Jenn Patrolla

Nalampasan na ng Pilipinas ang full-year target para sa foreign tourist arrivals.

Ayon kay Tourism Secretary Christina Garcia Frasco, nakapagtala ang bansa ng halos limang milyong turista hanggang Nobyembre a-bente syete, na mas mataas sa 4.8 million target para sa buong 2023.

Dagdag ng kalihim, na ang foreign tourist ay bumubuo sa 91.9% ng arrivals habang ang nalalabing 8.1% ay returning overseas Filipinos.

Sa ngayon, nananatiling top source market ng bansa ang South Korea kung saan nakapagtala ng higit 1M na turista o may 26.37% ng kabuuan.

Giit ng Department of Tourism na ang pagtaas sa arrivals ay bunga ng pagluwag ng visa policies, pagtatayo ng tourist rest areas, at ilan pang mga bagong inisyatibo.

Kailangan munang dumaan sa proseso ng senado upang muling lumahok sa International Criminal Court ang Pilipinas.

Ito ang binigyang diin ni Sen. Ronald Bato dela Rosa matapos ihayag ni Pangulong Ferdinand Bongbong Marcos Jr. ang posibilidad na muling bumalik sa ICC ang bansa.

Paliwanag ng senador, na daraan pa rin ito sa tamang proseso at matapos na ratipikahan ng pangulo ay kailangang ayunan ng senado sa pamamagitan ng two-third votes.

Dagdag pa ni Senador dela Rosa, sa oras na nabigo ang proseso ay back-to-zero o maaaring ideklara itong unconstitutional.

Kailangan anyang respetuhin ang desisyon ng pangulo na hindi dapat payagan ang ICC na bumalik sa bansa.

Umabot na sa mahigit isang milyong katao ang apektado sa pitong rehiyon sa  Southern Tagalog, Bicol Region at Eastern Visayas dulot ng shearline at low pressure area.

Sa datos ng National Disaster Risk Reduction and Management Council, may kabuuang 1,122,093 katao o katumbas ng halos tatlong daang libong pamilya sa mahigit isang libong barangay sa CALABARZON, Bicol Region, MIMAROPA, Bicol Region, Western at Eastern Visayas, Northern Mindanao at CARAGA ang naapektuhan ng malakas na pag-ulan sa bansa.

Aabot naman sa 48,720 individuals ang lumikas sa 162 evacuation center matapos ang pagbaha at landslide sa nasabing mga lalawigan.

Dagdag pa ng NDRRMC, na may kabuuang 147 road sections at siyam na tulay ang naapektuhan ng masamang panahon habang 270 kabahayan ang nasira.

Umakyat naman sa ₱119.8-M ang halaga ng pinsala sa agrikultura.

Ipinag-utos ni Pangulong Ferdinand Marcos Jr. ang pagpapalakas ng kakayahan ng First Scout Ranger Regiment ng Philippine Army para sa pagtuloy na pagsusulong ng kapayapaan.

Sa ika-73 founding anniversary ng FSRR sa San Miguel, Bulacan, kinilala ng pangulo ang malaking papel sa pagharap sa internal security threats at pagtitiyak sa kaligtasan ng Pilipinas.

Hinimok ni PBBM ang Department of National Defense na reviewhin ang scout rangers’ capability requirements at tangkilikin ang mga opsyon na magpapalakas sa operational capabilities and effectivenes ng mga ito upang maabot ng bansa ang defense objectives nito.

Giit pa ng pangulo na makatutulong ang scout ranger sa Armed Forces of the Philippines lalo na kung mapagkakalooban ito ng kinakailangang resources.

Bumagsak ng 71 percent ang kinita ng Bangko Sentral ng Pilipinas mula Enero hanggang Agosto habang tumataas ang mga gastusin sa bansa.

Batay sa datos ng BSP, nasa ₱22.91-B lamang ang kita ng naturang bangko sa nasabing panahon, na mas mababa sa ₱78.82-B noong nakaraang taon.

Sa loob ng walong buwan, tumaas ng 23.1% ang interes ng BSP sa ₱127.52-B mula sa ₱103.57-B.

Sa kabila nito, ang iba’t ibang aktibidad gaya ng trading gains o losses, fees, penalties at iba pang operating income, bukod sa iba pa ay nagtala ng pagkawala ng ₱10.4-B.

Bumaba ang produksyon ng isda sa bansa para sa ikalawang bahagi ng 2023.

Ito’y batay sa Philippine Statistic Authority (PSA) na naitala sa negative 11.3% ang fisheries production.

Ayon sa PSA, mula sa 1,219 point 34 metric tons, bumaba sa 1,082 point 22 metric tons para sa total volume ng second quarter ng 2023.

Taun-taon anya bumababa ang produksyon sa commercial, marine municipal at aquaculture subsector.

Sa commercial fisheries, negative 14.5% ang naitala habang negative 16.8 percent sa marine municipal fisheries at negative 8.3% sa aquaculture.

Samantala, tumaas ang produksyon ng galunggong at sugpo.