Drew Nacino

Tiniyak ng Department of Agriculture ang patuloy na pagpapalakas ng mga hakbang nito para makabili ang publiko ng mas abot-kayang presyo ng bigas.

Ito’y sa pamamagitan ng pagpapalawak sa Rice-For-All Program at pagbubukas ng dagdag na Kadiwa ng Pangulo kiosks sa mga palengke at istasyon ng tren.

Sa ilalim ng programa, makabibili ang mga consumer ng 45 peso per kilo para sa 5% na durog na bigas, 40 para sa 25 percent na durog habang 36 pesos para sa 100% na durog o tinatawag na sulit rice.

Nakalaan naman ang 29 peso rice program para sa mga mahihirap, senior citizens, solo parents, may kapansanan at mga katutubo na may limit na 10 kilo kada buwan sa bawat benepisyaryo.

Ayon kay Agriculture Secretary Kiko Laurel, layunin ng inisyatibong ito na matiyak na mananatili ang opsyon ng murang bigas para sa mga mahihirap na pamilya.

Nakipag-usap na rin anya ang d.a. Sa mga LGU Sa buong Metro Manila para maibenta ang imbak ng National Food Authority sa presyong 38 pesos per kilo.

Aminado si Transportation Secretary Jaime Bautista na maaaring magdulot ng mabigat na daloy ng trapiko ang malawakang rehabilitasyon ng edsa simula ngayong taon.

Gayunman, kumbinsido si Secretary Bautista na tanging mga private motorista lamang ang maaapektuhan.

Ayon sa Kalihim, posibleng dumami pa ang mga sasakay sa MRT-3 dahil hindi naman maaapektuhan ito ng inaasahang traffic congestion sa pinaka-abala at pangunahing kalsada sa Metro Manila.

Umaasa rin anya sila na makukumpleto na ang concession agreement para sa private operation at management ng Edsa Carousel para sa implementasyon nito sa ikalawang quarter ngayong taon.

Kampante naman si Bautista na hindi maaapektuhan ng total rehabilitation ng 23 kilometrong kahabaan ng edsa ang operasyon ng Edsa Busway. – Mula sa panulat ni Gilbert Perdez (Patrol)

Pinawi ng World Health Organization ang pangamba ng publiko sa paglobo ng respiratory infections ngayong taglamig, lalo sa China.

Nilinaw ni WHO Spokesperson Margaret Harris na normal lamang ang pagdami ng respiratory infections, partikular ng human metapneumovirus (HMPV) sa Northern Hemisphere ngayong winter.

Sa katunayan anya ay mas mababa ang hospital utilization ngayong 2025 kumpara noong isang taon at hindi na rin naman bago ang HMPV na taong 2001 pa unang natukoy.

Nobyembre pa nagsimulang tumaas ang kaso ng HMPV na kadalasan naman sa mga malalamig na bansa, gaya sa America at China.

Sa kabila nito, kontrolado pa sa mga nasabing lugar ang dumaraming kaso ng seasonal respiratory diseases.

Maliban sa nagtataasang presyo ng mga bilihin, lalo ng pagkain, namemeligro na ring lumaki ang gastos sa pagpapagamot ni Juan at Juana Dela Cruz ngayong taon.

Batay sa survey ng WTW Global Medical Trends survey, inaasahang sasampa sa 18.3% ang medical cost sa pilipinas ngayong taon, ang ikalawang pinaka-mataas sa Asia-Pacific, kasunod ng Indonesia.

Kabilang sa itinurong dahilan ng mataas na gastos sa pagpapagamot ang pagdami ng mga nangangailangan o nag-a-avail ng health services, lumalaking hospital at clinic costs, maging ang mas mahal na professional fees at madalas na pagkakasakit.

Bukod dito, nag-triple na rin o lumobo sa 4.2 billion pesos ang lugi ng health maintenance organization industry sa pilipinas noong 2023 kumpara sa 1.4 billion noong 2022 bunsod ng dumaraming binabayarang claims at benefits.

Para matugunan ang lumalaking utilization, inadjust na ng HMO presyo ng kanilang serbisyo taon-taon.

Aminado si House Deputy Majority Leader Erwin Tulfo at ACT-CIS Partylist Rep. Erwin Tulfo na minsan na siyang naging undocumented worker na kilala rin bilang TNT o tago nang tago sa Estados Unidos.

Tugon ito ni Congressman Tulfo sa alegasyong gumamit siya ng pekeng dokumento upang makakuha ng US Passport.

Ayon sa mambabatas, huminto siya sa pag-aaral sa kolehiyo nang maging isa na siyang ama at magtrabaho sa isang pahayagan.

Nang ipanganak anya ang kanyang anak na lalaki, humiram siya ng pera sa kanyang mga ka-trabaho para sa hospital bill at kalauna’y nag-apply ng tourist visa sa US Embassy.

Dekada otsenta nang magtungo sa Amerika si Tulfo pero kanyang itinanggi na gumawa siya ng masama o nagkaroon ng kaso at malinis ang kanyang naging trabaho sa naturang bansa.

Itinakda ng National Human Settlements Board ang maximum 2.3 percent increase sa upa para sa residential units na may monthly rate na 10,000 pesos o mas mababa.

Ang maximum increase sa monthly rentals para sa subject residential units ay epektibo simula January 1 hanggang December 31, 2025, base sa NHSB resolution 2024-001.

Inaprubahan ng NHSB, bilang nag-iisang policy-making body na responsable sa pagtatakda ng overall policy directions at  program development sa iba’t ibang key shelter agencies, mula sa rekomendasyon ng National Economic and Development Authority, ang bagong resolution  noong December 2024.

Nilagdaan ni Undersecretary Henry Yap ang resolution para sa Department of Human Settlements and Urban Development, bilang kinatawan ni Secretary at NHSB Chairman Jose Rizalino Acuzar.

Ang rental cap ay ipinatutupad upang maprotektahan ang housing tenants sa lower-income brackets at iba pang benepisyaryo mula sa sobra-sobrang rent increases alinsunod sa Republic Act 9653 o Rent Control Act of 2009.

Hinimok ni Senator Lito Lapid ang mga kasamahang senador na aprubahan ang kanyang senate bill no. 1471 na naglalayong ideklara ang Quiapo, maynila bilang isang National Historical-Cultural Heritage Zone.

Ayon kay Senador Lapid, malaki ang ambag ng quiapo sa kasaysayan, kultura, relihiyon, sining at ekonomiya ng bansa, at ang kahalagahan ng pag-preserba sa natatanging yaman nito.

Mahalaga anya ang nasabing lugar sa turismo at tradisyon, na nagsilbing sentro ng kalakalan bago pa dumating ang mga dayuhang mananakop.

Inihalimbawa ng mambabatas ang mga makasaysayang lugar tulad ng minor basilica of the black nazarene, san sebastian church at masjid al-dahab, maging ang plaza miranda kung saan isang pambobomba noong 1971.

Layunin ng panukalang batas na buhayin muli ang quiapo bilang sentro ng ekonomiya at lumikha ng mga bagong pasyalan habang pina-ngangalagaan ang kasaysayan at kultura nito. – Mula sa ulat ni Cely Ortega-Bueno (Patrol 19)

Pinanindigan ng Bangko Sentral ng Pilipinas ang paggastos ng 5.9 billion pesos para palitan ng polymer banknotes ang mga perang papel.

Ayon sa BSP, nabawasan ang mga peke at sira-sirang pera simula nang gumamit ang bansa ng polymer banknotes kumpara sa pera papel.

Batay sa datos ng BSP, bumaba sa one per 82 million pieces ang kabuuang counterfeit na 1,000 peso polymer notes simula 2022 hanggang noong November 2024 o katumbas ng 10 counterfeits mula sa 825.4 million sa bawat sirkulasyon.

Ang mga pekeng pera anilang ito ay mayroong mababang kalidad, dahil hindi tugma sa advanced security features ng polymer banknotes.

Gayunman, umabot sa 1 per 19,000 ang mga naitatalang counterfeits ng 1,000 peso paper bill nangangahulugang mas maraming peke nito kumpara sa polymer.

Nito lamang Disyembre a – 23, sinimulan na ng b.s.p. Na ilabas ang limitadong supply ng mga bagong 50, 100 at 500 peso polymer bills na bahagi ng “first philippine polymer banknote series” sa Metro Manila pa lamang.

Iginiit ng Department of Social Welfare and Development na hindi isang uri ng pork barrel ang Ayuda para sa Kapos ang Kita Program (AKAP).

Tugon ito DSWD Secretary Rex Gacthalian sa pahayag ni retired supreme court senior associate Justice Antonio Carpio na maihahalintulad ang cash assistance sa ilalim ng akap, sa kontrobersyal na Priority Development Assistance Fund (PDAF), na kilala rin bilang pork barrel.

Ayon kay Secretary Gatchalian, kahit sinong may mabuting-loob naman ang maaaring mag-refer ng potential beneficiaries at walang kinalaman ang barangay sa akap batay sa umiiral na guidelines.

Nilinaw ng kalihim na sa ilalim ng AKAP, hindi ino-obliga ang mga Barangay official na gumawa ng listahan ng mga benepisyaryo na tatanggap ng cash assistance mula sa DSWD.

Ipinaliwanag din ni Gatchalian na bagaman maaaring mag-refer ang mga mambabatas at local official ng mga posibleng benepisyaryo, tanging mga social worker ng kagawaran ang susuri sa mga recipient upang matiyak na pasado ang mga batay sa akap guidelines.

Bagama’t hindi pa pirmado ni Pang. Bongbong Marcos ang panukalang pambansang budget para sa 2025, siniguro ni Senator Imee Marcos na hindi makokompromiso ang paggasta ng gobyerno kapag nagpalit na ang taon.

Ayon sa Presidential Sister, hindi naman malaking trabaho ang paglagda ng Pangulo sa national budget dahil kaunti lang naman aniya ang mga kontrobersyal na item.

Kabilang na ang halos P12-bilyongtapyas-budget ng Department of Education, pag-zero sa subsidiya ng Philippine Health Insurance Corporation at ang pagbabalik sa P26-bilyong budget ng kontrobersyal na Ayuda sa Kapos ang Kita Program.

Sinabi pa ni Senador Marcos na kayang-kaya naman na gawing pulido ang proposed P6.352-trilyong national budget kung gugustuhin ng palasyong ibalik ito sa Bicameral Conference Committee.

Hinimok ng mambabatas si Presidente Marcos na alisin sa badyet ang mga isiningit ng mga kapwa niya mambabatas, gaya ng sinasabi umanong 1-trillion peso fundraising para sa impeachment ni Vice President Sara Duterte.

Ito’y upang mabigyan aniya ng garantiya ang sambayanang Pilipino na hindi para sa interes ng iilan lamang ang pambansang budget na kasadong tintahan ni Pangulong Marcos sa Disyembre a-30.