Judith Estrada-Larino

Kasuhan ang Senado.

Ito ang hamon ni Senate Minority Floorleader Franklin Drilon sa Malakaniyang kung kumbinsido itong lumalampas na ang senado sa kapangyarihan nitong mag-imbestiga.

Kasunod na rin ito ng pahayag ng Pangulong Rodrigo Duterte na lumalampas na sa kapangyarihan ang Senate Blue Ribbon Committee sa imbestigasyon sa Pharmally Pharmaceutical Corporation na binilhan ng medical supplies ng DOH.

Binigyang diin ni Drilon na katotohanan ang hinahanap nila sa naturang imbestigasyon dahil pera ng bayan ang sangkot sa usapin matapos overpriced umano ang medical supplies na binili ng gobyerno sa Pharmally.

Ikinasa na ng UP Marine Experts ang October Leg Research Expedition nito sa West Philippine Sea.

Ang grupo nina Dr. Cesar Villanoy, Dr. Fernando Siringan, Dr. Deo Florence Onda at Dr. Hazel Arceo ay sumakay sa my panata na magsasagawa ng PAGASA Island Research Station Refurbishment Plans.

Kasama rin sa team bilang research associates sina Dr. Dennis Tanay ng National Fisheries Research and Development Instiute at Dr. Jay Batongbacal ng Institute for Maritime Affairs and Law of the Sea.

Ipinabatid ng UP Marine Science Institute na matapos ang summer expeditions, tututukan ng research team ang pagsasaayos at installation ng bagong features kabilang na ang Solar Panel System.

Iginiit ng DOH na “improving” o umaayos ang COVID-19 response ng bansa.

Sa kabila ito ng report ng Bloomberg na tinutukoy ang Pilipinas bilang “worst place to be” sa gitna ng COVID-19 pandemic.

Ayon kay Health Undersecretary Maria Rosario Vergeire, ang 3,000 pagbabakuna kada araw noong Marso ay tumaas sa halos isang milyong vaccinations sa ilang pagkakataon.

Bukod dito, sinabi ni Vergeire na nagsimula lamang sa isang laboratory ang bansa para ma-detect ang COVID-19 cases na ngayo’y nasa mahigit 260 laboratories na sa buong bansa.

Nasa average aniya na 70K hanggang 80K COVID-19 tests ang naisasagawa kada araw.

Tiniyak ni Vergeire ang patuloy na pagta-trabaho ng gobyerno at panatilihin ang uri ng response na ginagawa dahil naniniwala silang maayos ang COVID-19 response ng pamahalaan.

Tiwala ang COMELEC na magiging maayos at mapayapa ang ikalawang araw ngayong araw ng Sabado, nang paghahain ng Certificate of Candidacy (COC) para sa 2022 National Elections.

Kasunod na rin ito ng maayos na pagsisimula kahapon ng filing ng COC.

Nakakalat pa rin ang maraming pulis sa CCP Complex.

Una nang nag set up ng tent ang COMELEC sa isang hotel sa Pasay City para sa COC filing ng national candidates.

Muling ipinaalala ng COMELEC ang limitadong bilang ng mga taong uubrang pumasok sa tent at kailangang magpakita ng negative COVID 19 test result pagpasok sa venue.

Nasa halos 600k ang muling nagkatrabaho sa nakalipas na buwan.

Ipinabatid ito ni Labor Secretary Silvestre Bello, III matapos i-report ng Philippine Statistics Authority na sumirit sa 3.88-M ang unemployment sa buwan ng Agosto sa gitna na rin nang pinairal na lockdown kontra COVID-19 partikular ang Delta variant ng Coronavirus.

Sinabi ni Bello na marami rami na rin ang nagbalik trabaho dahil lumuluwag na ang sitwasyon.

Inihayag ni Bello na ang mga nawalan ng trabaho dahil sa pinairal na lockdown ay maaaring mag avail sa tupad o tulong pang hanapbuhay sa ating Disadvantaged/Displaced Workers Program kung saan mayroon pang 3.5-B funds para rito.

Kumbinsido si Dating Supreme Court Associate Justice Antonio Carpio na tatanggapin ni Vice President Leni Robredo ang pag endorso rito ng Opposition Coalition na 1Sambayan.

Ayon kay Carpio, Lead Convenor ng 1Sambayan ayaw niyang pangunahan si Robredo subalit malinaw naman ang mensahe kung sino ang dapat na susunod na pangulo ng bansa.

Una nang inihayag ni Robredo ang pasasalamat sa 1Sambayan sa tiwalang ibinigay sa kanya subalit itutuluy tuloy niya muna ang pagdarasal kung tatanggapin ang nasabing pag endorso sa kanya bilang pangulo ng bansa.

Sumakabilang buhay na ang dating pangulo ng Mindanao State University (MSU).

Ayon sa mga kaanak ni Dr. Ahmad Domocao Engracia Alonto, Jr. naging mahina ang pangangatawan nito sa mga nakalipas na araw bagamat hindi tinukoy ang sakit ng dating MSU President.

1986 nang simulang pangasiwaan ni Alonto ang MSU hanggang tuluyang italaga sa regular term bilang MSU President mula 1987 hanggang 1992.

Si Alonto ay naging bahagi ng negotiating panel ng MILF na pinamunuan ni Murad Ebrahim.

77,000 trabaho ang inaasahang maibibigay ng itatayong MRT Line 4.

Ipinabatid ito ng DOTR na nagsabi ring ang mga naturang  direct at indirect employment opportunities ay makakatulong sa pagbangon ng ekonomiya ng bansa mula sa COVID-19 pandemic.

Ang MRT 4 na may habang 15.56km at 11 stations ay  pinondohan ng Asian Development Bank at sisimulang gawin sa 2024.

Inindorso ng opposition coalition 1Sambayan si Vice President Leni Robredo sa 2022 presidential elections.

Ang pag-endorso ng 1Sambayan kay Robredo ay inanunsyo mismo ni retired Associate Justice Antonio Carpio, isa sa mga convenor ng koalisyon.

Una nang inihayag ni Robredo na magpapasya siya sa tatakbuhang posisyon sa 2022 elections sa panahon ng filing ng Certificate of Candidacy simula bukas, Oktubre 1 hanggang 8.

Ang 1Sambayan ay inilunsad noong Marso para magkasa ng national candidates sa 2022 elections bilang panlaban sa mga kandidato ng Duterte administration.