DWIZ 882

Mahigit 400 mula sa 677 nakalistang recipient ng confidential funds ng Office of the Vice President at Department of Education sa ilalim ng pamumuno ni Vice President Sara Duterte, ang natuklasang walang birth record sa Philippine Statistics Authority.

Ito ang isiniwalat ni House Committee on good Government and Public Accountability Chairman at Manila 3rd District Rep. Joel Chua, sa huling pagdinig hinggil sa paggastos ng confidential funds ni VP Sara.

Una nang kinumpirma ng PSA na wala sa kanilang database ang pangalan na mary grace piattos at Kokoy Villamin, na kapwa nakapirma sa acknowledgment receipts na isinumite ng OVP at DEPED.

Tila ipinagkibit-balikat lamang ni Vice President Sara Duterte ang mga impeachment complaint laban sa kanya upang masagot niya ang mga akusasyong ibinabato laban sa kanya.

Ayon kay VP Sara,  mas mainam na rin  ito para hindi na nadadamay ang mga tauhan niya sa Office of the Vice President at Department of Education noong siya pa ang kalihim nito.

Matatandaang dalawang impeachment complaint na ang nakahain ngayon sa kamara laban sa Bise Presidente.

Kasama sa grounds ng impeachment complaint ang kinukuwestiyong paggamit ng kanyang mga tanggapan ng confidential funds at pahayag na may inutusan na siyang papatay kina Pangulong Ferdinand Marcos Jr., First Lady Liza Araneta-Marcos at Speaker Martin Romualdez may mangyaring masama sa kaniya.

Mahigit 41,000 pulis ang ipakakalat sa buong bansa ngayong holiday season.

Ayon kay PNP Spokesperson Brigadier General Jean Fajardo, idi-deploy ang mga pulis sa mga pangunahing lansangan, simbahan, transportation terminals at tourist spots.

Simula December 15, wala na aniyang pulis na papayagan na mag-leave, upang matiyak ang seguridad ng publiko ngayong holiday season.

Sa ngayon aniya ay wala silang namo-monitor na banta ngunit posible pang mabago ang bilang ng deployment ng mga pulis depende sa pangangailangan ng isang lugar.

Pinag-iingat naman ng pnp ang publiko kaugnay sa online scams at iba pang krimen at pinayuhan ang mga ito na makipag-transaksyon lamang sa mga lehitimong shopping websites.

May go signal na mula sa Land Transportation Franchising and Regulatory Board (LTFRB) ang pag-arangkada ng mga motorcycle taxi sa Central Luzon at Calabarzon o mga lalawigan ng Cavite, Laguna, Batangas, Rizal at Quezon.

Hanggang nitong Mayo, pinayagan ng LTFRB ang 8,000 slot para sa apat na MC taxi operators para mag-operate sa labas ng Metro Manila.

Saklaw ito ng regulasyon ng iba’t ibang ahensya ng gobyerno at ng motorcycle taxi technical working group.

Ayon kay LTFRB Chairman Teofilo Guadiz III, ang hakbang na ito ay para ma-serbisyuhan ang dumaraming mga pasahero habang tinitiyak na nakakasunod ang MC taxis sa safety standards.

Matatandaang aprubado na sa Kamara ang house bill 10424, o ang panukala na nagbibigay-daan sa mga motorsiklo para maging mode of transportation ng publiko, ngunit hindi pa naipapasa ng Senado ang bersyon nito.

Aminado si Senate Committee on Way and Means Chairman Sherwin Gatchalian na mga kawani mismo ng mga local government unit ang nagbebenta ng mga pekeng persons with disability identification cards.

Ito ayon kay Senador Gatchalian, matapos mapag-alamang may 8.5 million na pekeng PWD ID ang na-produce sa bansa.

Sinabi rin ni Senador Gatchalian sa DWIZ, na nasa 88 billion pesos ang nawawalang pera sa kaban ng bayan dahil hindi nagbabayad ng buwis ang mga may-ari nito.

Dahil dito, gumagawa na aniya ng paraan ang pamahalaan upang mapanagot ang sinumang sangkot sa nasabing iligal na aktibidad.

Inaasahang makakauwi na ang OFW na si Mary Jane Veloso bago mag-Pasko.

Ito, ayon kay Justice Secretary Crispin Remulla, kung saan nasa huling bahagi na ng pagtalakay at paglagda sa kasunduan ang gobyerno ng Pilipinas at Indonesia sa paglilipat ng kustodiya.

Sinabi naman ni Undersecretary Raul Vasquez, kumatawan sa Depertment of Justice, na “fair and equitable” sa magkabilang panig ang nilalaman ng kasunduan kung saan pinaplantsana ang nasabing kasunduan.

Samantala,  naghahanda na rin ang Bureau of Corrections at ang National Bureau of Investigation para sa mga gagawing paglilipat kay Veloso.

Handang aksyunan ng kamara ang inihaing impeachment complaint kay Vice President Sara Duterte dahil mandato ito ng konstitusyon.

Ayon kay House Assistant Majority Leader at Tingog Party-List Rep. Jude Acidre, Chairman ng House Committee on Overseas Workers Affairs, ang mababang kapulungan ang mangangasiwa sa mga impeachment compalint kay VP Sara habang ang Department of Justice naman ang hahawak kasong pagbabanta nito sa buhay nina Pangulong Ferdinand Marcos jr., First Lady Liza Araneta Marcos at House Speaker Martin Romuladez.

Bagama’t may personal na pag-aalinlangan, sinabi naman ni Bataan 1st District Rep. Geraldine Roman, Chairperson ng House Committee on Women and Gender Equality, kailangang gampanan ng kongreso ang mandato na sinasaad sa konstitusyon.

Una nang hinimok ni Pangulong Marcos ang kanyang mga kaalyado sa kongreso na huwag nang ituloy ang mga planong impeachment laban sa Bise Presidente, na aniya’y hindi ito makabubuti sa mga Pilipino at makakaabala lamang sa pagtutok kaysa mas mahahalagang isyung pambansa.

Tiniyak naman ng kongresista sa publiko na ang proseso ng impeachment ay isasagawa nang tapat at naaayon sa rule of law.

Duda si Senate Minority Leader Aquilino ‘Koko’ Pimentel the III na mananatiling patas ang mga Senador sa pagboto at desisyon sakaling maiakyat na sa senado ang impeachment complaint laban kay Vice President Sara Duterte.

Ayon kay Senador Pimentel, dapat tutukan ng publiko ang paglilitis nang sa gayon ay maging husgado rin ang mga ito at makita kung sino ang talagang nagsasabi ng totoo.

Kaugnay nito, sakali naman aniyang maiakyat na sa senado ang reklamo, bibigyan nila ng pagkakataon si VP Sara para maipaliwanag ang kanyang panig.

Malamig si Senate Minority Leader Aquilino ‘Koko’ Pimentel III na mananatiling patas ang mga senador sa pagboto at desisyon sakaling maiakyat na sa Senado ang impeachment complaint laban kay Vice President Sara Duterte.

Ayon kay Senador Pimentel, dapat tutukan ng publiko ang paglilitis nang sa gayon ay maging husgado rin ang mga ito at makita kung sino ang talagang nagsasabi ng totoo.

Kaugnay nito, sakali aniyang maiakyat sa Senado ang reklamo sa susunod na linggo ay bibigyan nila ng pagkakataon si VP Sara na maipaliwanag ang kanyang panig. - Sa panulat ni Laica Cuevas