Judith Estrada-Larino

Pormal nang tinanggap ng Pangulong Rodrigo Duterte ang nominasyon ng Cusi faction ng PDP-Laban para tumakbo siya sa pagka-bise presidente sa 2022 elections.

Ipinakita mismo ni Energy Secretary Alfonso Cusi ang litrato nang paglagda ng Pangulong Duterte sa Certificate of Nomination Acceptance (CONA) para kumpirmahin ang pagtanggap niya sa VP nomination.

Una nang verbal na tinanggap ng Pangulo ang nominasyon ng ruling party sa idinaos na national assembly ng partido na una nang ini-nominate si Senador Bong Go bilang presidentiable ng PDP-Laban.

Nananatiling tikom ang bibig ng kampo ni vice president Leni Robredo kaugnay sa plano sa 2022 National Elections.

Kasunod na rin nang pagdedeklara ng kanilang presidential bids nina Manila Mayor Isko Moreno at Senador Manny Pacquiao na kapwa una nang nakausap ni Robredo.

Ayon kay Atty. Barry Gutierrez, spokesperson ni Robredo, mag-aanunsyo sa tamang panahon ang bise presidente kaya’t dapat munang kumalma ang lahat.

Una nang inihayag ni Robredo na tatakbo siya sa pagka-pangulo ng bansa kapag napili ng koalisyon ng grupo ng mga  oposisyon.

Pasok sa immigration look out bulletin order si Julian Ongpin na itinuturing na person of interest sa pagkamatay ni musician artist Bree Jonson.

Dahil dito, mahigpit na ipinag-utos ni immigration commissioner Jaime Morente ang pag-monitor sa galaw, flight, biyahe o kinaroroonan ni Ongpin sakali mang lumabas ito ng bansa.

Si Ongpin ay nahaharap sa kasong Possession of Dangerous Drugs matapos makakuha ng cocaine ang awtoridad sa resort room sa San Juan, La Union kung saan natagpuan patay si Jonson.

Isinusulong ni House Deputy Speaker Rufus Rodriguez ang pagbuwag sa Philippine International Trading Corporation (PITC) na nasa ilalim ng DTI.

Sa kanyang inihaing panukala, sinabi ni Rodriguez na samu’t saring mga kontrobersya ang kinahaharap ng PITC kabilang ang paglilipat dito ng P11-B mula 2014 hanggang 2020 ng iba’t ibang ahensya ng gobyerno.

Binigyang-diin ni Rodriguez na ang mga nasabing fund transfer ay nagpataas pa sa budget utilization rate ng government agencies dahil maituturing nang obligated at disbursed kapag inilipat ang pondo sa PITC.

Mayroon din aniyang mga report na ginagamit ng mga ahensya ng gobyerno ang interest mula sa kita sa bilyong piso na inilipat nila sa PITC para sa bonus at ibang bayarin sa mga benepisyo ng mga government employee.

Naselyuhan na ang kasunduan kaugnay sa pagtatayo ng Parex o Pasig River Expressway.

Ang supplemental toll operations agreement ay nilagdaan ng DOTR at San Miguel Corporation para sa kauna-unahang green hybrid highway at future urban transport.

Pinangunahan ng mga opisyal ng DOTR, TRB, iba pang ahensya ng gobyerno at SMC ang paglagda sa naturang kasunduan.
Ang Parex na magdudugtong sa road 10 sa Maynila, Edsa, C5 at C6 ay nagkakahalaga ng P95-B na kayang i-accommodate ang bus rapid transit system, bisikleta, pedestrians at water ferries.

Sinusuportahan ng United Nations, UNICEF at WHO ang isinusulong na face to face classes sa mga lugar na mayruong mababang kaso ng COVID-19.

Ayon ito sa Department of Education (DepEd) matapos bigyang diin ng mga nasabing institusyon ang karapatan ng bawat bata sa edukasyon na huhubog sa kanilang pagkatao.

Sinabi pa ng DepEd na iginigiit ng UN, UNICEF at WHO ang patuloy na pagsusuot ng face mask, physical distancing, paghuhugas ng kamay at tamang ventilation ng mga silid aralan.

Tuluy-tuloy ang pagsala ng 1Sambayan sa magiging pambato nito sa 2022 presidential elections.

Ayon sa 1Sambayan, nasa huling araw na sila ng screening ng nominees para sa pagka pangulo sa susunod na eleksyon.

Gumulong na anila ang kanilang internal survey mula Setyembre 12 hanggang 25 kung saan ipapaliwanag ng kanilang mga miyembro kung bakit napili ang isang indibidwal para maging “the  anointed one”.

Muling ipinabatid ng 1Sambayan na iaanunsyo nila ang isasabong na presidentiable isang linggo bago ang pagsisimula ng paghahain ng certificate of candidacy sa Oktubre1.

May mga kailangan pang gawin sa mga paaralan bago tuluyang ibalik ang face to face classes sa mga lugar na mayroong mas mababang kaso ng COVID-19.

Ayon kay ACT Secretary General Raymond Basilio, dapat na magkaruon ng maayos na ventilation ang mga silid aralan, sapat na classrooms at handwashing stations gayundin ng tubig, clinic, healthcare workers, COVID-19 testing at health checks.

Bukod dito, sinabi ni Basilio na isinusulong nila ang transportation program para sa mga estudyante upang makaiwas sa exposure sa COVID-19 habang nagbabiyahe papasok.

Si Senador Grace Poe ang unang choice ng kampo ni Manila Mayor Isko Moreno para maging vice president nito.

Gayunman, sinabi ni Lito Banayo, Campaign Strategist ni Isko na hindi pumayag si Poe na maka partner ng alkalde dahil sa personal na relasyon ng pamilya nito kay Senate President Vicente Sotto, III.

Sinabi ni Banayo na ayaw naman nilang pumasok sa isang political marriage at paninindigan aniya ni Isko na si Dr. Willie Ong na ang vice presidentiable nito.

Si ong ay orihinal na kabilang sa senatorial slate ni Isko subalit sinabi ng alkalde na uubra itong maging vice president niya matapos makausap ang doktor.

Maganda ang feedback sa pagpapairal ng alert level 4 sa Metro Manila.

Ibinalita ito ni DILG Secretary Eduardo Año sa kabila ng mga “issues” sa implementasyon ng alert level system na aniya’y na plantsahin rin naman kaagad.

Ang alert level 4 sa Metro Manila ay sinimulan nuong September 16 hanggang 30.