Drew Nacino

Nag-alok na si Interior Secretary Benhur Abalos ng kalahating milyong pisong pabuya sa sinumang makapagtuturo sa mga pumatay sa beteranong broadcaster na si Percival Mabasa o Percy Lapid.

Aminado si Abalos na personal niyang pera ang kanyang gagamitin para mapabilis ang pagresolba sa kaso at mabigyang hustisya si Mabasa at pamilya nito.

Welcome naman sa kapatid ni ka Percy, na si Roy Mabasa, ang alok ng kalihim.

Lunes ng gabi nang pagbabarilin ng riding-in-tandem si Lapid malapit sa bahay nito sa barangay Talon Dos, Las Piñas City.

Sinuspinde ng A. Dela Cruz Builders ang konstruksyon ng housing project ng Quezon City Local Government matapos masangkot sa insidente ng pagguho ng scaffolding na ikinasawi ng isang trabahador.

Ito’Y upang maayos na makapag-imbestiga ang pulisya sa lugar na pinangyarihan ng insidente sa barangay Balingasa, noong Martes.

Ang A. Dela Cruz Builders ang private contractor ng nasabing proyekto sa Sto. Cristo street.

Ayon sa Quezon City Police District, bigla na lamang gumuho ang metal scaffolding sa construction site kaya’t nahulog ang mga manggagawa na ikinasawi ng isa sa mga ito na si Francis Azures, kwarenta’y singko anyos, residente ng barangay Baesa.

Sampung iba pa ang nasugatan sa nangyaring insidente na pawang nagtamo ng minor injuries.

Samantala, nagpaabot na umano ng tulong ang private contractor sa pamilya ng mga biktima.

Umapela ang Department of Migrant Workers ng dagdag-pondo para sa kanilang capital outlay sa susunod na taon.

Sa pagdinig ng Senado sa 2023 budget NG DMW, tinukoy ni Undersecretary for Finance and Internal Affairs Atty. Maria Anthonette Velasco-Allones na malaki ang binawas ng Department of Budget and Management sa kanilang orihinal na budget proposal.

Mula sa P7.938 billion na ipinanukala ng DMW, aabot lamang sa P3.509 billion ang inaprubahan ng DBM.

Ayon naman kay Migrant Workers Secretary Susan “Toots” Ople, kailangan ng dagdag-pondo lalo na sa capital outlay ng ahensya dahil magtatayo pa sila ng mga regional offices.

Bukod pa anya ito sa mga ospital para sa mga ofw at kanilang mga pamilya at surveillance laban sa mga illegal recruiter.

Nasa P460.4 million ang hirit na pondo ng DMW sa kanilang capital outlay pero P50.5 million lang ang ibinigay ng DBM o 89% ang ibinaba mula sa original proposal.

Kukulangin din ang nasabing pondo dahil plano ng ahensya na maglunsad ng ‘digitalization’ upang masawata ang korapsyon at mapadali ang proseso ng pag-a-apply ng mga ofw. —- Mula sa ulat ni Cely Ortega-Bueno (Patrol 19)

May hawak ng lead ang Southern Police District (SPD) sa kaso ng pananambang at pagpatay sa beteranong broadcaster na si Percival Mabasa o Percy Lapid.

Ito ang kuhang video sa dashcam ng sasakyan ni Mabasa at cellphone na itinurn-over ng pamilya ng biktima.

Ayon kay Roy Mabasa, nakababatang kapatid ni ka Percy at dati ring mamamahayag ng Manila Bulletin, inaasahan nila na magkakaroon na ng resulta ang imbestigayon ng pulisya.

Pinag-aaralan na rin anya ng SPD ang c.c.t.v. footage na galing naman sa barangay na nakasasakop sa BF Resort Subdivision, Las Piñas City na pinangyarihan ng krimen.

Batay sa inisyal na report, ang lalaki na nakita sa footage ang pinaniniwalaang bumaril at pumatay kay Lapid.

Samantala, inihayag naman ni Las Piñas Police Chief, Col. Jaime Santos na hinihintay pa rin nila ang resulta ng digital forensic test sa cellphone ni ka Percy upang matukoy ang huling nakausap nito o kung nakatanggap ng death threat.

Lumarga na ang tulong kabuhayan sa balik probinsya program ng gobyerno makaraang simulan ang inisyal na distribusyon ng mga alagang baboy para sa balik probinsya, bagong pag-asa program beneficiaries.

Ayon sa Department of Agriculture, ang mga principal beneficiaries sa lalawigan ng Isabela ay nakatanggap ng tig-apat na alagang baboy habang dalawa ang natanggap ng iba pang mga benepisyaryo.

Nasa 116 heads na baboy ang naipamahagi sa mga benepisyaryo sa mga bayan ng Tumauini, Roxas at Sta. Maria simula Setyembre a – 28.

Una nang naantala ang pamamahagi ng mga alagang baboy dahil sa kakulangan ng supply bunsod ng pagkalat ng african swine fever na lubhang naka-apekto sa mga hog raiser sa Cagayan Valley Region.

Mamamahagi rin ng libreng feeds sa mga benepisyaryo para sa tatlong buwan na pagkain ng kanilang mga alagang baboy.

Mahabang pila ang sumalubong sa mga mananakay ng MRT-3 sa kalagitnaan ng rush hour, kahapon.

Bunsod ito ng naranasang technical glitch sa signaling system sa track circuit malapit sa Taft Avenue Station, sa Pasay City, pasado alas-4 ng hapon.

Ayon sa pamunuan ng MRT-3, nagpatupad ng provisional service sa pagitan ng North Avenue Station at Shaw Boulevard Station.

Dakong ala-7 naman kagabi ay balik na sa full operations ang biyahe mula North Avenue Station at Taft Avenue Station.

Kinumpirma ng Palasyo na nagbitiw na sa puwesto sina Press secretary Trixie Cruz-Angeles at Commission on Audit (COA) chairman Jose Calida.

Ayon kay Senior Deputy Executive Secretary Hubert Guevara, kapwa medical reasons ang ibinigay na dahilan nina Cruz-Angeles at Calida.

Nagpasalamat naman anya si Cruz-Angeles kay Pangulong Ferdinand “Bongbong” Marcos Jr.

Nilinaw ni Guevarra na nasa proseso pa sila ng pagtulong sa tanggapa ng Press Secretary at paghahanap ng kapalit sa nabakanteng posisyon.

Bukod kay Angeles, inihayag naman ni Executive secretary Lucas Bersamin na tinanggap na ng Pangulo ang pagbibitiw ni Calida.

Nagresign si Calida matapos ma-bypass ng Commission on Appointments.

Nanghihinayang anya si Pangulong Marcos sa pagbibitiw ng COA chief na wala pa ring kapalit.

Samantala, kinumpirma rin ni Bersamin na wala nang kahit anong posisyon sa Marcos Administration si dating Executive secretary Vic Rodriguez.

Isang highschool teacher ang patay matapos saksakin ng estudyante sa Basey, Samar.

Kinilala ang biktimang si George Lauron, 32-anyos, guro sa Basey National High School habang suspek ang isa umanong 19-anyos na Senior High School student.

Naganap ang krimen sa tinutuluyang boarding house ng biktima sa Barangay Sulod, dalawang araw bago ang National Teachers Day.

Ayon sa Basey Municipal Police, nag-iinuman si Lauron at ang suspek kasama ang isa pang lalaki nang magkaroon ng argumento ang guro at estudyante.

Nagalit umano ang mag-aaral at sinaksak niya sa dibdib ang biktima gamit ang isang kutsilyo.

Naisugod pa sa ospital si Lauron pero hindi na umabot ng buhay habang sumuko ang suspek sa Pulisya at nahaharap sa kasong murder.

Nagsasagawa na ng imbestigasyon ang mga otoridad hinggil sa krimen.

Isinumite na ng Alliance of Concerned Teachers (ACT) sa Kamara kahapon ang petisyong nananawagang taasan ang sahod ng mga nagtatrabaho sa sektor ng edukasyon.

Sa bisperas ng National Teachers Day, mahigit 57,000 teachers at non-teaching personnel ang lumagda sa petisyon upang suportahan ang House Bill 203 na layuning magbigay ng umento sa mga education worker.

Nakasaad sa petisyon na napag-iwanan na ang suweldo ng mga guro ng sahod ng mga Pulis at Sundalo na dinoble  sa hindi bababa sa halos P30,000 noong 2018 habang noong sunod na taon ay itinaas din ang Entry-level Salary ng public nurses sa Salary Grade 15 o P35,000.

Sa ngayon anila ay naiwan ang suweldo ng mga guro sa hindi bababa sa Salary Grade 11 o P25,400 kada buwan.

Samantala, umapela ang ACT na itaas din ang minimum pay ng Public School Teachers sa S.G. 15.

Inihirit din ng grupong itaas ang minimum pay ng College instructors sa Local at State Universities at Colleges sa S.G. 16 o P38,150 at ng private school teachers sa P30,000 kada buwan.

Umakyat na sa 19.7 milyong Pilipino ang naturukan ng Covid-19 booster sa buong bansa.

Ang nasabing bilang ay 25% ng 70 million eligible population na nakatanggap ng unang booster shot at primary dose.

Ayon kay DOH officer-in-charge Maria Rosario Vergeire, kabilang sa tumanggap ng booster ang 3.2 million individuals na tinurukan sa ilalim ng “PinasLakas” campaign.

Para makamit ang 30% target bago mag-Sabado, Oktubre a – 8, na hudyat ng unang 100 araw ng Marcos Administration, kailangan pa anyang makapag-administer ang gobyerno ng 3.6 million booster jabs.

Sa ngayon ay umabot na sa 73.2 million Filipinos ang fully vaccinated laban sa Covid-19.