Judith Estrada-Larino

Nakatikim ng panunumbat mula sa health workers si presidential spokesman Harry Roque matapos nitong kastiguhin ang isang grupo ng mga doktor na nagbabala sa posibleng pagsirit pa ng COVID-19 cases kapag niluwagan ang restrictions.

Sinabihan ni Dr. Leni Jara ng Shape Up to Defeat COVID-19 group si Roque na tumigil na dahil sumosobra na ito sa pambabastos sa mga nagtatrabaho at aniya’y nagliligtas ng mga pasyente.

Pinagso-sorry rin ni Jara si Roque sa mga doktor dahil hindi aniya katanggap-tanggap ang pagiging stress nito para magsalita laban sa health professionals.

Kinontra ng ECOP Employers Confederation of the Philippines ang panukalang bigyan ng mas maluwag na restrictions ang mga fully vaccinated.

Ayon kay Sergio Ortiz-Luis, pangulo ng ECOP, malinaw na discriminatory ang panukalang tanging ang mga bakunado lamang ang payagang makalabas ng bahay bagama’t pabor naman silang mabigyan ng insentibo o benepisyo ang mga nabakunahan na.

Sinabi ni Luis na hindi dapat magkaroon ng diskriminasyon at dapat payagang magtrabaho lalo na kung APOR lalo pa’t hindi naman mabibigyan ng ayuda ng gobyerno sakaling hindi magtrabaho kapag nagpatupad ng lockdown.

Dalawang quarantine classification lamang ang ipatutupad ng gobyerno sa ikinakakasang alert level system para sa COVID-19 response sa NCR.

Ito ayon kay presidential spokesman Harry Roque ay matapos aprubahan “provisionally” ng IATF ang mga panuntunan para sa implementasyon ng alert level system para sa COVID-19 response.

Sinabi ni Roque na batay sa gagawing policy shift, ECQ at GCQ lamang ang quarantine classification at ang pupuwede at hindi pupuwede ay nakadepende sa alert level na nakapataw sa lugar sa loob mismo ng Metro Manila.

Inihayag ni Roque na sa ilalim ng alert level 4 o high risk classification, bawal ang dine-in, personal services at mass gatherings samantalang isinasailalim pa ng IATF ang mga aktibidad na uubra sa alert level 4.

Binigyang-diin ni roque na lahat ng lugar ay magpapatupad ng granular lockdowns, batay sa IATF guidelines.

Ang apor aniya ay limitado lamang sa health workers at professionals, kaya’t ang mga government officials at employees na nakatira sa mga lugar na nasa ilalim ng localized lockdowns ay hindi papayagang lumabas ng kanilang mga bahay.

Tumanggap ang Pilipinas ng dagdag na 11.3 million dollars mula sa Estados Unidos bilang tulong sa COVID-19 response ng pamahalaan.

Sa abiso ng US embassy na ipinadaan sa Department of National Defense, ang nasabing dagdag tulong ay ibinigay ng US government sa pamamagitan ng US aid United States Agency for International Development.

Sinabi ng US embassy na ang nasabing pondo ay suporta ng Amerika sa patuloy na bakunahan sa Pilipinas at iba pang hakbangin para matukoy, tugunan at gamutin ang mga kaso ng COVID-19 sa bansa.

Una nang nagbigay ng 39 million dollars ang Amerika sa Pilipinas para sa COVID-19 response, simula nang maideklara ang pandemya noong isang taon.

Sa kasalukuyan ay nasa mahigit 6 milyong doses ng bakuna na  ang naibigay ng Amerika sa Pilipinas bukod pa sa tulong nito sa 44K healthcare workers at 800 ospital at klinika sa bansa sa pamamagitan ng mga gamot, PPEs, hygine kits at iba pa.—mula sa ulat ni Jaymark Dagala (Patrol 9)

Nag-sorry na si Presidential Spokesman Harry Roque sa dalawang doktor sa napagtaasan niya ng boses sa isang pulong ng IATF.

Ayon kay Roque, naging emotional lamang siya sa naging paggigiit ng ilang doktor na magpatupad muli ng hard lockdown sa gitna na rin nang patuloy na pagsirit ng kaso ng COVID-19.

Binigyang-diin ni Roque na maraming mawawalan ng trabaho at magugutom kapag nagpatupad muli ng lockdown.

Maaaring balansehin na lamang ang sitwasyon lalo pa’t halos kalahati ng mga taga-Metro Manila ay nabakunahan na.

Sinabi ni Roque na ang hindi niya pag-sang ayon ay hindi naman pagpapakita ng kawalang concern kundi nakikiusap sila sa lahat dahil ang mga desisyon ng gobyerno ay hindi lamang kapritso.

Pumapalo sa 808 kilos o katumbas ng P5.5-B na halaga ng shabu ang nasabat ng awtoridad sa loob lamang ng isang linggo.

Ipinagmalaki ito ng PNP matapos masabat ang 229 kilo ng shabu na nagkakahalaga ng mahigit P1.5-B sa magkasunod na operasyon sa Imus City at Bacoor sa Cavite.

Ayon kay PNP chief P/Gen. Guillermo Eleazar, ang mga nasabat na droga ay bahagi ng bigtime operation sa Zambales na sinundan pa sa Bataan noong Setyembre 7.

Dalawa ang napatay habang dalawa rin ang naaresto sa mga naturang operasyon kabilang na ang nasawing si Basher Bangon na may direktang kaugnayan sa international drug syndicate na nag-o-operate sa Visayas at Mindanao

Binigyang-diin ni Eleazar na ang operasyon ay patunay na hindi natitinag ang awtoridad para lagasin ang mga nasa likod ng kalakalan ng ilegal na droga sa bansa sa gitna ng COVID-19 pandemic.—sa ulat ni Jaymark Dagala (Patrol 9)

Pinaigting pa ng AFP ang kampanya nito kontra loose firearms habang papalapit na ang halalan.

Kasunod na rin ito nang matagumpay na pagkakasabat ng awtoridad sa matataas na kalibre ng armas at mga bala sa dalawang operasyon sa Quezon City at Sta. Maria, Bulacan noong Setyembre 8.

Sa pagsalakay sa isang bodega sa Quezon City, anim ang naaresto at nasabat din ang limang libong piraso ng mga bala at iba pang personal na kagamitan ng mga suspek.

Samantala, nasabat naman sa Sta. Maria, Bulacan ang iba’t ibang matataas na kalibre ng armas tulad ng reassembled caliber 5.56 rifle, iba’t ibang bala at mga armas na handa para sa re-assembly.

Ayon kay AFP chief of Staff Lt./Gen. Jose Faustino Jr., malaking bagay ang pagkakasabat sa mga nasabing armas para mapilay ang operasyon ng mga lokal na terorista tulad ng CPP-NPA-NDF gayundin ang iba pang private armed group sa bansa.–-mula sa ulat ni Jaymark Dagala (Patrol 9)

Hindi kasama sa 2022 budget ng COMELEC ang pondo para sa mga magsisilbi sa National Elections sa susunod na taon.

Ipinabatid ito ni COMELEC chairman Sheriff Abas sa pagdinig ng Kamara hinggil sa budget ng komisyon.

Dahil dito, muling umapela si ACT teachers party list representative France Castro na bigyan ng hazard pay ang mga tatayong  Board of Election Inspectors sa darating na eleksyon.

Iginiit din ni Castro ang pagbibigay ng service credits para sa mga BEI na ayon naman kay Abas ay inihihirit din ng pondo, bagama’t ang minimum na maibibigay nila ay 5 libong piso.

Nasabat ng mga awtoridad ang tinatayang P331-M na halaga ng hinihinalang shabu sa isang operasyon sa Imus City sa Cavite.

Natimbog din sa nasabing operasyon ang isang mag-asawa na nagsabing hindi nila alam na ang laman ng mga nakuhang kahon ay naglalaman ng illegal drugs.

Iniwan lamang anila sa kanila ang mga nasabing kahon ng dalawang contact nila mula sa isang vehicle rental service company.

Gayunman, sinabi ng PDEA na ang mag-asawa ay under surveillance na nila nitong mga nakalipas na buwan.