Judith Estrada-Larino

Tila nag benepisyo ang messaging app na Telegram sa kasagsagan ng outage ng Facebook (FB).

Ito ayon kay Pavel Durov, Founder ng Telegram App ay matapos madagdagan ng pitumpung milyong bagong users ang kanilang app bagamat bumagal ito.

Sinabi ni Durov na lumampas sa normal ang dami ng daily users ng Telegram App na ininstall ng maraming FB users nang halos anim na oras na hindi naka access sa Facebook.

Una nang humingi ng paumanhin ang Facebook sa aberya sa kanilang site, dahilan kaya’t hindi rin ma-access ng ilang oras ang Instagram at Whats App.

Pinuna ng Senado ang mga nakita nitong kawalan ng alokasyon sa panukalang budget ng DILG bilang pantugon sa pandemya.

Ayon kay Senate Committee on Finance Chairman Sonny Angara, walang nakalaan para sa pagkuha ng contact tracers sa ilalim ng proposed P248.5-B na budget ng DILG.

Dahil dito, tiniyak ni Angara kay DILG Secretary Eduardo Año na hahanapan ng Senado ng pondo ang kailangang budget ng DILG para sa pagkuha ng 25,000 contact tracers sa susunod na taon.

Sisiguruhin aniya ng Senado na tumutugon sa COVID-19 pandemic ang panukalang pambansang budget para sa susunod na taon.

Magugunitang una na ng napuna ng Senado sa panukalang 2022 Budget na binalangkas ng Malakanyang ang kawalan ng pondo para pambili ng bakuna na bukod pa sa booster shots, wala rin para sa bakuna ng mga 12 hanggang 17 anyos at wala ring inilaan para sa special risk allowance ng healthcare workers. —ulat mula kay Cely Ortega Bueno (Patrol 19)

Pinaiimbestigahan ni Senador Imee Marcos ang aniya’y nagaganap na Agricultural Smuggling kasabay ang pagtukoy at papanagot sa mga importer at mga opisyal ng Department of Agriculture (DA) at Bureau of Customs na sangkot dito.

Kasunod na rin ito nang pag kuwestyon ni Marcos sa DA sa pagdagsa ng imported agricultural products at pabirong tinanong kung Department of Importation na sa halip na DA nasabing ahensya.

Sinabi ni Marcos na posibleng pananabotahe sa ekonomiya ang hindi napapanahon at sobra sobrang importasyon ng mga gulay mula China habang ang mga gulay ng mga lokal na magsasaka sa Benguet at iba pang taniman sa Cordillera ay patuloy na nabubulok.

Binigyang diin ni Marcos na ang pagbibigay proteksyon sa mga lokal na mga magsasaka ang solusyon sa pangmatagalang seguridad sa pagkain at hindi ang importasyon ng mga produktong pang-agrikultura, kahit pa ito ay legal.

Sa harap ng kawalan ng mga bumibili at pagkabulok ng mga ani ng mga lokal na magsasaka dahil sa quarantine restrictions, nakumpiska ng boc ang nasa P4.7-M na halaga ng mga imported na repolyo, carrots, brocolli at iba pang gulay sa isang raid sa Divisoria at Tondo sa Maynila. —ulat mula kay Cely Ortega Bueno (Patrol 19)

Nadiskubre ng mga otoridad ang halos P50 milyon na halaga ng smuggled cars at coins sa isang bahay sa Quezon City.

Ayon sa NBI Anti Organized and Transnational Crime Division, ibinibenta ng indibidwal na umuupa sa nasabing bahay ang isang milyong pisong halaga ng barya sa P950,000.

Sinabi ng NBI AOTCD Chief Atty. Manny Eduarte, na ang mga naturang barya ay hinihinalang nanggaling sa iligal na sugal sa Luzon, base na rin sa resulta ng kanilang surveillance.

Bigo ang mga abogado at kinatawan ng may-ari ng luxury cars na makapaglatag ng mga dokumento para sa mga ito.

Mahigit P29-M na halaga ng mga hindi rehistradong gamot ang nasabat ng Bureau of Customs-NAIA.

Nakumpiska ng mga otoridad ang anim na shipment na naglalaman ng mahigit 146,000 boxes ng gamot na walang FDA clearance.

Matapos isalang sa Pre-Lodgement Control Order at 100% physical examination, nakitang laman ng mga nasabing shipment mula Hongkong ang kahon kahong traditional chinese medicine na Lianhua Qingwen Jiaonang.

Ayon sa mga otoridad, hindi na mahagilap sa ibinigay na address ang sinasabing consignee ng mga naturang shipment.

Ang nasabing hakbang ay bilang pagpapalakas sa kampanya laban sa pagpasok sa bansa ng mga hindi ligtas, unregistered at hazardous substances. —sa ulat ni Raoul Esperas (Patrol 45)

Tiyak na ang pagpapasya ni Vice President Leni Robredo kaugnay sa 2022  Elections bago mag October 8 o matapos ang filing ng COC para sa national position.

Ayon ito kay Atty. Barry Gutierrez, Spokesperson ni Robredo bilang tugon sa mga report na inihayag ni 1Sambayan Convenor Brother Armin Luistro na tinanggap na ng bise presidente ang kanilang nomination bilang standard bearer ng United Opposition.

Sinabi ni Gutierrez na naiintindihan nila na marami ang excited o nagaabang talaga sa magiging pasya ni Robredo subalit huwag sila aniyang mag alala dahil anumang araw sa susunod na linggo ay ipapaalam na nito ang kanyang desisyon sa 2022 National Elections.

Kasabay nito, itinanggi ni Gutierrez na tatakbo sa local post si Robedo matapos nitong ilipat ang voter’s registration nya sa Magarao, Camarines Sur mula sa Naga City.

Kailangan aniyang maipaalam muna ni Robredo ang kanyang desisyon sa National Election bago tutukan ang Local Elections.

Bumaba ang COVID-19 admissions sa Philippine General Hospital.

Ayon ito kay PGH Spokesperson Dr. Jonas Del Rosario bagama’t malaking bilang ay severe cases at karamihan sa pila sa ospital ay kailangang ma admit sa ICU.

Ipinabatid ni Del Rosario na nasa 80% ang occupancy rate ng PGH kung saan naka-confine ang 228 COVID 19 patients na mas mababa sa itinuturing aniya nilang all time high na halos 350 patients.

Karamihan aniya ng nasa ICU ay hindi pa bakunado na 80% ng mga pasyente ng PGH.

Hinimok ng DOH ang publiko na hanapin ang safety seal sa mga establishments na muling nagbukas sa Metro Manila sa ilalim pa rin ng alert level 4.

Ito ayon kay Health Undersecretary Maria Rosario Vergeire ay garantiya para sa customers at masiguro ang safety level ng  establishments.

Nakasaad aniya sa safety seal ang lahat ng kinakailangang minimum public health standards at tinitiyak nito ang maayos na ventilation ng lugar para maiwasan ang anumang hawahan sa establishment.