Judith Estrada-Larino

Walo katao ang sugatan sa pagsabog ng hinihinalang improvised explosive device sa Datu Piang, Maguindanao.

Ayon kay Datu Piang Mayor Victor Samama, ang mga biktima ay kaagad isinugod sa ABPI-Samama Clinic and Hospital sa nasabing pagsabog sa town plaza ng Datu Piang kung saan isinasagawa ang isang volleyball tournament.

Isa sa mga biktima ay inilipat sa Cotabato Regional and Medical Center sa Cotabato City dahil sa matinding tama ng sharpnel.

Sinabi ni Samama na hindi naicoordinate sa mga otoridad ang nasabing volleybal tournament na lumabag din sa quarantine restrictions.

Nag alala si Samama matapos malamang nakatanggap ng banta ang grupo na binubuo ng LGBT members, bago ang mismong tournament.

Maging alerto at mahigpit na sumunod sa health protocols.

Ito ang paalala ni Health Undersecretary Maria Rosario Vergeire sa mga COVID-19 survivors dahil maaaari pa ring mahawahan ng virus kahit pa naka recover na sa sakit.

Hinimok ni Vergeire ang mga COVID-19 survivors na magpabakuna na bilang dagdag proteksyon.

Batay sa pinakahuling datos ng DOH, mahigit 2-M na ang nakaka recover sa COVID-19.

Sumakabilang buhay na si dating DSWD Secretary Dinky Soliman.

Ayon kay Atty. Hector Soliman, asawa ng kalihim kaninang pasado ala-7 ng umaga pumanaw ang may bahay niya dahil sa kumplikasyon sa renal at heart failure.

Ang 68 taong gulang na dating DSWD Secretary ay nagka COVID nuong isang buwan gayundin ang asawa at ilang miyembro ng kanilang pamilya subalit naka survive ito.

Sinabi ni Atty. Soliman na kaagad nilang iaanunsyo ang mga detalye ng burol at libing ng dating DSWD Secretary.

Suportado ni Senador Panfilo Lacson si Senate Blue Ribbon Committee Chair Richard Gordon sa pangunguna sa imbestigasyon hinggil sa umano’y overpriced medical supplies.

Sinabi sa DWIZ ni Lacson na ginagawa lamang ni Gordon at iba pang senador ang kanilang trabaho.

Makatuwiran lamang din aniya ang pagsagot ni Gordon sa mga personal na batikos dito sa pagpapatakbo ng pagdinig ng Blue Ribbon Committee

Gayunman, binigyang diin ni Lacson na hindi naman sila dapat makisali sa palitan ng salita nina Gordon at Pangulong Rodrigo Duterte. —sa ulat ni Cely Ortega Bueno (Patrol 19)

Hindi pa expired o halos pa expire ang RT-PCR test kits na binili ng DOH.

Sa katunayan, ipinabatid ni Health Secretary Francisco Duque III na ang P600-M na halaga ng RT-PCR test kits na binili nila ay mag-e-expire sa susunod pang anim na buwan.

Iginiit ng DOH na ang standard shelf life ng test kits ay anim na buwan.

Target ng One Hospital Command Center na maipasok ang emergency patients sa mga ospital ng walang isang oras.

Gayunman, ipinabatid ni Dr. Bernadette Velasco, operations manager of One Hospital Command Center na dahil sa kakulangan ng hospital beds, inaabot ng apat hanggang anim na oras para bago sila makakuha ng ospital para sa emergency patients.

Napakahirap talaga aniyang mag-endorse ng cases dahil punuan na ang mga ospital bukod sa kailangan pa nilang kumuha o makapag-book ng ambulansya na kukuha sa pasyente.

Ipagkakaloob pa rin ng gobyerno ang P100,000 cash gift sa sumakabilang buhay na centenarian.

Ayon kay DSWD Assistant Secretary Glenda Relova, kaagad namang makukuha ng kaanak ni Lola Eugenia ang cash gift nito basta’t maisumite ang lahat ng requirements base sa Centenarians Act of 2016.

Nakalulungkot aniyang hindi na napakinabangan ni Lola Eugenia ang kanyang cash gift, bagama’t hindi ito kabilang sa 952 centenarians na nakalistang dapat tumanggap ng P100,000.

Hihilingin ng Kamara sa Malakanyang na i-certify bilang urgent ang panukalang 2022 National Budget.

Ito ayon kay House Appropriations Committee Chair Eric Yap ay para maipasa na ang panukalang 2022 National Budget sa third and final reading.

Ipinabatid ni Yap na sisimulan na ng Kamara sa susunod na linggo ang plenary deliberations ng panukalang 2022 budget kung saan ikokonsider ang mga amyenda rito.