DWIZ 882

Libre nang makakadaan sa Cavitex at C5 link flyover ang lahat ng mga magdadala ng relief goods para sa mga biktima ng pagsabog ng bulkang Taal.

Sa isang statement sinabi ng Cavitex Infrastructure Corporation (CIC) na dapat lamang mag email sa kanila sa cx (underscore) customer service at cavitex pressway dot com (cx_customerservice@cavitexpressway.com) ang sinumang gustong makakuha ng free pass para sa Cavitex at C5 link flyover.

Ilagay lamang anila sa email ang pangalan ng organisasyon, address, petsa ng pagdaan, plate number, kulay ng sasakyan, destinasyon at pinagmulan at exit group.

Ang mga may kasabay namang galing sa pamahalaan tulad ng PNP, military o Red Cross ay hindi na kailangang humingi ng free pass.

Dagdag ng CIC, ang free passage ay para lamang sa mga cash lanes.

Hindi natuloy ang part 2 ng  tete-a-tete nina Pangulong Rodrigo Duturte at Presidential spokesman Sal Panelo.

Ang one on one interview ni Panelo sa Pangulo ay isasagawa sana ng 5:00 ng hapon ng Enero 22 (kahapon).

Gayunman, mag a-alas siyete ng gabi nang magpa abiso ang Malakanyang na hindi na matutuloy ang one on one interview dahil may mahalagang dapat harapin ang Pangulo.

Sa halip, inilipat ito sa Enero 28, 5:00 ng hapon.

Nang tanungin ng media si Senador Bong Go kung tungkol saan ang “pressing matter” na dapat  harapin ng Pangulo….tungkol anya ito sa pamilya.

Kinumpirma ni Senador Ronald Dela Rosa na kanselado na ang kanyang U.S. Visa.

Ayon kay Dela Rosa, batay sa naging sagot ng U.S. Embassy sa kanyang official query, kailangan nyang mag aplay uli kung nais nitong magkaruon ng U.S. Visa.

Sinabi ni Dela Rosa na itinanong nya sa U.S. Embassy ang estado ng kanyang U.S. Visa matapos kumalat ang ulat na isa sya sa bawal nang umapak sa Estados Unidos dahil sa naging papel nya sa madugong giyera ng administrasyon kontra illegal drugs.

Sakali anyang magpasya ang Pangulong Rodrigo Duterte na dumalo sa ASEAN-US Summit sa Las Vegas sa Marso, handa syang samahan ito kung ibabalik ng Amerika ang kanyang visa.—ulat mula kay Cely Bueno (Patrol 19).

Pormal nang itinalaga ni Pangulong Rodrigo Duterte bilang Philippine’s Special Envoy to the Organization of Islamic Cooperation (OIC) si Moro National Liberation Front founding chair Nur Misuari.

Ang OIC ay ang pangalawa sa buong mundo na pinakala malaking inter-governmental organization na may 57 bansang miyembro.

Nagsisilbing boses ng mga Muslim sa iba’t ibang panig ng mundo ang nasabing organisasyon.

Una rito, nabanggit na ng pangulo nuong nakaraang taon ang plano nitong italaga sa nasabing posisyon si Misuari.

Ayon sa pangulo tiwala siyang magagampanan ni Misuari ang kaniyang tungkulin at mas lalo nitong mapatatatag ang relasyon ng Pilipinas sa mga Islamic countries.

Marami sa mga Pilipino ang nababahala sa lagay kalusugan ni Pangulong Rodrigo Duterte.

Ito ay batay sa latest survey ng Social Weather Stations (SWS) kung saan lumabas na 72% ng mga Pilipino ang nag-aalala sa lagay ng kalusugan ng pangulo.

Sa survey ipinapakita na 25% ang nagsabing “worried a great deal” habang 47% naman ang “somewhat worried”.

Sa kaparehas na survey, lumabas rin na 61% ng mga Pilipino ang nagsasabing dapat ay ipaalam sa publiko ang tunay na lagay ng kalusugan ng pangulo.

Isinagawa ang survey sa 1,200 respondents sa pamamagitan ng face-to-face interviews mula December 13 hanggang December 16, 2019.

Agad na kinontra ng grupong Laban Konsyumer ang hirit na taas-presyo ng mga manufacturer ng ilang pangunahing bilihin.

Ayon kay Vic Dimagiba, presidente ng grupo, hindi dapat payagan ng DTI ang taas presyo lalo na’t bumaba naman aniya ang presyo ng petrolyo at kuryente.

Ani Dimagiba, mas makakabuti kung kukunsultahin muna ng DTI ang mga grupo ng konsyumer bago aprubahan ang mga hirit sa pagtataas ng presyo.

Aniya, ang mga konsumer ang pumapasan ng pagmamahal ng presyo ng mga bilihin.

Pinag-aaralan ng Department of Trade and Industry (DTI) ang hirit na taas-presyo ng mga manufacturer ng ilang pangunahing bilihin.

Ayon kay Trade Undersecretary Ruth Castelo, kabilang sa mga humihiling ng taas presyo ay mga manufacturer ng ilang brand ng sardinas, karneng de-lata, gatas, kape, condiments, at sabong panlaba.

Aniya nasa 2% hanggang 13% o katumbas ng P0.50 hanggang P2.00 sa kada item ang inihihirit na taas-presyo ng mga ito.

Gayunman sinabi ni Castelo na kanilang sinisikap na walang maging paggalaw sa presyo ng mga pangunahing bilihin.

Setyembre nuong nakaraang taon huling mapalitan ang halaga ng suggested retail price (SRP) ng mga pangunahing bilihin.