Patay ang 10 katao sa sunog sa isang COVID-19 hospital sa bayan ng Tetovo sa North Macedonia.
Ayon kay Health Minister Venko Filipce, nangangamba silang tumaas pa ang death toll sa nasabing sunog dahil marami sa mga sugatan ay nasa malubhang kalagayan.
Hindi naman matiyak ng mga otoridad kung ilan ang mga pasyenteng nasa pagamutan nang maganap ang sunog.
Ibinaba na ang lahat ng public storm signal kaugnay ng bagyong Jolina.
Kasunod na rin ito nang inaasahang paglabas ng Philippine Area of Responsibility (PAR) ng bagyong Jolina mamayang gabi matapos pinakahuling mamataan ang sentro nito sa layong 240 kilometers kanluran ng Dagupan City sa Pangasinan.
Samantala, dahil sa bagyong Kiko, nasa public storm signal number 1 naman ang Cagayan kabilang ang Babuyan Islands, Northeastern portion ng Apayao at Isabela.
Ang sentro ng bagyong Kiko ay pinakahuling namataan sa layong 670 kilometers silangan ng Baler, Quezon taglay ang pinakamalakas na hanging umaabot sa 195 kilometers kada oras malapit sa gitna at may pagbugso na umaabot sa 240 kilometers kada oras.
Ipinabatid ng Pagasa na inaaasahang dadaan ang bagyong Kiko sa Timog at Kanlurang bahagi ng Batanes bukas ng gabi hanggang Sabado ng umaga kung kailan ito hihina at posibleng mag landfall sa mainland Cagayan at inaasahang dadaan din sa Babuyan Islands at Luzon Strait.
Scripted at smokescreen lamang para sa mas malaking agenda ang pahayag ni Mayor Sara Duterte Carpio na hindi siya tatakbo sa pagka Pangulo sa 2022 elections.
Ayon ito kay Ron Munsayac, Executive Director ng PDP Laban – Pacquiao Wing, dahil hindi naman sila ipinanganak kahapon at napanuod na nila ang ganitong script noong 2016 elections.
Sinabi ni Munsayac na minsan nang nabudol budol ang publiko matapos ihayag nuon ng Pangulong Rodrigo Duterte na hindi siya tatakbo sa pagka Pangulo subalit sa bandang huli ay nag substitute siya at naging Presidential candidate ng PDP Laban.
Una nang inihayag ni Mayor Sara na hindi siya tatakbo sa Presidential election dahil ang usapan nila ng kanyang ama ay isa lang sa kanila ang tatakbo sa mataas na posisyon sa gobyerno matapos tanggapin ng Pangulo ang pag endorso sa kanya ng PDP Laban Cusi Wing bilang Vice Presidential candidate sa 2022 elections.
Samantala, inihayag ni Munsayac na lumalakas ang suporta sa planong pagtakbo sa pagkapangulo ni Senador Manny Pacquiao kayat sa tingin nila ay maliit ang tsansang piliin nito ang opsyon na mag retiro na sa pulitika.
Pinasususpindi ng World Health Organization (WHO) hanggang sa katapusan ng taong ito ang plano ng ilang bansa na magturok ng ikatlong shot ng bakuna kontra COVID-19.
Ito ayon kay WHO Chief Tedros Adhanom Ghebreyesus ay para matiyak ang sapat na supply ng bakuna para sa developing countries o makapagpa bakuna kahit 40% lamang ng populasyon nito.
Ipinabatid ni Tedros na bagamat 5.5-B doses ng COVID-19 vaccine ang naiturok na sa buong mundo, 80% nito ay napunta sa high at upper middle income countries.
Una nang hiniling ng WHO Chief sa mga bansa na ipagpaliban hanggang buwang ito ang planong pag kunsider sa ikatlong COVID-19 shot.
Isa na lang ang binabantayang kaso ng COVID-19 sa Batanes.
Ito ayon kay Dr. Allan Sande, Provincial Health Officer ng Bataan ay tinatawag nilang breakthrough infection sa isang senior citizen na kaagad nilang ipinasok sa isolation facility at ginamot ang ubo nito.
Sinabi ni Sande na umaayos na rin ang kalagayan ng nasabing 71 taong gulang na pasyente na residente ng Itbayat at dumating sa lalawigan noong Setyembre 1.
Iiklian ng Cebu Provicial Government ang quarantine period para sa mga OFW na uuwi sa lalawigan.
Gayunman, ipinabatid ni Cebu Governor Gwendolyn Garcia na kailangang fully vaccinated ang returning OFW para sumailalim sa bagong lima mula sa pitong araw na quarantine period.
Sinabi ni Garcia na kailangan pa ring sumailalim sa RT PCR test ang returning OFW matapos ang quarantine period at papayagan lamang umuwi sa kani kanilang pamilya kung magne negatibo sa swab test.
Nananatiling pinakamayaman sa Pilipinas sa taong ito ang magkakapatid na Sy.
Batay ito sa report ng Forbes Magazine hinggil sa limampung pinakamayaman sa Pilipinas kung saan lumago ng halos 30% o nasa hanggang $79-B ang nadagdag sa kita ng mga ito sa taong ito.
Ayon sa Forbes, nadagdagan ng $2.7-B ang kayamanan ng magkakapatid na Sy na ngayo’y nasa $16.6-B na sinundan ni Property Tycoon Manuel Villar Jr. na nasa $6.7-B na ang net worth at ikatlo si Ports and Casino Tycoon Enrique Razon na nasa $5.8-B na ang kasalukuyang net worth.
Pasok din sa Philippine Richest List ng Forbes sina:
4.Lance Gokongwei at mga kapatid – $4-B
5.Jaime Zobel De Ayala – $3.3-B
6.Dennis Anthony at Maria Grace Uy – $2.8-B
7.Tony Tan Caktiong – $2.7-B
8.Andrew Tan – $2.6-B
9.Ramon Ang – $2.3-B
10.Ty Siblings – $2.2-B
Bukod pa ito kina: Hartono Kweefanus, Lucio Tan, Isidro Consunji and siblings, Lucio and Susan Co, Vivian Que Azcona and siblings, Ricardo Po Sr., Soledad Oppen-Cojuangco, Betty Ang, William Belo at Mercedes Gotianum.
Kabilang sa mga pinagbasehan ng listahan ang shareholding at financial information mula sa mga indibidwal at pamilya, stock exchanges, analysts at iba pa at ang net worth ay kinuwenta base sa stock prices at exchange rates kung kailan nagsawa ang merkado noong Agosto 20.
Nagdulot ng matinding kalituhan at pagkadismaya sa publiko at mga negosyo ang pabago-bagong pahayag ng gobyerno sa ipatutupad na quarantine restrictions.
Binigyang diin ito ni Senador Grace Poe matapos bawiin ng Malacañang ang naunang anunsyo na pagsasailalim sa General Community Quarantine (GCQ) ng Metro Manila simula Setyembre 8 hanggang 30 at pagpapa-pilot ng tinatawag na granular o localized lockdown sa harap ng tumataas pa ring kaso ng COVID-19.
Sinabi ni Poe na nakasalalay sa ipinatutupad na quarantine restrictions ang mga aktibidad, business plans, kalusugan at kaligtasan ng publiko.
Bilang isa ang Pilipinas sa mga bansa sa mundo na may pinakamatagal ng lockdown, inihayag ni Poe na umaasa ang mga Pilipino na mayroong plantsadong guidelines ang pamahalaaan sa dami na ng mga naipatupad na community quarantine restrictions.
Una nang binatikos ng grupo ng mga negosyante ang biglang pagbawi ng Malacañang sa pagsasailalim sa Metro Manila sa GCQ dahil sa malaki daw ang epekyo o pinsala nito sa operasyon ng kanilang negosyo. —sa ulat ni Cely Ortega Bueno (Patrol 19)
Hindi na papalaot sa 2022 Presidential Elections si Davao City Mayor Sara Duterte-Carpio.
Ito ayon kay Mayor Sara ay matapos tanggapin ng amang si Pangulong Rodrigo Duterte ang vice president nomination ng PDP Laban.
Binigyang diin ng Presidential Daughter na nagkasundo na sila ng Ama na isa lamang sa kanila ang tatakbo sa National Elections.
Wala naman din aniyang epekto sa kaniyang plano sa pulitika ang desisyon ng amang tumakbo sa pagka bise presidente ng bansa bagamat patuloy ang pasalamat niya sa kanyang supporters sa tiwala sa kanya.
Inalerto ng Bangko Sentral ng Pilipinas (BSP) ang publiko kaugnay sa kumakalat na pekeng P1,000 bill.
Sa gitna na rin ito ng imbestigasyon ng BSP sa report sa social media at messaging apps ng mga pekeng P1,000 perang papel.
Pinayuhan ng BSP ang publiko na gamitin ang feel look tilt methods para i-check ang security features ng mahahawakang P1,000 bill.
Umapela rin ang BSP sa publiko na kaagad isumbong sa kanilang payments and currency investigation group sa e-mail na currencyinvestigation@bsp.gov.ph o maging sa mga otoridad ang anuman o sinumang sangkot sa pamemeke ng pera.