Judith Estrada-Larino

Ibinunyag ni Defense Secretary Delfin Lorenzana ang anito’y pakikialam ng China sa Philippine US mutual defense treaty.

Sinabi ni lorenzana na nakikialam ang ibang bansa kaya’t bigo ang Pilipinas at Amerika na repasuhin ang nasabing treaty na malaki ang tulong para mapalakas ang defense capability ng Pilipinas.

Sa katunayan, ipinabatid ni Lorenzana na sinabihan siya ng dating Chinese ambassador na huwag nang galawin o baguhin ang bahagi ng kasunduan.

Binigyang-diin  ni Philippine Ambassador to US Jose Manuel Romualdez na dapat palakasin ang kasunduan lalo pa’t maraming hamon ang kinakaharap ng Indo Pacific Region.

Ayon naman kay bagong US Embassy Charge De Affaires Heather Variava, Pilipinas ang pinakamatandang kaalyado ng Amerika sa Asya at ang 70 taong gulang na MDT ay patunay ng magandang relasyon ng dalawang bansa.—mula sa ulat ni Jaymark Dagala (Patrol 9)

Pinaiimbestigahan ng Makabayan Bloc sa House Committee on Agriculture and Food ang pagdagsa ng imported na gulay sa mga palengke.

Ayon sa Makabayan Bloc, may impormasyon silang nakuha na nakaimbak lamang sa isang maliit na bodega malapit sa divisoria ang mga inangkat na gulay na inilalabas lamang kapag tumaas na ang presyo ng mga gulay mula sa Benguet.

Sinabi ng makabayan bloc na tatlumpung sako na lamang ng Carrots  mula sa dating 100 ang nabebenta kumpara sa mga nailalakong imported carrots at iba pang gulay.

Una nang binalaan ng Department of Agriculture ang publiko laban sa pagbili ng smuggled vegetables dahil sa taglay nitong  pesticide residue.

Hindi lahat ng mga bansa ay kabilang sa bloomberg report.

Ito ayon sa Palasyo ay kaya’t hindi maituturing na pinakamalala o worst ang Pilipinas sa isyu ng COVID-19 resilience.

Sinabi ni Presidential Spokesman Harry Roque na 53 lamang mula sa halos 200 bansa ang isinailalim sa survey ng bloomberg.

Gayunman, inihayag ni Roque na ang pagtugon ng gobyerno sa COVID-19 pandemic ay naapektuhan ng quarantine restrictions kabilang ang lockdowns na ipinatupad ng gobyerno para hindi kumalat ang COVID-19 sa gitna na rin nang pag-usbong ng delta variant.

Isinusulong ng Phapi Private Hospitals Association of the Philippines ang dalawang linggong extension ng alert level 4 sa NCR.

Ayon kay Dr. Jose De Grano, pangulo ng Phapi, hindi kumbinsido ang healthcare professionals na pababa ang kaso ng COVID-19 kaya’t maaga pa para ibaba ang alert level system sa Metro Manila.

Sinabi ni De Grano na mataas pa rin ang mahigit 10,000 COVID-19 cases kada araw kahit pa pababa na ang trend dahil sa ipinatutupad na alert level system.

Bukod dito, ipinabatid ni De Grano na puno pa rin ang mga pribadong ospital sa NCR at nasa kritikal na sitwasyon dahil sa kakulangan ng healthcare workers.

Dumagsa pa rin ang mga tao sa Satellite Voter Registration Centers sa Antipolo City sa Rizal at San Jose del Monte City sa Bulacan para magpa rehistro.

Sa kabila ito nang anunsyo ng comelec na pagpapalawig ng voters registration mula october 9 hanggang 31.

Sa San Jose del Monte city, nagpagabi na ang maraming aplikante sa registration center bitbit ang kanilang mga pagkain at naghintay sa pagbubukas ng registration center kaninang umaga.

Samantala, alas dos ng madaling araw nang magdatingan sa satellite voter registration site sa Antipolo city ang mga tao na karamihan ay bumalik lamang umano matapos maabutan ng cut off sa pila kahapon.

Dagdag na mahigit 1.2 milyong bakuna mula sa moderna ang dumating sa Pilipinas.

Alas diyes ng umaga nang lumapag sa NAIA ang panibagong supply ng moderna vaccines sakay ng China Airlines Flight.

Mahigit 800,000 doses ng moderna vaccines ay mapapasakamay ng gobyerno at makukuha naman ng pribadong sektor ang mahigit 300,000 doses.

Ipinabatid ni Vaccine Czar Carlito Galvez, Jr. na ipapadala ang bahagi ng bagong dating na moderna vaccines sa regions 3, 4a, 7, 11, 12 at iba pang lugar na nakapagtala ng mataas na kaso ng COVID-19.—sa ulat ni Raoul Esperas (Patrol 45)

Tumaas ang bilang ng mga Pilipinong walang trabaho noong Agosto 2021 sa gitna nang ipinatupad na mahigpit na lockdown kontra COVID-19.

Ayon sa PSA o Philippine Statistics Authority, nasa 3.88 million ang pinoy adults na walang trabaho o katumbas na 8.1 percent unemployment rate para sa nakalipas na buwan.

Sinabi ni PSA Chief Claire Dennis Mapa, na asahan na ang pagsirit ng mga pilipinong walang trabaho noong Agosto dahil sa muling pagpapairal ng ECQ sa metro manila.

Nasa 3.07 million ang jobless pinoys noong buwan ng Hulyo kung kailan nasa 6.9 percent ang unemployment rate.

Inilatag na para sa Plenary Debates ng Senate Subcommittee on Finance and Committee on Health ang panukala kaugnay sa pag-iisyu ng COVID-19 vaccine at health passport.

Batay sa Senate Bill 2422, pinakikilos ang Local Government Units na mag-isyu ng libreng vaccine at  health passport kung saan nakasaad ang basic personal information ng binakunahan kontra COVID-19.

Nakalagay din sa card ang brand ng bakuna, kailan at saan ibinakuna, sino ang nagbakuna at ang petsa at resulta ng mga rt-pcr test.

Pangangasiwaan ng DOH ang central database kung saan mabe-verify ang authenticity ng vaccine passport na magagamit sa non-essential domestic travel, local checkpoints, quarantine exemptions o mas maikling quarantine time, business establishments at international travel na kailangang lakarin ng bureau of quarantine at department of foreign affairs.

Sinabi ni senador Pia Cayetano, sponsor ng panukala na hindi naman bago ang pag-iisyu ng vaccine passport na mayruon na sa canada, china, united arab emirates at sa mga bansa sa european union at nagagamit sa pagpasok sa mga museum, teatro, gym, cultural sites at mga kainan.—sa ulat ni Cely Bueno (Partol 19)