Judith Estrada-Larino

Pinaiimbestigahan na ng NTC o National Telecommunications Commission ang emergency text blasts na nagpo-promote kay dating Senador Ferdinand Bongbong Marcos, Jr.

Ipinabatid ito ni NTC Deputy Commissioner Edgardo Cabarios na nagsabi rin na hindi naman emergency ang ipinadalang alert na natanggap ng maraming cellphone users matapos maghain ng COC ni Marcos sa pagka-presidente.

Ayon kay Cabarios, nakipag ugnayan na sila sa mga Telcos na itinangging dumaan sa kanila ang nasabing emergency alert na sa pagkakaalam anila ay tanging sa NDRRMC lamang nanggagaling.

Maaaring ang naturang emergency alert aniya ay nanggaling sa iligal na operasyon ng “portable cell sites” na Radio Based Stations na gumagamit ng frequencies ng mobile networks.

Hinimok ng IBP Integrated Bar of the Philippines ang Pangulong Rodrigo Duterte na irekunsidera ang desisyong huwag padaluhin ang mga cabinet member sa Senate investigation hinggil sa umanoy  overpriced medical supplies na binili sa Pharmally Pharmaceutical Corporation.

Tinukoy ng IBP ang pasya ng Korte Suprema sa kaso ng Senate Versus Ermita kung saan ang kapangyarihan ng kongreso para i-compel o pilitin ang pagdalo ng Executive Officials sa imbestigasyon ay nakabase sa prinsipyo ng Separation of Powers.

Binigyang diin ng ibp na sa pamamagitan lamang ng pagbibigay ng free access to information sa kongreso makakatutulong ang Gobyerno na makabuo ang mga ito ng mga polisiya para sa kapakinabangan ng Taumbayan.

Una nang binatikos ng Philippine Bar Association ang nasabing kautusan ng Pangulong Duterte na paglabag anila sa System of Checks and Balances at Doktrina ng Separation of Powers sa tatlong sangay ng Gobyerno.

Nakapagtala ng halos sampung libo o 9, 868 na bagong kaso ng COVID-19, dahilan kayat sumirit pa sa mahigit 2.6 na milyon ang kumpirmadong kaso ng virus sa bansa.

Ayon sa DOH, ito na ang ikalawang araw na nairehistro ang mas mababa sa sampung libong bagong kaso ng COVID-19 dahil sa usaping teknikal sa COVID.

Dahil dito sinabi ng DOH na nasa 112, 807 ang active cases ng COVID-19 kung saan 76.7% ang mild, 13. 98% ang asymptomatic, 2.8% severe at 1.2% ang critical condition.

Sumampa na sa halos 2.6M ang total recoveries kabilang na ang 133 na mga bagong gumaling sa nasabing virus, samantalang nananatili sa 38,828 ang death toll. —mula sa ulat ni Aya Yupangco (Patrol 5)

Irerekonsidera ng IATF ang panukalang bawasan ang quarantine period para sa mga air passengers.

Ayon ito kay trade secretary Ramon Lopez na nagsabing ngayong linggo o sa susunod na linggo magpupulong ang IATF sakaling isulong at maaprubahan sa technical level.

Tiniyak ni Lopez ang pagtulong sa aviation sector para kahit paano ay makapagbukas ng operasyon sa pamamagitan nang pagluluwag ng travel restrictions habang paparami ang mga nababakunahan.

Una nang inihayag ni Presidential Adviser for Entrepreneurship Joey Concepcion ang isinusulong ng airline companies na gawing pito na lamang ang 10-day quarantine period para sa incoming travelers dahil mabigat ito sa bulsan ng mga pasahero.

Halos 170M views ang nakuha ng mental health campaign ng globe, bilang pakikiisa sa National Mental Health week sa ikalawang linggo ng Oktubre.

Sa gitna na rin ito na inilabas na Mental Health Atlas 2017 ng World Health Organization kung saan nakasaad na ang mental illness ang ikatlo sa pinaka-karaniwang kapansanan sa Pilipinas o humigit kumulang 6M na Pilipino ang dumaranas ng depression at anxiety.

Gamit ang kantang “better days 2.0” ni quest, ikinasa ng Globe ang video challenge nito na paalala sa mga tao na manatiling positibo sa ilalim ng #planthappinessph campaign kung saan nakatanggap ang Globe ng 275 video entries mula sa mga medical frontliners, delivery riders, work-from-home moms, empleyado, negosyante at iba pa mula nang magsimula ang kampanya noong Setyembre 27.

Binigyang-diin ni Yoly Crisanto, Globe chief sustainability officer and SVP for corporate communications na natutuwa sila sa pagdagsa ng mga tugon sa kanilang panawagang kung saan maraming tiktokers na sumayaw, nagpamalas ng kanilang mga koleksyon ng halaman, kumanta, nag-document ng kanilang pagbabakuna at nagpakita ng kanilang mga simpleng kasiyahan tulad ng pagluluto, pag-e-ehersisyo at pag-aalaga ng kanilang mga alagang hayop para i-promote ang mental health at well-being.

Bahagi ng #planthappinessph ng Globe ang pagsisikap na mapangalagaan ang mental health ng customers kung saan magbibigay ang Globe sa mga kumasa sa hamon ng libo-libong libreng binhi at punla tulad ng Langka, Guyabano, Punong Supa at Bignay.

Kabilang din sa mental health program ng Globe ang tayo naman! O tulong, alaga, yakap at oras para sa mga tagapagtaguyod ng edukasyon kung saan nakipag-ugnayan ang Globe sa disaster risk reduction management service ng Department of Education at sa Bureau of Human Resource and Organizational Development Employee Welfare Division upang suportahan ang kapakanan ng mga guro, non-teaching personnel at mga magulang mula sa Globe Filipino teachers program.

Sapat ang supply ng langis sa bansa.

Ayon ito kay Energy Assistant Secretary Gerardo Erquiza, Jr., bagamat itinutulak ng global demand ang pagtaas ng presyo ng langis sa world market.

Obligado aniya ang local suppliers na tiyaking tatagal ang oil reserves ng 15-30 days depende sa produkto.

Sinabi ni Erquiza na malaki ang demand sa langis subalit kulang ang supply kaya’t nagtataas ang presyo ng produkto.

Tila nahila pababa ng kontrobersya sa Pharmally ang pagsuporta ng publiko sa Duterte administration kaugnay sa pagtugon sa pinakamahalagang usapin para sa kanila.

Ayon ito kay Dela Salle University Lecturer Professor Cleve Arguelles, matapos ilabas ng Pulse Asia ang bumabang aprroval rating ng gobyerno sa pagtugon sa kanilang concerns.

Tinukoy ng Pulse Asia ang pagbaba ng 12% quarter to quarter at 25% year on year, sa pag apruba ng publiko sa kampanya ng gobyerno laban sa korupsyon.

Sinabi ni Arguelles na aktibo ang Pangulong Rodrigo Duterte sa pag depensa sa ilang sangkot sa Pharmally Deal kaya’t hirap ang senado na gawin ang trabaho nitong imbestigahan ang usapin.

Maaari aniyang napagtutuunan ng pansin ng publiko ang pagiging defensive ng Pangulo sa Pharmally controversy na malaki rin ang posibilidad na makapagpabagsak sa trust at approval ratings ng Pangulong Duterte.

Nakalabas na ng Philippine Area of Responsibility ang bagyong Lannie kaninang umaga.

Sa pinakahuling bulletin ng PAGASA, ang bagyong Lannie ay namataan sa layong 770km kanluran ng Calapan City, Oriental Mindoro o 670km kanluran ng Subic, Zambales.

Ayon pa sa PAGASA, ang trough ng bagyong Lannie ay inaasahang magdadala ng ulan sa Metro Manila, Central at Southern Luzon, Antique at Aklan.

Ang Gale Warning ay nakataas sa seaboards ng Northern Luzon at Western seaboards ng Southern Luzon.

Pabor ang DOT sa panawagang bawasan ang quarantine period sa mga international travelers na fully vaccinated.

Ayon kay Tourism Secretary Berna Romulo-Puyat, malaking tulong sa ekonomiya ng bansa bukod sa mahalaga sa mga nawalay ng matagal sa kanilang mga mahal sa buhay lalo na ngayong malapit na ang holiday season kung babawasan ang quarantine period.

Batay sa guidelines ng IATF, ang mga magmumula sa yellow risk ay dapat sumailalim sa 10 day facility based quarantine at apat na araw na home quarantine.

Limang oras na nag offline ang website ni Senador Richard Gordon noong Lunes , Oktubre 4 dahil sa Cyber Attacks.

Ayon kay Myke Cruz, Information Technology Officer sa tanggapan ni Gordon, nagkaroon ng tinatawag na Distributed Denial of Service (DDOS) attack sa kanilang website kaya’t nag shutdown ang web services nito mula alas-7 ng umaga hanggang ala-1 ng hapon.

Ang DDOS Attack daw ay traffic request sa website na karaniwang idinadaan sa dark web ng mga taong nabayaran ng malaking halaga.

Sa website ni Gordon, bumaha ang traffic requests mula sa China, United States, Ukraine at iba pang bansa sa South East Asia kaya ang bandwidth ng website ay lumobo sa 1.8gb sa loob ng isang oras mula sa dating 100mb lamang.

Bukod sa cyber attack sa website, binaha rin ang social media account ni Gordon ng banat nang hinihinalang trolls na bumabatikos sa imbestigasyon ng senado sa pagbili ng gobyerno ng pandemic supplies sa Pharmally Pharmaceutical Corporation.—sa ulat ni Cely Ortega Bueno (Patrol 19)