.

Sinabi ni Año na tinatayang 12 local government units sa NCR ang nakatapos na ng pamamahagi ng nasabing ayuda.

Samantala, nasa halos 82% nang tapos ng Laguna ang pamamahagi ng cash aid at mahigit 32% naman ang Bataan, matapos kapwa isailalim din sa ECQ kasabay ng Metro Manila.

Mahigit isang milyong doses na ng COVID-19 vaccine ang naiturok sa mga residente ng Taguig City hanggang kahapon, September 7.

Dahil dito, ipinabatid ni Taguig mayor Lino Cayetano na ika-apat na ang kanilang lungsod o sunod sa Quezon City, Maynila at Caloocan ang naka-1 million mark sa pagbabakuna kontra COVID-19 at target aniya nilang maiturok ang second dose sa 70% ng populasyon ng lungsod.

Kinilala ni Cayetano ang sakripisyo ng kada healthcare and essential worker sa lungsod matapos ang malaking ambag sa contact tracing, vaccination efforts at patuloy na pagpapatupad sa Taguig ng PDITR o  Prevent-Detect-Isolate-Treat-Reintegrate Strategy laban sa nasabing virus.

Tiniyak ni Cayetano sa mga residente ng lungsod ang pinaigting pang pagbabakuna para mailigtas ang lahat kontra COVID-19 , sa pamamagitan ng community-based vaccination sa Taguig mobile vaccination bus, mobile vaccination team at home service vaccination para sa mga bedridden citizens.

Tuluy-tuloy rin aniya ang pagbibigay ng Taguig City government nang mabilis, ligtas at accessible vaccination sa bawat residente ng lungsod.

Binanatan muli ng Pangulong Rodrigo Duterte ang Senate Blue Ribbon Committee sa pagdinig nito kaugnay sa multi-bilyong pisong halaga ng COVID-19 purchases ng gobyerno.

Muling binatikos ng Pangulo si committee chair Richard Gordon na  tinawag nitong “adversarial” o kalaban, kaya’t hindi aniya lalabas ang katotohanan sa Senado.

Ayon sa Pangulo, parehong judge at prosecutor ang papel ni Gordon sa nasabing pagdinig.

Binigyang-diin muli ng Pangulo na pamumolitika lamang ang pagdinig ng Senado.