Judith Estrada-Larino

Inalerto ng PNP ang mga tauhan nito sa hilagang Luzon dulot ng bagyong Kiko.

Ito ayon kay PNP Chief Police General Guillermo Eleazar ay habang hinihintay niya ang report ng mga pulis mula sa CALABARZON, Bicol at Eastern Visayas hinggil sa pinsalang dulot naman ng bagyong Jolina.

Sinabi ni Eleazar na kasasdo na ang dadalhin nilang tulong sa mga nasalanta ng kalamidad at maipaayos ang mga himpilan ng pulisyang napinsala rin ng bagyo.

Binilinan din ni Eleazar ang mga pulis sa mga lugar na tatamaan ng bagyong Kiko na patuloy na makipag-ugnayan sa kanilang lokalidad para maikasa agad ang mga tauhan at kagamitan partikular sa mga operasyong may kinalaman sa kalamidad. —sa ulat ni Jaymark Dagala (Patrol 9)

Pinagiingat ng UNICEF Philippines ang bansa sa planong pagbubukas ng face to face classes ngayong taon.

Ayon kay Isy Faingold, pinuno ng Education World ng UNICEF Philippines, dapat dahan dahanin at gawing voluntary ang pagbubukas ng klase bagamat ang Pilipinas na lamang at Venezuela sa buong mundo ang hindi pa nagbabalik sa face to face classes.

Sinabi ni Faingold na dapat kumuha ng idea ang Pilipinas sa ibang bansa kaugnay sa pagbabalik ng face to face classes sa mga ito.

Tinukoy ni Faingold ang Kuwait na nagbukas ng in person classes sa mahigit 1,000 eskuwelahan nito at piling grade levels lamang sa Bangladesh.

Uubra na ring magbalik sa face to face classes ang mga magaaral na naturukan na ng dalawang dose ng bakuna sa Saudi Arabia.

Posibleng lumakas pa at maging super typhoon ang bagyong Kiko na maaaring ang target ay Babuyan Islands o Cagayan.

Ayon ito sa PAGASA, base na rin sa galaw ng bagyong Kiko na malayo pa naman sa kalupaan ng bansa at nasa karagatan pa.

Sinabi ng PAGASA na posibleng dumaan ng Babuyan Islands o Cagayan ang bagyong Kiko bukas ng gabi o sabado ng umaga.

Sa paglabas ng bagyong Jolina at pagpasok naman ng bagyong Kiko, inihayag ng PAGASA na makakaapekto pa rin ang habagat o southwest monsoon ang MIMAROPA, Western Visayas at Zamboanga Peninsula.

Kinumpirma ng 4th Infantry Division (ID) ng Philippine Army ang pagkasawi ng apat na miyembro ng NPA matapos maka engkuwentro ng militar sa Barangay Mabuhay sa San Fernando, Bukidnon.

Sinabi ni Major Francisco Garello, tagapagsalita ng 4th ID na siyam na rebelde pa ang naaresto nila kabilang ang 12 anyos na batang mandirigma.

Ang nasabing engkuwentro ay nangyari matapos tumugon ang mga sundalo sa sumbong ng mga residente sa lugar na pangingikil at recruitment ng mga rebelde.

Pagdating ng mga sundalo ay sinalubong sila ng hindi bababa sa 20 rebelde dahilan ng engkuwentro na tumagal ng isang oras.

Kaagad namang nagsagawa ng hot pursuit operations ang militar sa lugar upang tugisin ang mga nalalabi pang rebelde na naiwan sa lugar. —sa ulat ni Jaymark Dagala (Patrol 9)

Ipinagpaliban muna ng NDRRMC ang itinakdang Simultaneous Nationwide Earthquake Drill ngayong araw na ito.

Ito ayon kay NDRRMC Spokesman Mark Timbal ay para tutukan muna ang epekto ng mga bagyong Jolina at Kiko.

Sinabi ni Timbal na malabong mangyari ang online earthquake drill dahil maraming lugar ang bagsak ang signal ng komunikasyon dulot ng bagyo.

Tiniyak ni Timbal na hindi nagpapabaya ang ahensya sa mga paghahanda para sa inaasahang “The Big One” o ang napakalakas na magnitude 7.2 na lindol na posibleng tumama sa Metro Manila at mga karatig lalawigan. —sa ulat ni Jaymark Dagala (Patrol 9)

Pinasisibak ng PNP-Internal Affairs Service (IAS) ang dalawang miyembro ng maritime group matapos masangkot sa pamamaril na ikinasawi ng mangingisdang si Kiel Kintanar sa Cabadbaran, Agusan Del Norte noong Hulyo.

Ayon kay PNP-IAS Inspector General Atty. Alfegar Triambulo, lumabas sa imbestigasyon na sinadya nila Police Senior Master Sergeant Rizal Torricer at Patrolman Ariel Jay Panes ang pamamaril sa bangkang pangisdang sinasakyan ng biktima.

Una nang pinatitigil ng dalawang pulis ang bangka nila kintanar sa gitna ng kanilang pagpapatrolya subalit sa halip na huminto ay humarurot pa ang bangka kaya’t hinabol ito ng mga pulis.

Gayunman, binigyang diin ni Triambulo na hindi warning shot ang ginawa ng mga pulis kundi pinaputukan mismo ang bangka at tinamaan si Kintanar. —sa ulat ni Jaymark Dagala (Patrol 9)

Pinabubuwag ni Senador Imee Marcos ang Procurement Service (PS) ng DBM at Philippine International Trading Corporation (PITC) matapos aniyang maging fertile breeding ground sa katiwalian at umabuso sa kanilang mandato.

Kasunod na rin ito nang paghahain ni Marcos ng mga panukalang batas para sa abolisyon ng mga nasabing tanggapan na aniya’y pinamumugaran lang ng katiwalian, sa gitna nang pagbusisi ng senado sa pagbili ng umano’y overpriced face mask at PPE ng PS DBM at PITC.

Sa Senate Bill 2388, ipinabubuwag ni Marcos ang PS DBM  na nilikha nung panahon ng kanyang amang si dating pangulong Ferdinand Marcos para bumili ng karaniwang office supplies tulad ng bond paper at printer na ibebenta naman sa government agencies.

Nakasaad naman sa Senate Bill number 2389 ang pagbuwag sa PITC na itinatag din nuong Marcos administration para mangasiwa sa pakikipagkalakalan sa mga socialist at centrally planned economy countries.

Subalit binigyang diin ni Marcos na ang PS DBM at PITC ay nagsilbi nang lipatan  ng pondo ng ibat ibang ahensya para magpabili ng kagamitan o kaya ay taguan ng pondo ng ibat ibang ahensya ng gobyerno para huwang maibalik sa national treasury. —sa ulat ni Cely Ortega Bueno (Patrol 19)

Humihingi ng dagdag na P30 bilyon na pondo para sa susunod na taon si Agriculture Secretary William Dar.

Sa budget hearing ng kamara, inihayag ni Dar na kulang ang P91 bilyon  na 2022 budget ng Department of Agriculture at ito aniya ay halos isang porsyento lamang na mas mataas sa budget nila ngayong taon.

Sinabi ni Dar na malaki ang maitutulong ng dagdag na pondo upang maikasa ang mga programa para sa mga magsasaka, mangingisda, consumer at iba pang stakeholders.

Binigyang diin ni Dar na nahaharap pa rin ang sektor ng agrikultura sa anito’y perfect storm dulot ng iba’ t ibang problema tulad ng COVID-19 pandemic. African Swine Fever maging ang epekto ng mga nakalipas na bagyo at pagputok ng bulkang Taal.

Sumirit pa sa mahigit dalawang milyon ang kumpirmadong kaso ng COVID-19 sa bansa.

Ito ayon sa DOH ay matapos maitala sa 12, 751 ang mga bagong kaso ng COVID-19 kaya’t pumapalo na sa 151,135 ang active cases kung saan 91.6 percent ang mild, 3.7% ang asymptomatic, 1.5 % ang severe at .7% ang critical condition.

Sumipa pa sa halos dalawang milyon na ang total recoveries kabilang ang 20, 151 na mga bagong gumaling sa COVID-19.

174 naman ang mga bagong nasawi sa COVID-19 kayat nasa mahigit  34K na ang death toll.

Inamin ng DOH na nagkaroon ng technical issues sa pagkuha ng updated dara mula sa COVID kaya system kaya’t mababa pa ang bilang ng mga bagong kaso.

Bawal ang lump sum sa kasalukuyang sistema ng paglalatag ng budget.

Ito ang idinahilan ni Budget OIC Tina Rose Marie Canda kaya’t walang  alokasyon ang gobyerno para sa ayuda sa mga lugar na isasailalim sa COVID lockdown sa susunod na taon bukod pa sa walang nakalaang budget para sa Special Risk Allowance ng mga healthcare worker.

Sa pagtatanong ni Senate President Pro Tempore Ralph Recto, sinabi ni Canda na gusto nilang maglaan ng pondo para sa pagbibigay ng ayuda subalit magiging lump sum ito.

Maaari aniya ang panukalang ipasok ang pang-ayuda sa contingency fund subalit lolobo naman ito at magiging usapin ang pagdepensa rito.

Ngayong taon, inihayag ni Canda na wala rin namang inilaan na pondo sa national budget para sa ayuda na hinuhugot lamang sa mga savings at natira sa unprogrammed funds.

Binigyang diin ni Recto na gagawan nila ng paraan na magkaroon ng alokasyon para sa SRA dahil napakaliit ng P3,000 hanggang P5,000 SRA kada buwan para sa healthcare workers na inilalagay sa peligro ang kanilang buhay.—ulat mula kay Cely Ortega-Bueno (Patrol 19)