DWIZ 882

Inaprubahan ng Bicameral Conference Committee Budget ang desisyon ng Kamara de Representantes na pondohan ang Ayuda sa Kapos ang Kita Program.

Binigyang-diin ni House Speaker Martin Romualdez, na mahalaga ang nasabing programa para sa mga pilipinong may trabaho ngunit hindi sapat ang kita.

Ayon kay House Committee on Appropriations Chairman at Ako Bicol Party-List rep. Zaldy Co, ang AKAP ay pinaglaanan ng kabuuang 26 bilyong pisong pondo sa ilalim ng panukalang pambansang badyet para sa 2025.

Dahil dito, nagpasalamat si Speaker Romualdez sa mga senador sa kanilang suporta sa akap at pinuri ang House Committee on Appropriations na pinamumunuan ni Ako Bicol Party-List rep. Zaldy Co, para sa matagumpay na pagtatanggol ng mga panukalang badyet.

Tuluy-tuloy pa rin sa pagkilos ang pamahalaang Lungsod ng Canlaon City dahil sa patuloy na pag-aalburoto ng bulkang Kanlaon.

Sa panayam ng DWIZ, binigyan-diin ni Canlaon City Mayor Jose Cardenas na patuloy nilang pinaghahandaan ang worst case scenario.

Kaugnay nito, nangangamba naman ang Alkalde na posibleng hindi na kayanin pa ng kanilang pamahalaan kung magtatagal pa ang mga volcanic activities, dahil anya nasa survival mode na ang kanilang lungsod. - Sa panulat ni Kat Gonzales

Nilinaw ng Metropolitan Manila Development Authority na wala silang patakaran na nagbabawal sa mall-wide sales.

Sa pagdinig ng Senate Committee on Public Services, sinabi ni MMDA Director 3 for Enforcement Atty. Victor Nuñez, na nakiusap lamang sila na huwag gawing sabay-sabay ang sale ng lahat ng retailers o merchants sa mga mall; at abisuhan sila kaugnay dito para mapag-planuhan ang traffic flow at deployment ng Traffic Enforcers.

Kaugnay nito, hiniling naman ni Sen. Raffy tulfo, Chairman ng Komite, sa mall operators na huwag magsabay-sabay ng sale ang kanilang mga branch para hindi magkabuhol-buhol ang traffic sa Metro Manila.

Ibinasura ng Sandiganbayan ang dalawang civil case laban kay dating pangulong Ferdinand Marcos Sr., dating first lady Imelda Marcos, dating presidential legal counsel Juan Ponce Enrile, at iba pa kaugnay sa sinasabing pagnanakaw sa kaban ng bayan.

Ayon sa resolusyon na inilabas ng anti-graft court, ibinasura ang mga kaso matapos iurong ng pamahalaan ang mga demanda kaugnay sa sinasabing maanumlyang paggamit sa coco levy fund.

Nauna na ring nagpasya ang presidential Commission on Good Government na hindi na nito itutuloy ang paghahabol sa danyos na kanilang hinihiling sa mga inihaing reklamo.

Mababatid na nagsampa ng reklamo ang PCGG noong July 31, 1987 upang mabawi ang mga yaman ng defendant.  – Sa panulat ni John Riz Calata

Walang problema na ibalik ang budget ng kontrobersyal na Ayuda sa Kapos ang Kita o AKAP Program ng Department of Social Welfare and Development.

Giit ni Senator Imee Marcos na ito’y kung magiging klaro ang mga panuntunan at kung sinu-sino ang mga benepisyaryo ng programa na dati nang nadawit sa pekeng People’s Initiative para sa charter change.

Ayon kay Super Ate, hindi naman siya tutol sa AKAP kundi nais lamang niyang magarantiya na makararating ang bilyones nitong pondo sa mga tunay na nangangailangan.

Nilinaw din ng Senador na hindi niya ni-re-align sa ibang programa ang inalis niyang 39-na bilyong pisong proposed budget ng AKAP sa ilalim ng Senate version ng 2025 national budget.

Matatandaang inirekumenda ni Senator Marcos na siyang sponsor ng DSWD budget na pag-isahin na lamang ang AKAP at ang Assistance to Individuals in Crisis situation ng DSWD dahil parehas lang naman aniya ang tinutulungan nitong sektor.

Naging kontrobersyal ang Akap nang sabihin ng presidential sister na ginamit ito ng ilang kongresista upang lituhin aniya ang mga pilipino at himukin ang mga itong sumuporta sa People’s Initiative.

Walang sapat na ebidensya upang maiugnay si dating pangulong Rodrigo Duterte sa iligal na operasyon ng mga POGO sa bansa.

Ito ayon sa Justice Undersecretary Nicholas Felix Ty, ay matapos ang kanilang magsagawa ng imbestigasyon sa kada pogo sa bansa.

 Sinabi pa ni Usec. Felix Ty, wala silang nakitang nagkokonekta sa dating pangulo sa antas ng pang-indibidwal na pogo.

 Salungat ito sa inilabas na POGO matrix ni Senador Risa Hontiveros kung saan iniugnay nito si dating pangulong Duterte kay Michael Yang, dating presidential adviser ni FPRRD, na sangkot sa operasyon ng mga iligal na POGO sa bansa.  - Sa panulat ni John Riz Calata

Naniniwala ang isang miyembro ng Kamara na ‘peke’ o gawa-gawa lamang ang sinabi ni Vice President Sara Duterte na mayroong nais pumatay sa kanya, gaya ng mga karakter na sina “Mary Grace Piattos” At “Kokoy Villamin,” na ginamit sa pagtanggap ng confidential fund ng Pangalawang Pangulo.

Tinawag ni Assistant Majority Leader at Tingog Partylist Rep. Jude Acidre na “peke” ang mga alegasyon ni Duterte ukol sa banta ng pagpatay at patunay dito ang hindi nila pagre-report nito sa Armed Forces of the Philippines at Philippine National Police.

Kung mayroon anyang mga banta, tanging si VP Sara ang narinig nilang gumawa nito partikular ang kontrobersyal na pahayag na umano’y kumuha ito ng “hit-man” upang ipapatay sina Pangulong Ferdinand Marcos Jr., First Lady Liza Araneta-Marcos at House Speaker Martin Romualdez kung sakaling may mangyari sa kanya.

Nagsimula na rin ang National Bureau of Investigation ng kanilang imbestigasyon sa mga naging pahayag ng Bise Presidente.

Inihalintulad ni Acidre ang mga banta ni Duterte sa mga pekeng identity nina “Mary Grace Piattos” at “Kokoy Villamin,” na mga pangalan sa  acknowledgment receipts na isinumite ng Office of the Vice President at Department of Education sa Commission on Audit bilang patunay ng paggastos sa kabuuang 612.5 million peso confidential fund.

Inaasahan na ng PAGASA ang posibilidad na may mabuo na isang bagyo sa loob ng Philippine Area of Responsibility sa susunod na linggo.

Ito’y batay sa typhoon cyclone threat potential forecast ng weather bureau kung saan maaaring maapektuhan ng sama ng panahon ang Visayas at Southern Luzon.

Gayunman, walang namo-monitor sa ngayon na sama ng panahon ang pagasa sa loob ng monitoring domain nito subalit maaaring mabuo ito sa ikalawang linggo ng December.

Sa oras na makapasok at magkaroon ng panibagong bagyo sa loob ng PAR ay tatawagin itong querubin at magiging pang-17 bagyo na makakaapekto sa bansa ngayong taon.

Posible maharap sa kasong plunder at graft ang mga responsable sa maling paggastos ng confidential fund ni Vice President Sara Duterte.

Ito’y batay sa mga ebidensyang nakalap ng House Committee on Good Government and Public Accountability.

Sinabi ni Antipolo Rep. Romeo Acop na ang kawalan ng transparency at accountability sa paggamit ng pondo ng bayan ay nagpapakita ng mga paglabag sa batas at sa Commission on Audit-Department of Budget and Management joint circular kung saan nakasaad ang mga panuntunan sa paggastos ng confidential funds.

Dagdag pa ni Cong. Acop, “tila  sinasadya silang lituhin, iligaw at paguluhin ang pahayag ng mga tauhan ng tanggapan ng Bise Presidente sa kung ano ba talaga ang nangyari sa confidential funds ng OVP at DEPED.