Jopel Pelenio

Inilagay na sa State of Calamity ang Zamboanga City dahil sa paghagupit ni Bagyong Paeng.

Ayon sa Zamboanga City LGU, inaprubahan ito ng Sangguniang Panlungsod sa isinagawang special session kahapon, araw ng Sabado.

Dahil dito, sinabi ng lokal na pamahalaan na maari na nilang gamitin ang kanilang mga resources upang agad na matugunan ang mga pangangailangan ng bawat barangay na labis na naapektuhan ng bagyo.

Matatandaan una nang inirekomenda ni Zamboanga City Mayor John Dalipe, na sya ring Chairman ng City  Disaster Risk Reduction and Management Council, ang pagsasailalim sa kanilang lugar sa State of Calamity kasunod ng matinding pinsala na tinamo ng kanilang lunsod dahil sa pagbayo ni Typhoon Paeng.

Base sa ulat na natanggap ng lokal na pamahalaan mula sa kanilang Emergency Operations Center, isa na ang napaulat na nasawi, habang apat na indibidwal ang nawawala.

Mahigit 5,000 pamilya naman ang inilikas mula sa halos 42 barangay na naapektuhan ng mga pagbaha bunsod ng napakalakas na pagbuhos ng ulan.

Pansamantalang ipinagpaliban ng Ateneo De Manila University ang October 30 sessions ng Ateneo College Entrance Test (ACET) dahil sa pananalasa ni Bagyong Paeng.

Sa inilabas na advisory ng Ateneo, sinabi nito na kanilang itatakda sa ibang araw ang eksaminisyon at hintayin na lamang ang kanilang ipadadalang email sa mga examinee.

Samantala, pinahintulutan namang makakuha na ng exam ang mga nagtungo sa Campus kahapon, October 29, 2022.

Pero para sa mga hindi nakapag-take ng kanilang ACET dahil sa naranasang sama ng panahon, maari silang mabigyan ng isa pang pagkakataon sa January 2023.

Naghahanda na ang ibat ibang sementeryo sa Metro Manila para sa paggunita ng All Souls at All Saints’ Day sa November 1, kasabay ng mga ipinatutupad na pagluluwag sa Covid-19 restrictions.

Ayon sa pamunuan ng Manila North Cemetery, sisiguruhin nilang tatalima sila sa mga panuntunang ilalatag ng lokal na pamahalaan ng Maynila kasunod na rin ng inaasahan nilang pagpalo sa tatlo hanggang apat na libong indibidwal na magtutungo sa kanilang sementeryo sa darating na All Souls’ Day.

Sa ngayon marami nang mga tao ang naglilinis, nagpipintura at nag-aayos ng mga nitso ng kanilang mga yumaong kaanak na nakalibing sa Manila North Cemetery.

Pansamantalang ipatitigil ng pamunuan ng sementeryo ang internment operations mula October 28, at magbabalik operasyon sa November 3, 2022.

Simula naman Oktubre a-29, ganap na ala-5 ng umaga hanggang ala-5 ng hapon, papayagan na ng Management ng Manila North Cemetery na makapasok ang Sinumang nagnanais na dumalaw sa kanilang mga pumanaw na mahal sa buhay.

Magtatagal ito hanggang sa ikalawa ng Nobyembre ng taong kasalukuyan.

Pahayag ng Management, na tanging mga bakunadong bata lamang na may edad na 12 pataas ang kanilang papapasukin .

Samantala, kaparehong guidelines din ang paiiralin sa Manila South Cemetery na matatagpuan sa Lunsod ng Makati ngunit nasa ilalim ng pangangasiwa ng Manila LGU.

Nakabalik na sa bansa ang 15 Pilipino galing sa Bahrain nitong nakalipas na Setyembre a-29, taong kasalukuyan.

Ayon sa Embahada ng Pilipinas sa Manama, binubuo ang mga Filipino repatriates ng isang dating detainee,  dalawang minor at OFW’s na walang hawak na mga dokumento.

Sinagot ng Philippine Embassy ang lahat ng gastusin ng mga kababayan nating umuwi ng bansa sa pamamagitan ng Assistance-to-Nationals Fund ng Foreign Affairs Department.

Agad naman silang inasistehan ng Overseas Workers Welfare Administration (OWWA) pagdating nila ng Pilipinas para sa kanilang pag-uwi sa kani-kanilang mga lugar.

Nakapagtala ang Department of Health (DOH) ng 2,367 new COVID-19 cases, habang umabot naman sa 26,404 ang aktibong kaso sa buong bansa.

Sa tatlong magkakasunod na araw, pumalo sa mahigit 2,000 ang new infections na naitala ng kagawaran ng kalusugan.

Bahagyang tumaas ang active cases mula sa 26,399 nitong nakaraang Biyernes at sumipa naman sa 3,980,629 ang kabuuang kaso sa Pilipinas.

Sa nakalipas na dalawang linggo, sumirit sa 10,848 ang new infections sa National Capital Region, na sinundan ng CALABARZON  na mayroong 5,345 cases, Central Luzon – 2,796, Davao Region – 1,422, at Western Visayas – 1,161 Covid-19 cases.

Umakyat naman sa 3,890,748 ang bilang ng mga gumaling matapos na madagdagan ito ng 2,232 new recoveries.

Samantala, mayroon namang naitalang 38 new deaths ang doh dahilan upang umabot na sa 63,477 ang death toll sa buong bansa.

Nakaambang tumaas ang presyo ng kada kilo ng bigas.

Ito ang maagang abiso ng mga rice supplier sa mga palengke bunsod ng tinamong pinsala ng ilang sakahan matapos ang paghagupit ni bagyong Karding.

Pero sa kabila nito, sinabi ng Department of Agriculture (DA) na wala-gaanong epekto sa suplay ng bigas ang pagkasira ng ilang sakahan sa bansa.

Samantala, pumalo naman sa P10 kada kilo ang itinaas ng ilang gulay gaya ng carrots, patatas at baguio beans.