DWIZ 882

Aprubado na ni Pangulong Rodrigo Duterte ang rekomendasyon ng Department of Labor and Employment na total ban sa pagpapadala ng mga Pilipinong manggagagwa kabilang ang mga skilled worker sa Kuwait.

Ayon kay Presidential Spokesperson Salvador Panelo, ang pasiya ng Pangulo ay kasunod ng tila tangka ng Kuwaiti Government na itago ang impormasyon hinggil sa pagkasawi ng Pinay household worker na si Jeanelyn Villavende.

Ito ay matapos naman aniyang lumabas sa isinagawang re-autopsy ng NBI kay Villavende kung saan lumabas na nakaranas ito ng seksuwal na pang-aabuso.

Iginiit naman ni Panelo na mananatiling epektibo ang total deployment ban sa Kuwait hangga’t hindi matitiyak ng Kuwait na kanilang ipatutupad ang lahat ng nakasaad sa nilagdaang labor agreement sa pagitan ng dalawang bansa. — ulat mula kay Jopel Pelenio (Patrol 17)

Makatatanggap ng 300% ng kanilang arawang sahod ang mga manggagawang magtatrabaho sa ika-9 ng Abril ng kasalakuyang taon.

Batay ito sa ipinalabas na abiso ng National Wages and Productivity Commission (NWPC), bunsod na rin ng pagkakatapat sa ika-9 ng Abril sa dalawang regular holiday.

Ito, ang Araw ng Kagitingan at Huwebes Santo o Maundy Thursday.

Sakaling hindi naman pumasok sa trabaho, makatatanggap ang mga manggagawa ng 200% ng kanilang arawang sahod.

Itinuturing ni dating Criminal Investigation and Detection Group (CIDG) chief at ngayo’y Baguio City Mayor Benjamin Magalong na welcome development ang rekomendasyon ng Department of Justice (DOJ) na kasuhan ang 12 mga pulis na sangkot sa kontrobersyal na buy-bust operation Pampanga noong 2013.

Kabilang sa mga pinakakasuhan sina dating PNP Chief Oscar Albayalde at Police Major Rodney Baloyo na siyang nanguna sa anti-illegal drugs operation.

Ayon kay Magalong, nagpapasalamat siya sa DOJ at kay Justice Secretary Menardo Guevarra sa naging hakbang nito na muling buksan ang kaso.

Sinabi ni Magalong, napunta lang noon sa wala ang apat na taon niyang paghihintay sa inihain niyang reklamo laban sa mga pulis na nagsagawa ng kontrobersyal na anti-illegal drugs operation sa Pampanga matapos na mapawalang-sala ang mga ito.

It took them about 4 years na desisyunan, at ang masama pa ron nung nadesisyonan na, nadismiss na. Buti nalang ang ginawa ni Secretary Guevarra, e, inopen niya, nagkaroon ulit ng investigation of case, nalaman nila na mayroong probable cause,” ani Magalong.

Samantala, aminado naman si Magalong na kanya ring ikinalungkot na nabahiran pa ang reputasyon ni Albayalde bago ito magretiro sa serbisyo.  —sa panayam ng Balitang Todong Lakas

Mahigpit nang nakikipag-ugnayan ang lokal na pamahalaan ng Quezon City sa Department of Health (DOH) matapos makumpirma ang kauna-unahang kaso ng polio sa lungsod.

Ayon kay Quezon City Mayor Joy Belmonte, inaalam na nila sa DOH kung ano ang kinakailangang maging susunod nilang hakbang.

Ito ay makaraan aniya nilang mapag-alaman na nakatanggap ng kumpletong limang dose ng anti-polio vaccine ang nagkasakit na bata mula sa Barangay Batasan Hills.

Sinabi ni Belmonte, tatlo sa mga bakuna ang naibigay sa bata noong sanggol pa lamang ito habang dalawang beses din itong nabigyan sa ‘Sabayang Pagpatak’ campaign ng DOH noong nakaraang taon.

I would also like to assure the public that we, in Quezon City, are not pretending to be experts in this area and we are closely coordinating with the DOH as to the next steps that we should take with regards to this issue,” ani Belmonte.

Samantala, umaasa naman si Belmonte na maituturing na lamang ang kaso bilang isolated at hindi na ito kumalat pa. —sa panayam ng Ratsada Balita