DWIZ 882

Balik-operasyon na ang mga flight sa Ninoy Aquino International Airport (NAIA), ilang oras matapos ang naganap na aberya sa air traffic system.

Magugunitang nagkaroon ng technical problem sa air traffic system ngayong araw dahilan para maantala ang flight nang nasa 56,000 na pasahero.

Samantala, patuloy pa rin sa paggawa ng mga hakbang ang Civil Aviations Authority of the Philippines (CAAP) para agarang maibalik sa normal ang byahe sa mga terminal ng NAIA. —mula sa panulat ni Hannah Oledan

Nakatitiyak si House Ways and Means Committee chair Joey Salceda na kayang makipagsabayan ng Pilipinas sa Vietnam at India bilang fastest growing economy sa Asia-Pacific Region ngayong taon.
Inaasahan din ni Salceda ang pagbaba ng inflation rate sa susunod na taon.
Unti-unti namang bumabalik ang tiwala ng mga pribadong sektor na maibabalik sa pre-pandemic level ang unemployment rate sa bansa.
Anang mambabatas, kailangan lang na maging agresibo ng pamahalaan upang maibenta ang Pilipinas bilang manufacturing destination.
Ito ay matapos makapagtala ng highest annual growth rate na 76.4% ang manufacturing sector noong Oktubre nang nakaraang taon.
Samantala, sinabi rin ni Salceda na dapat mahimok ang investors sa BPO at technological manufacturing sector na mamuhunan sa Pilipinas, kasunod ng paglipat ng mga semi-conducting manufacturing company mula China patungo sa mga bansa na kaalyado ng Amerika. —mula sa panulat ni Hannah Oledan

Itinakbo sa East Avenue Medical Center (EAMC) ang isang lalaki matapos matamaan ng kuwitis sa likod, ilang minuto matapos ang pagsalubong sa bagong taon.

Sinabi ni Dr. John Paul Ner, tagapagsalita ng EAMC, ikalawang kaso ito ng fireworks-related injuries sa ospital.

Bukod pa rito, hindi umano gumagamit ng paputok ang pasyente habang wala namang naitalang kaso ang ospital ng firecracker poisoning.

Matatandaang sinabi ng pamunuan ng ospital na handa sila sa pagdagsa ng mga pasyente na magiging biktima ng paputok.

Samantala, nakapagtala ng 15 kaso ng mga pasyente na isinugod sa ospital dahil sa aksidente sa daan.

Batay sa ulat ng Department of Health (DOH) pumalo na sa mahigit 85 ang kabuuang kaso ng mga nasugatan dahil sa paputok. —sa panulat ni Maze Aliño – Dayundayon

Hinimok ni Pangulong Ferdinand Bongbong Marcos Jr. ang mga Pilipino ngayong taong 2023 na magkaisa at maging matatag sa gitna na rin ng mga kinakaharap na hamon ng bansa kabilang na ang pagtaas ng mga presyo ng mga bilihin.

Dagdag pa ni Marcos Jr. mapagtatagumpayan ang mga hamon dahil na rin sa bayanihan spirit ng mga Pinoy.

Sumipa ang inflation sa 8.8% noong nakalipas na buwan ng Nobyembre. —sa panulat ni Maze Aliño – Dayundayon