Judith Estrada-Larino

Umalma ang ilang kongresista sa pagtatalaga kay Lt. General Antonio Parlade, Jr. bilang Deputy Director General ng National Security Council.

Sinabi ni ACT teachers partylist representative France Castro na tiyak na mas marami pang indibidwal at grupo ang isasangkot sa insurgency dahil kilalang king of red taggers at terrorist taggers si Parlade.

Ayon pa kay Castro, magagamit din ang puwesto ni Parlade sa eleksyon para makapag tag pa ng mas maraming aktibista at mga kritiko ng administrasyong Duterte.

Kasabay nito, binatikos ni Castro ang nakasanayan na ng Pangulong Rodrigo Duterte sa pag-recycle at pag-reuse ng mga opisyal tulad ni Parlade na aniya’y mayroong bad track record.

Naniniwala ang mga kaalyado ni Davao City Mayor Sara Duterte-Carpio sa Hugpong Ng Pagbabago (HNP) na magbabago pa ang pasya nito bago ang itinakdang paghahain ng Certificate of Candicacy para sa 2022 National Elections.

Ayon kay Davao Occidental governor Claude Bautista, marami pa ang posibleng mangyari bago ang deadline ng filing ng COC.

Binigyang-diin ni Bautista na tanging si Mayor Sara lamang ang makakapagpatuloy ng mga nasimulan ng amang si Pangulong Rodrigo Duterte.

Samantala, ipinabatid naman ni Mayor Christina Frasco ng Liloan, Cebu at spokesperson ni Mayor Sara na posibleng tumakbo muling alkalde ang Presidential Daughter.

Iginiit ng CHED ang pagsasagawa ng face-to-face classes sa mga eskuwelahang mayroong health allied programs at iba pang kurso sa mga lugar na nasa MGCQ.

Sinabi ni CHED chairman Prospero De Vera na naghihintay rin sila ng pasya ng Pangulong Rodrigo Duterte matapos na iendorso ng IATF ang pagbabalik ng face-to-face classes ngayong pasukan.

Ayon kay De Vera, isinama nila sa mga kursong dapat magkaroon na rin ng face-to-face classes ang Engineering, Hospitality/Hotel and Restaurant Management, Tourism and Travel Management, Marine Engineering at Marine Transportation.

Kasabay nito, ipinabatid ni De Vera na mula Hulyo 2021, mahigit 13,000 estudyante na ang sumailalim sa limited classes habang nasa 1K faculty members ang nagsagawa ng limited classes sa halos 120 higher education institutions sa bansa.

Ibinunyag ni Senador Panfilo Lacson ang intensyon ng isang posibleng testigo sa hinihinalang overpriced medical supplies na makiisa sa imbestigasyon ng senado.

Ito ayon kay Lacson ay bagamat hindi pa niya nakakausap ang nasabing testigo na mabubulgar sa pagkakasangkot ng ilang opisyal ng procurement service ng DBM at DOH gayundin ang kaugnayan ng mga ito sa pharmally pharmaceutical corporation na syang binilhan ng umano’y overpriced pandemic supplies.

Sinabi ni Lacson na sa pagpapatuloy ng imbestigasyon ng senado ngayong araw na ito ipakikita nya ang timeline na susuporta sa naging pahayag ni Senate Minority Leader Franklin Drilon na premeditated plunder o planado ang pandarambong sa pandemic funds.

Isa na rito aniya ang pagtatalaga kay dating Budget Undersecretary Lloyd Christopher Lao sa PS DBM at ang umanoy pag apply nito sa civil service commission para ire classify ang mga empleyado ng PS DBM bilang confidential employees na mabuti na lamang aniya ay hindi naaprubahan.

Samantala, binigyang diin ni Lacson may mga hinala ng tangkang cover up sa isyu dahil sa paggigit ng Pangulo na dapat nang itigil ang nasabing senate investigation.

Umakyat na sa tatlo ang patay dahil sa bagyong Jolina.

Gayunman, ayon sa NDRMMC, isa pa lamang na nasawi mula sa Marinduque ang kumpirmado habang bini-verify pa ang dalawa mula sa Naro, Masbate na pawang mga mangingisda habang apat naman ang naitalang sugatan.

Samantala, batay sa pinakahuling datos ng NDRRMC pumalo na sa halos 21,000 pamilya o katumbas ng mahigit 83,000 indibidwal ang apektado ng  kalamidad.

Nasa 31 naman ang naitalang nawawala mula sa Naro, Masbate, Catbalogan, Samar, Masbate at Culuba, Biliran.

Kinumpirma ng Malakanyang ang pagtatalaga ng Pangulong Rodrigo Duterte sa appointment ni dating AFP Southern Luzon Command Chief Liutenant General Antonio Parlade Jr. bilang Deputy Director General ng National Security Council.

Binigyang diin ni Presidential Spokesperson Harry Roque na naging tapat sa kanyang tungkulin sa pagsisilbing sa AFP si Parlade.

Dahil dito, sinabi ni Roque na tiwala ang Malakanyang na malaki ang maitutulong ng mahabang taong panunungkulan ni Parlade sa AFP sa pagbuo ng mga plano at polisiya para sa national security.

Umaasa aniya silang maayos na magagampanan ni Parlade ang tungkuling iniatang sa kanya ng chief executive.

Halos sabay-sabay na nagbitiw sa tungkulin ang labing isang boluntaryong doktor ng DOH na nakatalaga Sa Philippine General Hospital.

Ayon kay PGH Spokesperson Dr. Jonas Del Rosario, ang mga nasabing duktor na nakatalaga sa COVID-19 ward ng nasabing pagamutan ay hindi pa niya nakakausap kaya’t wala pa siyang idea kung bakit nagbitiw ang mga ito.

Gayunman, ilan aniya sa mga nakikita niyang posibleng dahilan ay pagod  dahil na rin sa dami ng trabaho sa PGH lalo pat malubha ang kondisyon ng mga pasyenteng naka confine rito gayundin ang sahod.

Aminado si Del Rosario na malaking kawalan ang mga umalis na duktor subalit marami pa naman silang mga duktor na maaaring hugutin sa ibang departmento para makatuwang nila sa pag gamot sa COVID-19 patients.

Inihayag pa ni Del Rosario na ilang nurse na rin ang una nang nag-resign samantalang ang iba naman ay nakatakdang na ring magretiro.

Mahigit 80% o 80.2% ng mga estudyante nuong nakalipas na school year ang opisyal nang nakapag enrol sa taong ito.

Ayon ito sa Department of Education kung saan nasa mahigit 15 million students ang nagpa rehistro sa public schools, mahigit 1 million sa private schools at halos 24,000 sa State Universities and colleges samantalang nasa halos 4.6 million students ang nakapagpatala sa early registration.

Sinabi ng DepEd na pinakamalaking bilang ng mga nag enrol ay mula sa Calabarzon na nasa halos tatlong milyon, sumunod ang Central Luzon na nasa mahigit dalawang milyong at NCR o nasa halos dalawang milyon.

Ipinabatid ng DepEd na nasa mahigit 184,000 ang nag enrol sa ilalim ng ALS o alternative learning system.

Posibleng muling umakyat ng boxing ring sa Disyembre si Senador Manny Pacquiao.

Ayon ito sa Team Pacquiao matapos matalo kay Yordenis Ugas nitong August 22 sa Amerika.

Hindi naman tinukoy ng Team Pacquiao kung sino ang posibleng makaharap ng pambansang kamao sa kaniyang laban sa Disyembre.