Gilbert Perdez

Nadagdagan pa ng 25 ang bilang ng mga Pilipino abroad na dinapuan ng COVID-19.

Dahil dito, ayon sa Department of Foreign Affairs (DFA), umakyat na sa 10,385 ang mga Pinoy na nagkaroon ng impeksiyon sa ibang bansa.

Sumampa naman sa 6,593 ang total recoveries kasunod ng paggaling ng 15 pang Pinoy.

Samantala, ayon pa rin sa DFA, nananatili sa 777 ang death toll sa hanay ng mga Pinoy sa ibayong dagat dahil wala namang nadagdag sa naturang listahan.

Dalawa pang empleyado ng House of Representatives ang nagpositibo sa COVID-19.

Dahil dito, ayon kay House Secretary General Jose Luis Montales, sumampa na sa 78 ang mga tinamaan ng coronavirus sa lower house.

Sinabi ni Montales na ang isa sa mga pinakahuling COVID-19 positive sa Kamara ay miyembre ng security staff at pumasok pa sa trababaho noong Setyembre 7 at 9.

Samantala, ang isa pang kawani na dinapuan ng virus ay mula sa Legislative Library Service na kasalukuyang nasa working from home arrangement mula pa noong Hulyo 24.

Nakaranas umano ito ng mga sintomas ng COVID-19 matapos dalawin ang naaksidente nitong kapatid sa isang ospital.

Idinepensa ng chairman ng House committee on Appropriations ang mas malaking infrastructure budget para sa Taguig City ang dalawang distrito ay kinakatawan ng mag-asawang sina House Speaker Alan Peter Cayetano at Rep. Lani Cayentano.

Para kay ACT-CIS Party-list Rep. Eric Go Yap, House budget panel chair, wala siyang nakikitang masama kung mabibigyan ng mahigit P11-B halaga ng mga proyekto ang Taguig mula sa Department of Public Works and Highways (DPWH).

Paliwanag ni Yap, natural lamang na magkaroon ng malaking badyet ang lungsod dahil tahanan ito ng mga kampo at base militar kung saan ibinubuhos ang pondo.

Matatandaang sinita ni Negros Oriental 3rd District Rep. Arnolfo Teves Jr. sa nakaraang budget hearing ang paglalaan ng malalaking proyekto ng DPWH sa Taguig at Camarines Sur (CamSur) para sa susunod na taon.

Muling nagbabala sa publiko ang Department of Health (DOH) laban sa paggamit ng hydroxychloroquine para sa mga pasyenteng tinamaan ng COVID-19.

Ayon sa DOH, hindi inirerekomenda ang chloroquine at hydroxychloroquine para sa mga pasyente na mayroong probable o confirmed COVID-19 pneumonia, gayundin sa mga outpatients na may mga sintomas ng coronavirus.

Ang dalawang nabanggit na gamot ay kilalang ginagamit bilang lunas laban sa malarya.

Giit pa ng ahensya, ang pinaka-epektibo pa ring panlaban sa COVID-19 ay ang palagiang paghuhugas ng kamay, pagsusuot ng face mask, at pagsunod sa itinatakdang physical distancing.

Inatasan ng Bangko Sentral ng Pilipinas (BSP) ang lahat ng financial institutions na sumunod sa 60 araw na grace period o palugit sa pagbabayad ng utang ng kanilang mga kliyente.

Ayon kay BSP Gov. Benjamin Diokno, ito’y bilang pagtalima sa Bayanihan 2 law na epektibo simula noong Setyembre 15.

Batay aniya sa batas, hindi rin dapat maningil ng interes, penalties, fees at iba pa ang mga financial firms sa kanilang mga kustomer hanggang Dec. 31, 2020.