DWIZ 882

Magkakasa ng rally ang Iglesia ni Cristo bilang suporta sa pahayag ni Pangulong Ferdinand Marcos Jr., na tutulan ang impeachment complaint laban kay Vice President Sara Duterte.

Ayon sa INC, ang pagsasagwa ng mapayapang protesta ay upang suportahan ang panawagan ni Pangulong Marcos na huwag ng  ituloy ang paghahain ng impeachment complaint kay VP Sara dahil wala itong maidudulot na kabutihan para sa bansa.

Gayunman, nakahanda ang Philippine National Police sakaling matuloy ang nasabing rally ng INC kung saan mag-de-deploy na sila ng mga pulis para sa seguridad ng publiko.

Malaya pa rin ang mga Pilipino na bumiyahe sa South Korea, sa harap ng political tension kaugnay ng laban-bawing pagdedeklara ng martial law sa naturang bansa.

Sa bagong Pilipinas ngayon public briefing, sinabi ni Foreign Affairs Undersecretary Eduardo De Vega na wala pang itinatataas na alert level sa South Korea, at wala ring ipinatutupad na travel ban.

Gayunman, pinaalalahanan ni Usec. De Vega ang mga pilipinong magtutungo sa South Korea na dapat na batid nila ang kasalukuyang sitwasyon at iwasang magtungo malapit sa border o demilitarization zone.

Iniulat din ng DFA official na nananatiling kalmado ang mga overseas filipino worker sa naturang bansa.

Ayon sa DFA, tinatayang nasa 78,000 mga Pilipino ang nagtatrabaho sa South Korea, na karamihan ay machine operators, managers, at farm workers.

Nanindigan si dating presidential spokesman Harry Roque na hindi ito babalik ng pilipinas maliban na lamang kung ipag-u-utos ng korte suprema.

Ayon kay Atty. Roque, may karapatan pa rin siyang maglabas pasok ng bansa dahil wala itong hold-departure order at wala rin aniyang  arrest warrant  laban sa kanya.

Iginiit pa ng dating presidential spokesman na kung gusto ng Quad Committee ng hustisya para sa kanilang imbestigasyon kaugnay sa iligal na POGO, magtungo aniya sila sa korte at kung may katanungan ang mga ito handa niya itong sagutin via zoom.

Aniya, magsusumite siya ng mga dokumento na hinihingi ng quad comm sakaling ipag-utos ito ng supreme court subalit nanindigan ito bilang abogado na tama siya at karapatan nya na manahimik hinggil sa isyu.

Una nang kinumpirma ng Department of Foreign Affairs na personal na nagtungo si Roque at kanyang asawa sa Philippine Embassy sa Abu Dhabi para sa notarial services  na gagamiting dokumentaryo sa Pilipinas.

Si Roque ay nagsumite ng counter affidavit na naka-notarized sa UAE para sa inahaing reklamong qualified human trafficking laban sa kaniya na may kinalaman sa iligal POGO sa bansa.

Nanawagan ang young guns ng kamara kay Vice President Sara Duterte, na tigilan na ang pagmamanipula sa taumbayan.

Ayon kay Tingog Partylist Rep. Jude Acidre, kailangan nang tuldukan ni VP Sara ang sinasabing “Gaslighting” o paglilihis sa atensyon ng taumbayan at ang pambabatikos nito sa mga miyembro ng kamara.

Hiling ni Congressman Acidre, ituon na lamang ng Pangalawang Pangulo sa mandato ng konstitusyon ang kaniyang atensyon.

Iginiit din ng mambabatas ang kahalagahan ng integridad; responsibilidad; at paggalang sa tiwala ng taumbayan sa pagsisilbi sa publiko.

Dagdag pa nito, tungkulin ni VP Sara na pangalagaan at ipagtanggol ang saligang batas kung saan ang tungkulin aniya nito sa pamahalaan ay hindi pribilehiyo o plataporma para sa titulo kundi isang sagradong posisyon hinggil sa pagpapanatili sa tiwala ng publiko.

Binigyang diin pa ng Tingog solon, ang karapatan ng taumbayan na magkaroon ng mahusay na pamamahala, transparency, at responsableng paggamit ng yaman ng bayan na mahalagang maisabuhay ng bawat lider ng bansa.

Walang sapat na panahon para matalakay ang isinusulong na impeachment complaint laban kay Vice President Sara Duterte.

Ayon kay Senate President Pro Tempore Jinggoy Estrada, malabo pa sa ngayon na matalakay ang nasabing usapin.

Hindi rin aniya mapapabilis ng kongreso ang mga paglilitis, dahil inaasahan nila ang malalaking dokumento na maaaring iharap sa mga pagdinig ng impeachment.

Naniniwala rin ang senador na walang idudulot na mabuti ang anumang uri ng impeachment complaint.

Kasado na sa susunod na taon ang mas mataas na singil sa tubig dahil ipatutupad na ng concessionaires ang third tranche ng 5-year staggered rate adjustment na nagsimula noong  2022.

Ayon sa Metropolitan Waterworks and Sewerage System, ang nakatakdang pagtaas simula January 2025 ay 2.12 pesos per cubic meter para sa Maynilad at 3.25 pesos per cubic meter sa Manila Water.

Sinabi ng MWSS na hindi pa kasama rito ang computation para sa inflation kaya’t wala pang final water rate hike.

Kaugnay nito, ipinabatid ng maynilad na nakumpleto na nito ang ilang proyekto para sa 2024 at dapat nang magpatupad ng 3rd tranche ng rate increase upang matustusan ang iba pang mga proyekto sa 2025 at mabayaran ang mga pagkakautang mula sa pagkumpleto sa mga dating proyekto.

Inanunsyo ng PAGASA na posible nang ideklara ang pagsisimula ng La Niña season sa mga darating na araw.

Ayon kay PAGASA Administrator Nathaniel Servando, maaari na nilang ideklara ang pagsisimula ng short-lived La Niña o La Niña-like condition ngayong linggo o kaya sa susunod na linggo.

Batay sa pagtaya PAGASA, posibleng tumagal ang nasabing weather phenomenon hanggang sa unang quarter ng 2025.

Dahil dito, sinabi ng weather-state bureau na mas malaki ang tyansa na mamuo ang convective clouds na nagdadala ng mga pag-ulan, pagkidlat-pagkulog, at tropical cyclones, na maaaring magdulot ng higit sa normal na pag-ulan sa ilang bahagi ng bansa.

Binigyang-diin ng ahensiya na posible ring magresulta sa mga pagbaha at pagguho ng lupa sa mga lugar ang La Niña.

Hinatulan ng korte sa Cambodia ng apat na taong pagkakakulong ang 13 Pilipinang buntis dahil sa pagiging surrogate.

Ayon sa korte sa lalawigan ng Kandal, kabilang ang 13 sa 24 na dayuhang kababaihan na ikinulong sa Kandal at kinashuhan ng attempted cross-border human trafficking.

Bukod sa 13 Pilipina, ikukulong din sa loob ng dalawang buwan at isang araw ang isang Cambodian citizen dahil sa pakikibagsabwatan sa mga suspek.

Kaugnay nito, pitong iba pang Filipino at apat na Vietnamese na kababaihan na hindi buntis ang ipina-deport na ng Cambodian government.

Hindi pa idinedetalye ng Kandal Court kung ano ang gagawin sa mga sanggol na ipapanganak ng 13 Pinay sa Cambodia. – Sa panulat ni John Riz Calata

Nais ni Senador Ronald Dela Rosa na  humingi ng tulong sa supreme court para linawin kung may hurisdiksyon pa rin ang International Criminal Court sa Pilipinas.

Kasunod ito ng pahayag na posibleng maharap si Dela Rosa sa arrest warrant mula sa ICC kaugnay ng mga pagpatay  sa war on drugs ng administrasyong Duterte.

Ayon kay Senador Dela Rosa, “wala siyang problema” Kung ang SC ang magdesisyon na ang bansa ay mananatili sa hurisdiksyon ng international court.

Aniya, hindi siya natatakot para sa kaniyang sarili.

Gayunman, binigyang-diin pa ng Senador na dapat igalang ng pamahalaan ang desisyon kung iba ang desisyon ng korte suprema.  – Sa panulat ni Jeraline Doinog

Umalma si Davao City Representative Paolo Duterte sa impeachment complaint laban sa kaniyang kapatid na si Vice President Sara Duterte na inihain sa kamara ng mga kinatawan ng ibat-ibang grupo.

 Kasunod ito ng naging pahayag ni dating senator Leila De Lima na panahon na para ma-impeach si Inday.

 Sa social media post Rep. Duterte, sinabi nito na nais ba ni De Lima na ito ang mamuno sa bansa pati ang mga ka-tropa nito na corrupt, addict at terorista.

 Kasama rin sa mensahe ni Pulong na sana ay isalba ng diyos ang Pilipinas laban sa nabanggit na mga indibidwal.

 Si De Lima, ang tumatayong tagapagsalita ng labing anim na complainant sa reklamong impeachment laban kay VP Sara.  – Sa panulat ni Jeraline Doinog