Judith Estrada-Larino

Patay ang 87 taong gulang na lola matapos hindi makalabas sa nasusunog nitong bahay sa Valenzuela compound sa Paranaque City.

Kinilala ang biktima na si Lolita “Lily” Matadling, na ayon sa kanyang apo ay bedridden na at naiwan sa ikalawang palapag ng nasabing bahay.

Inaresto naman ng mga tauhan ng barangay ang apo ng biktima dahil sa umano’y paulit ulit na pagbabantang susunugin ang kanilang compound.

Ipinabatid ng BFP na inabot ng ikalawang alarma ang nasabing sunog na tuluyang naapula matapos ang dalawang oras.

Halos 20 kabahayan ang natupok ng apoy 50 pamilya ang naapektuhan ng nasabing sunog na inaalam pa ang pinagmulan.

Siyam na beses na mas mataas ang kontrata ng DOH sa Pharmally Pharmaceutical Corporation para sa medical supplies, kaysa budget ng Office of the Vice President (OVP) ngayong taon

Ayon kay Vice President Leni  Robredo, nasa halos P909-M lamang ang budget ng OVP na ginagamit pa nito sa COVID-19 response kumpara sa halos P9-B na kontrata ng DOH at Pharmally.

Sinabi ni Robredo na nakakagulat ang halaga ng nasabing kontrata na sobrang laki at pauna pa lamang ito dahil may dagdag pang lampas.

Binatikos ni Robredo ang pagbili ng mga naturang medical supplies at tila lumala pa ang mga alegasyon ng katiwalian ngayong pandemic.

Binakbakan ni Vice President Leni Robredo si Presidential Spokesman Harry Roque.

Sinabihan ni Robredo si Roque na wala itong karapatang i-bully ang medical frontliners na aniya’y nagbubuwis ng kanilang buhay para sagipin ang mga may sakit ng COVID-19.

Hindi aniya deserve ng mga doktor ang pag trato ni Roque sa kanila dahil marami na rin sa mga ito ang nawalan ng kasamahan dahil sa COVID-19.

Ayon kay Robredo, itinatag ang IATF para pakinggan ang concerns ng lahat ng sektor at kung hindi sang ayon si Roque, puwede namang sabihin ng maayos at hindi kailangang mambastos dahil ang mga opisyal ng gobyerno na tulad niya ay para katawanin ang taumbayan.

Binigyang diin ni Robredo na may karapatan ang medical frontliners na ilabas ang mga hinaing nito dahil kinatawan naman sila ng kanilang sektor.

Napanatili ng bagyong Kiko ang lakas nito habang kumikilos patungo sa karagatan, silangan ng Northern Taiwan.

Ang sentro ng bagyong Kiko ay pinakahuling namataan sa layong 395km. hilaga ng Itbayat, Batanes.

Taglay ng bagyong Kiko ang pinakamalakas na hanging umaabot sa 175km/hr sa gitna at may pagbugso na umaabot sa 215km/hr.

Ang bagyong Kiko ay kumikilos pa hilaga hilagang kanluran sa bilis na 20km/hr.

Inalis na ang iba pang storm signal dulot ng bagyong Kiko bagamat nasa Signal number 1 ang lalawigan ng Batanes.

Ang bagyong Kiko ay inaasahang lalabas ng Philippine Area of Responsibility (PAR) ngayong hapon.

Halos 3,000 pamilya katumbas ang mahigit 11,000 indibidwal ang naapektuhan ng bagyong Kiko.

Ayon ito sa NDRRMC na nagsabing ang mga apektadong indibidwal ay mula sa 97 barangay sa Regions 1, 2, 3 at Cordillera Administrative Region (CAR).

Nananatili sa evacuation centers ang mahigit 1,000 indibidwal at halos 2,000 naman ang nasa labas ng evacuation centers.

Apat na landslides ang naitrala sa Region 1 partikular sa Aringay, Burgos at San Fernando sa La Union samantalang 19 na lugar ang binaha sa mga bayan ng Macabebe, San Simon at Candaba sa Pampanga.

Hindi naman madaanan ang tatlong lansangan sa Region 2, dalawa sa Region 3 at isa sa CAR samantalang hindi pa naibabalik ang supply ng kuryente sa limang lungsod at  munisipalidad sa Batanes at Apayao.

Lumobo na ang bilang ng mga nababakunahang senior citizens.

Paniniwala ito ni Senior Citizens Partylist Representative Rodolfo Ompong Ordanes kaugnay nang pagdiriwang ng grandparents day ngayong araw na ito.

Sinabi ni Ordanes na umaapela siya sa IATF at National Task Force Against COVID-19 na dagdagan pa ang supply ng bakuna para maturukan na ang lahat ng lolo at lola sa bansa.

Nasa mahigit 7-M lolo at lola na sa bansa ang nabakunahan kung saan mahigit 4-M dito ang fully vaccinated.

Umakyat pa sa 1.42 ang reproduction rate ng COVID-19 sa NCR kung saan sumirit din sa 19%  ang bilang ng kaso ng virus.

Ipinabatid ito ni Prof Guido David, fellow ng OCTA Research Group matapos ihayag na nasa halos 9,000 ang daily average ng COVID 19 cases sa Metro Manila.

Nangunguna ang Metro Manila sa nakapagtala ng pinakamataas na bagong kaso ng COVID-19 na nasa 9,061 na ayon kay David ay seryoso at maituturing na record.

Sinabi ni David na kabilang sa sampung lugar na nakapagtala ng pinakamataas na bagong kaso ng COVID-19 kahapon, Setyembre 11 ang Quezon City – 1449, Maynila – 892, Caloocan City – 869, Pasig City – 748, Taguig City – 642, Paranaque City – 547, Makati City – 534, Valenzuela City – 439, Davao City – 409 at Iloilo City – 402.

Kasabay nito, ipinakita ni David ang Average Daily Attack Rate (ADAR) ng ilang asian countries hanggang Setyembre 10, base sa data ng John Hopkins University kung ang Pilipinas ay may orange mark na nangangahulugang nasa high risk ito sa 19,986 new cases.

Tila nalilito ang mga senador at pilit iniuugnay ang pakikipagpulong ni Dating Presidential Economic Adviser Michael Yang sa Pangulong Rodrigo Duterre noong 2017 sa biniling medical supply noong 2020.

Ayon ito kay Atty. Raymund Fortun, abogado ni Yang matapos ipakita ni Senador Richard Gordon ang litrato nina Yang at Pangulong Duterte na nakikipagpulong sa mga opisyal ng Pharmally Pharmaceutical Corporation na idinadawit sa pagbili ng umanoy overpriced medical supplies.

Subalit sinabi ni Fortun na si Yang ay nakikipag pulong sa Pharmally Biological Incorporated noong 2017 at iba sa 2020 Pandemic Supply Procurement.

Kasabay nito, tiniyak ni Fortun na makikipag tulungan si Yang sa senado at sa katunayan ay dadalo ito sa pagpapatuloy ng senate hearing bukas, Lunes, Setyembre 13.