Naging matagumpay ang paglulunsad ng SpaceX ng kanilang 53-satellite Starlink mission sa Cape Canaveral Space Force Station sa Florida.
Ayon sa ulat, nilikha ng kompanya ang Starlink program na layong mabigyan ng high-speed internet access ang mga users sa mundo bilang suporta na rin sa kanilang space explorations.
Maliban dito, hangad ng SpaceX na mabigyan ng serbisyo ang lahat ng tao sa buong daigdig lalo na ang mga mamamayan sa mga mahihirap o liblib na lugar na walang internet connectivity.
INIHAYAG ng Partido Federal ng Pilipinas (PFP) na inampon nito si Davao City Mayor Sara Duterte-Carpio bilang kandidato sa pagka-bise presidente sa 2022 elections.
Maliban dito, inendorso rin ng partido si Inday Sara bilang running mate ni dating Sen. Bongbong Marcos.
Naglabas ng resolusyon ang Executive Committee ng PFP matapos maghain ng kandidatura sa Comelec si Duterte-Carpio para sa pagka-pangalawang pangulo sa ilalim ng LAKAS-CMD.
Maliban dito, binanggit din sa PFP resolution na hindi ito nag-isyu ng Certificates of Nomination and Acceptance o CONA at wala rin itong mga opisyal na kandidatong senador at bise presidente sa halalan.
Samantala, ibinuking naman ni PCOO Secretary Martin Andanar na tatakbong bise-presidente si Pangulong Duterte sa susunod na taon.
Una rito, iniurong na rin ni Lyle Uy ang kanyang kandidatura sa pagka-pangalawang pangulo sa ilalim ng Lakas-CMD kung saan humalili naman sa kanya si Inday Sara.
Mahigit 700,000 pisong halaga ng hinihinalang shabu at marijuana ang nasabat ng mga awtoridad mula sa tatlong drug suspects, kabilang ang dalawang babae, sa ikinasang buy-bust operation sa Tolentino St. Pasay City.
Kinilala ang mga suspek na sina Danica Mae Caingat, Danilo David at Angelain Khell David.
Bukod sa 500 pisong buy-bust money, nakumpiska rin mula sa kanila ang halos 400,000 pesos na halaga ng umano’y shabu at halos 400,000 pisong halaga rin ng marijuana.
Nakatakdang sampahan ng mga kaukulang kaso ang mga naturang suspek.
Bagsak sa kulungan ang dalawang lalaki matapos mahulihan ng mahigit 40,000 pisong halaga ng hinihinalang shabu sa Bagong Silang St., Brgy Hagonoy, Taguig City.
Kinilala ang mga suspek na sina Fortunato Igdao at Peter James Pesigan na kapwa nadakip sa ikinasang buy-bust operation ng Station Drug Enforcement Unit (SDEU) ng Taguig PNP.
Nasabat sa operasyon ang 40,800 pesos na halaga ng umano’y shabu, isang purse, at dalawang daang pisong buy-bust money.
Kasong paglabag sa dangerous drugs act ang isasampa laban sa mga suspek.
NAGKASA ng tatlong linggong partial lockdown ang pamahalaan ng The Netherlands.
Ayon kay Dutch Prime Minister Mark Rutte, ginawa ang hakbang bunsod ng panibagong surge ng COVID-19 cases sa kanilang bansa.
Sa ilalim ng lockdown, dapat sarado na ang lahat ng mga bar, restaurants at supermarkets pagsapit ng alas-8 ng gabi.
Nagwakas ang maliligayang araw ng dalawang kilabot umanong tulak ng droga matapos masakote sa buy-bust operation ng mga awtoridad sa Bagong Paraiso, Brgy. Bayanan, Muntinlupa City.
Kinilala ang mga suspek na sina Jose Quipia the second at Jessie Orcine, parehong nakatira sa nasabing lugar.
Dalawang sachets ng umano’y shabu na nagkakahalaga ng halos pitong libong piso ang nakumpiska mula kina Quipia at Orcine, maliban sa dalawang daang pisong buy-bust money.
Inihahanda na ang kaukulang kasong isasampa laban sa mga suspek.
Kalaboso ang dalawang lalaki matapos mahulihan ng droga sa isinagawang anti-illegal drug operation ng mga awtoridad sa Bambang Nipeles, Brgy Calzada Tipas, Taguig City.
Sinubukan pang tumakas sa Oplan Sita nina Mark lowie Cuevas at Mark Lester Cuevas pero nahuli rin sila ng mga pulis.
Nakumpiska mula sa mga ito ang dalawang sachets ng hinihinalang shabu na nagkakahalaga ng halos pitong libong piso.
Inihahanda na ang mga kaukulang kasong isasampa laban sa mga suspek.
Tinatayang mahigit 50,000 pisong halaga ng ipinagbabawal na droga ang nasabat ng mga awtoridad sa magkakahiwalay na illegal drug operations ng mga tauhan ng Southern Police District (SPD).
Sa J.B. Roxas Street, Barangay Olympia, Makati City, huli sina Mark Anthony Mamaid at Roy Benzon Mamaid kung saan nakuha mula sa mga ito ang 500 pisong buy-bust money at mahigit 9,000 pisong halaga ng shabu at marijuana.
Sa Brgy. Putatan, Muntinlupa, arestado rin ang 21 anyos na si Christopher Alcantara matapos mahulihan ng mahigit 40,000 pisong halaga ng umano’y shabu.
Sasampahan ng kaukulang kaso ang mga nasabing suspek.
Isa nang ganap na doktor ang dating De La Salle Lady Spiker na si Mika Esperanza.
Ito’y matapos pumasa si Esparanza sa 2021 Physician Licensure Exam.
Matatandaang naging bahagi si Esperanza ng DLSU champion team na nakasungkit ng korona sa UAAP Season 78 women’s volleyball.
Nakakulong ngayon ang isang aktibong pulis matapos umanong pagbabarilin ang tatlong estudyante sa Bagumbayan, Sultan Kudarat.
Ayon kay Police Brig. Gen. Alexander Tagum, hepe ng Police Regional Office 12, ang suspek na si Patrolman Roland Lopez, dalawampu’t siyam na taong gulang, ay nakatalaga sa 1st PMFC, South Cotabato Police Provincial Office.
Batay sa imbestigasyon, naganap ang pamamaril sa isang boarding house sa Brgy. Zone 3 sa Koronadal City kung saan nasawi ang estudyanteng si Charmaine Rose Canlas bunsod ng tatlong tama ng baril.
Kasalukuyang nilalapatan ng lunas sa South Cotabato Provincial Hospital ang dalawa pang sugatan na estudyante.
Inaalam pa ng pulisya ang motibo sa naturang pamamaril.