Judith Estrada-Larino

Posibleng naabot na ng Pilipinas ang peak ng pagsirit ng COVID-19 cases.

Ito ayon sa OCTA Research Group ay matapos makapagtala ang Pilipinas ng weekley negative growth rate sa unang pagkakataon mula nuong Mayo.

Sinabi ni Dr. Guido David, fellow ng OCTA Research na ang reproduction rate ng COVID-19 sa bansa ay nasa 1.16% at 1.18% naman sa Metro Manila.

Nakapagtala rin aniya ng negative growth rate bukod sa Metro Manila ang mga lalawigan ng Cavite, Laguna at Bulacan.

Taliwas naman ito sa assessment ng DOH na nagsabing wala pang nakikitang senyales nang pagbaba ng kaso ng COVID-19 lalo pat nasa 64 na lugar pa ang nakapagtala ng pinakamataas na alert level 4.

Patuloy na umaapela si Vice President Leni Robredo sa Comelec para i-extend ang registration ng mga botante para sa 2022 national elections.

Ayon kay Robredo, naiintindihan naman niya ang pagtatakda ng deadline subalit dapat ay ikunsider ng Comelec na nahaharap ang bansa sa extra ordinary situation dahil sa pandemya na maaaring nakaapekto sa mga nais pa sanang magpa rehistro.

Mas marami pa aniyang botante ang makapagpapa rehistro kung i-eextend ang registration na una nang ibinasura ng Comelec at sa halip ay pinalawig na lamang ang oras ng registration at nagbukas sa mga mall ng registration areas.

Inaasahang madadagdagan pa ang fully vaccinated Pinoys sa pagdating ng panibagong supply ng Sputnik V vaccines na dumating kagabi.

Ito ayon kay Vaccine Czar Carlito Galvez, Jr. ay dahil ang halos 200,000 doses ng Sputnik V ay nakalaan para sa mga tuturukan ng second dose.

Ipapamahagi aniya ang nasabing Sputnik V vaccines sa Metro Manila, Bohol, Isabela, Region 3 at Region 4A kabilang ang Bacoor City sa Cavite.

Tiwala ang mga kaanak ng mga nasawi sa drug war campaign ng gobyerno na makakakuha sila ng hustisya.

Sa pamamagitan ito ng imbestigasyon ng International Criminal Court (ICC).

Ayon sa mga kaanak ng mga biktima, nabuhayan sila ng loob dahil nabigyang pansin ang kaso ng mga napaslang sa drug war campaign kayat umaasa sila ng hustisya at mapanagot ang mga may sala.

Mahigit 18 milyon Pinoy na o 18.2 milyon ang fully vaccinated.

Ayon ito kay Health Undersecretary Myrna Cabotaje na nagsabing nasa halos 41 million doses na ng ibat ibang COVID-19 vaccines ang naiturok na sa mga Pilipino simula nang ikasa ang National Inoculation Program nuong March 1.

Kasabay nito, sinabi ni Cabotaje na mahigit 59 million doses ng COVID-19 vaccine na ang napapasakamay ng bansa.

Nasagip ng Philippine Navy ang apat na mangingisdang dalawang araw na na-stranded sa karagatang sakop ng Mariveles, Bataan.

Ayon sa Navy, nagpalutang lutang sa karagatan ang mga nasabing mangingisda matapos masira ang makina ng sinasakyang fishing boat.

Nakilala ang mga nasagip na mangingisda na sina Joshua Matugas, Rainiel Castillo, John Rollie Soliman at Roger Valencia.

Mahigit 100 lugar na ang nasa ilalim ng granular lockdown sa National Capital Region.

Ayon kay DILG Secretary Eduardo Año, batay sa report ng PNP, 171 areas ang naka lockdown simula ng ikasa ang alert level 4 sa NCR.

Kaugnay nito, ipinabatid ni PNP Spokesperson Police Brigadier General Rolando Olay na mahigpit nilang mino-monitor ang 93 barangay na naka lockdown.

Sinabi ni Olay na nasa kabuuang 224 na pulis at 304 force multipliers ang ikinalat na nila sa mga nasabing lugar.

Inaasahang makukumpleto na ng Philippine General Hospital (PGH) sa katapusan ng buwang ito ang clinical trials sa paggamit ng Virgin Coconut Oil (VCO) bilang gamot sa COVID-19.

Sinabi ni DOST Secretary Fortunato Dela Peña na napapanahon ang pagtatapos ng clinical trial sa VCO dahil nagkakaruon ng problema ang bansa sa supply ng Tocilizumab.

Ayon kay Dela Peña, sa hiwalay na DOST clinical trial sa Sta Rosa, Laguna hinggil sa VCO, ilang pasyente na nakatanggap nito ay mabilis na nakarecover kumpara sa mga hindi nabigyan ng VCO.

Bukod din sa PGH, nagsasagawa rin ang Valenzuela at Muntinlupa ng clinical trials sa VCO bilang posibleng gamot sa COVID-19.

Posible aniyang matapos na rin ang clinical trails ng lagundi at tawa tawa na pinagaaralang maging gamot din kontra COVID-19.

Samantala, ipinabatid ni Dela Peña na tuloy-tuloy ang clinical trial sa melatonin bilang gamot sa COVID-19 dahil kailangan pa ng dagdag na participants ng Manila Doctors Hospital  na siyang nangunguna sa nasabing pagaaral.

Nagsimula na ang konstruksyon ng North South Commuter Railway Extension.

Ang nasabing proyekto na kilala rin bilang PNR Clark Phase 2, katuwang ang Japan International Cooperation Agency (JICA) ang magtatayo ng kauna unahang Airport Railway Express Service ng bansa.

Dahil sa nasabing proyekto, nasa halos isang oras na lamang ang biyahe mula Metro Manila partikular mula Makati patungong Clark International Airport.

Target ng Rail Segment Project na I Link o pag ugnayan ang mga lungsod sa Central Luzon at Metro Manila sa pamamagitan ng anim na istasyon.

Kasabay nito, ipinabatid ng DOTr na 7,000 direct jobs ang ibinigay ng construction phase at 3,000 pang trabaho ang makukuha ng mga Pilipino kapag nagsimula nang mag operate ang nasabing rail lines.