Drew Nacino

Magpupulong ngayong araw ang mga Economic Manager ng bansa upang maglatag ng mga hakbang para maibsan ang epekto ng walang-patid na oil price hike habang hindi gumagalaw ang inflation o pagtaas ng presyo ng mga bilihin.

Ayon kay National Economic and Development Authority (NEDA) Undersecretary Rosemarie Edillon, nakikipag-ugnayan na rin sila sa Bangko Sentral ng Pilipinas (BSP) at Department of Finance (DOF).

Batay sa Philippine Statistics Authority (PSA), nanatili sa 3% ang inflation rate noong Pebrero sa kabila ng pananakop ng Russia sa Ukraine.

Kabilang anya sa kanilang binabantayan ang kalakaran sa presyuhan ng mga produktong petrolyo sa gitna ng  patuloy na pagtaas nito at epekto ng hidwaan ng Ukraine at Russia.

Idinagdag pa ni Edillon na mag-pe-presenta sila ng analysis at pagtansa upang makapaglatag ng mga pansamantala o pangmatagalang solusyon.

Bukas ilalarga ng mga kumpanya ng langis ang kanilang ika-sampung sunod na linggong price increase.

Sa gitna ng walang-patid na pag-atake ng Russia, ilan pang Pilipino ang nakauwi na mula sa Ukraine.

Ayon sa DFA, kahapon lamang ay apat pang Pinoy, tatlong Filipino-Ukrainian na bata at kanilang mga nanay na Ukranian ang dumating lulan ng Qatar Airlines flight.

Nagmula ang grupo sa Kyiv at iba pang bahagi ng Western Ukraine, na umalis sa warsaw, Poland noong sabado.

Tinulungan ang mga ito ng mga opisyal ng DFA na makabiyahe sa Lviv mula Kyiv at itinawid sa Polish border patungong Warsaw.

Dumating din kagabi ang dalawa pang Pinoy, isang batang Filipino-Ukrainian at kanyang nanay na Ukrainian habang tatlo pang Filipino mula Kyiv ang nakatakda ring umuwi sa Pilipinas.

Dapat bawasan ang pagkahilig sa mga bagay-bagay na kinagawian, tulad ng pagbababad sa internet, social media at mga gadget, gaya ng cellphone.

Ito ang panawagan ng Catholic Bishops’ Conference of the Philippines (CBCP) sa mga mananampalataya, partikular sa mga kabataan, ngayong kuwaresma.

Ayon kay CBCP – Social Communications Ministry Chairman, Bishop Marcelino Antonio Maralit, ang pagwaksi sa paggamit ng internet ay isang paraan para makamit ang tunay na kahulugan at diwa ng semana santa, lalo na ang maisagawa ang sakripisyo at pagsisisi.

Batid naman anya ng simbahang katolika ang kahalagahan ng impormasyon lalo na sa mga kabataan, pero ang tunay na pagninilay ay makakamit kung ang isang tao ay nakatuon sa panginoon.

Ang nasabing panawagan ay alinsunod sa pahayag ni Pope Francis na ang teknolohiya ay nakahahati, lalo na sa isang lipunan kung saan ang labis na impormasyon na kumakalat sa social media ay kadalasang hindi makatotohanan.

Batay sa pag-aaral noong Pebrero 2021 ng We are Social at Hootsuite, umabot sa apat na oras at 15 minuto ang ginugugol ng mga Pilipino sa social media bawat araw noong 2021, mula sa tatlong oras at 53 minuto, noong 2020.

Tiniyak ni Chinese Ambassador to the Philippines Huang Xilian na hindi makikialam at makikisawsaw ang China sa halalan sa Pilipinas sa Mayo a–nwebe.

Taliwas ito sa naunang pahayag ni retired Supreme Court Senior Associate Justice Antonio Carpio, noong Pebrero at mga ispekulasyon na mayroong Manchurian candidate ang Tsina.

Ayon kay Huang, hindi gawain ng China na makisawsaw sa internal politics ng ibang bansa.

May sarili naman anyang pag-iisip at disposisyon ang mga Pilipino sa pagpili ng kanilang leader.

Handa rin ang embahador na maka-trabaho ang susunod na pangulo ng bansa at umaasa na mapapanatili nito ang magandang relasyon sa pagitan ng Pilipinas at China.

Bilang bahagi ng preparasyon para sa halalan 2022, magtatatag ang Department of Education ng Election Task Force (ETF) Operation at Monitoring Center, batay sa DEPED Memorandum 10, series of 2022.

Ang 2022 DEPED–ETF Operation and Monitoring Center ay itatayo sa bulwagan ng karunungan, DEPED Central Office, Pasig City simula ala una ng hapon sa Mayo a–otso hanggang ala singko ng hapon sa Mayo a-diyes.

Kabilang ang DEPED sa mga national agencies na itinalaga ng COMELEC upang tiyaking malaya, maayos, tapat, mapayapa at kapani-paniwala ang halalan.

Ito’y sa pamamagitan ng pag-a-appoint sa mga public school teacher na magsisilbing chairpersons at miyembro ng election board at technical support personnel.

Samantala, itinalaga naman si DEPED Undersecretary Alain del Pascua bilang Chairman at Undersecretary Revsee Escobedo bilang Vice Chairman ng DEPED – ETF Operations and Monitoring Center.

Inilatag na ng Commission on Elections (COMELEC) ang mga alituntunin sa unang presidential debates na itinakda sa Marso a– 19.

Ayon kay COMELEC Spokesman, Director James Jimenez, magkakaroon ng single-moderator format ang tatlong oras na debate nang walang live audience.

Mayroon din anyang draw kung kanino mapupunta ang unang tanong habang alphabetical order ang pagsagot ng mga kandidato sa mga susunod na tanong hinggil sa mga paksang may kahalagahan sa bansa, tulad ng pandemya at ekonomiya.

Itinakda naman ng poll body ang ikalawang debate sa abril a – tres habang sa Marso a-20 ang vice-presidential debate.

Gayunman, wala pang venue kung saan gaganapin ang nasabing aktibidad.

Samantala, isasapinal ng poll body at Vote Pilipinas ang kasunduan sa Pilipinas debates 2022 sa pamamagitan ng signing ceremony sa Sofitel Hotel, Pasay City, ngayong araw.

Pinalawig ng Light Rail Transit Authority (LRTA) ang kanilang COVID-19 vaccination drive sa line-2 stations, partikular sa Antipolo City.

Mula sa dalawang araw na schedule, lalarga ang pinalawig na bakunahan simula ngayong araw hanggang sabado, Marso a– dose.

Ito ay ayon kay LRTA Administrator Jeremy Regino, ay upang mahikayat ang mas maraming pasahero na magpaturok ng primary o booster shots saanmang LRT-2 vaccination sites.

Ang Antipolo Station, pinaka-dulong terminal at unang istasyon ng line 2 sa labas ng Metro Manila, na dinaragsa ng mga pasahero mula sa lalawigan ng Rizal.

Sisimulan naman sa Cubao Station, Quezon City ang libreng COVID-19 jabs ngayong araw lamang mula alas otso ng umaga hanggang mamayang alas kwatro ng hapon.

Samantala, tuwing Martes at Huwebes ang bakunahan sa recto station sa Maynila, mula alas otso rin ng umaga hanggang ala singko ng hapon.

40% ng mga Filipino ang nagsabing lumala ang kanilang pamumuhay noong huling bahagi ng taong 2021.

Batay ito sa isinagawang fourth quarter survey ng Social Weather Stations (SWS) noong December 12 hanggang 16 sa pamamagitan ng face-to-face interviews sa 1,440 adults sa buong bansa.

Ayon sa SWS, 24% ang nagsabing umayos ang kanilang pamumuhay habang 36 percent ang nagsabing wala namang pinagbago.

Ang fourth-quarter survey results noong isang taon ay mataas ng 28 points kumpara sa negative 44 noong ikatlong bahagi ng 2021.

Gayunman, mababa pa rin ito ng 34 points kumpara sa pre-pandemic level na very high na positive 18 noong huling quarter ng taong 2019.

Sa kauna-unahang pagkakataon, nakamit ng Bureau of Internal Revenue (BIR) ang tax collection target na mahigit dalawang trilyong piso nang dalawang beses, sa kabila ng nakalulumpong epekto ng COVID-19 pandemic.

Umabot sa mahigit 2 point 1 trillion pesos ang nakolektang buwis ng BIR noong 2019 at mahigit 2 trillion pesos noong isang taon.

Ayon kay BIR Commissioner Ceasar Dulay, nakamit ang record-breaking collection dahil sa digitalized system ng ahensya, na sinimulang ipatupad bago mag-pandemya.

Labing-apat na proyekto ang inilatag ng BIR para sa digital transformation nito, tulad ng electronic payments at electronic filling.

Sa datos ng ahensya, 84% ng koleksyon noong 2021 ay idinaan sa pamamagitan ng electronic payment channels na aabot sa 1.75 trillion pesos.

Labis nang nababahala ang Metropolitan Waterworks and Sewerage System (MWSS) sa unti-unting pagbaba ng lebel ng tubig sa Angat Dam, Bulacan.

Ayon kay MWSS Chief Regulator Patrick Ty, maaaring maka-apekto sa supply ng tubig sa tag-init ang kasalukuyang sitwasyon ng Angat Dam.

Patuloy anya nilang mino-monitor ang sitwasyon at nagkakasa ng contingency.

Hanggang nitong kahapon, nasa 196.09 meters ang lebel ng tubig sa nabanggit na water reservoir, o 15.91 meters na mababa sa normal high water level na 212 meters.

Ang Angat Dam ang nagsu-supply ng 96 percent ng tubig sa Metro Manila.