Bahagya muling tumaas sa 37,082 ang aktibong kaso ng COVID-19 sa bansa.
Nakatapagtala kahapon ang DOH ng karagdagang 2,001 infections dahilan upang lumobo na sa 3,940,201 total case load.
Kabilang dito ang 3,840,300 recoveries at 62,819 fatalities.
Hindi pa rin natitinag ang Metro Manila sa may pinaka-maraming kaso na 13,861 sa nakalipas na dalawang linggo; CALABARZON, 5,138 at central Luzon, 2,819.
Mahigit 500 pamilya at halos 6,200 kabahayan ang napinsala sa bayan ng Dingalan, Aurora matapos ang pananalasa ng bagyong Karding.
Ayon kay Mayor Sherwin Taay, isa sa pinakamatinding hinagupit ng bagyo ang barangay Paltic na nakaharap sa dagat.
Mas malala anya ang sinapit ng mga coastal barangay ngayon kumpara nang hatawin sila ng bagyong Ulysses noong Nobyembre 2020.
Bagaman may mga nasirang ari-arian, wala namang namatay sa kanyang mga kababayan.
Samantala, kahapon ay dumating sa Dingalan si DSWD secretary Erwin Tulfo upang mamahagi ng tulong pinansyal na P5,000 hanggang P10,000 sa ilalim ng Assistance for Individuals in Crisis Program.
Pina-alalahanan ng Departments of Energy at Trade and Industry ang mga kumpanya ng langis at traders na otomatikong ipatupad ang price freeze sa mga lugar na nasa ilalim ng State of Calamity.
Sa gitna ito ng malawak na pinsalang idinulot ng bagyong Karding sa iba’t ibang lugar sa Luzon.
Nagbabala ang DOE at DTI na posibleng maharap sa reklamo o pagkakulong ang sinumang lalabag sa price freeze.
Ayon kay DOE – Oil Industry Management Bureau director Rino Abad, agad silang maglalabas ng advisory sa mga lugar na ilalagay o isinailalim sa State of Calamity.
Nakikipag-ugnayan naman ang DTI sa Office of Civil Defense upang makakuha ng suhestyon kaugnay ng price stabilization measures sa mga lugar na malubhang nasalanta ng kalamidad.
Nilinaw ni DTI undersecretary, Atty. Ruth castelo na saklaw lamang ng automatic price freeze ang basic necessities.
Halos 90% ng mga bahay at ilang paaralan sa paanan ng Sierra Madre sa General Nakar, Quezon ang napuruhan sa pananalasa ng bagyong Karding.
Ayon kay Municipal Disaster Risk Reduction and Management officer Erberto Astrera, grabe ang sinapit ng kanilang bayan dahil halos lahat ng bubong ng mga bahay at paaralan ang winasak ng malakas na hangin.
Kabilang anya sa mga napinsala ang Umiray Elementary School sa barangay Umiray, na pinaka-malayong barangay sa General Nakar at nasa boundary ng Dingalan, Aurora.
Sa datos, halos 6k residente sa naturang bayan ang apektado ng kalamidad.
Hindi naman gaanong nagtamo ng pinsala ang iba pang barangay sa General Nakar.
Mayorya ng nasabing bayan ay bahagi ng Sierra Madre na pinaka-mahabang mountain rage sa bansa na aabot sa 540 kilometers o mula sa lalawigan ng Cagayan hanggang Quezon.
Binigyang-pugay ang limang rescuer sa Bulacan na nasawi makaraang anurin ng baha sa bayan ng San Miguel sa kasagsagan ng pananalasa ng bagyong Karding.
Kinilala ang biktimang sina George Agustin, 45-anyos; Marvy Bartolome, 36; Narciso Calayag Jr., 33; Troy Justin Agustin, 30- anyos at Jerson Resurecion.
Nasa gitna ng rescue operation ang lima nang tangayin ang kanilang bangka ng malakas na agos matapos bumagsak ang isang pader sa kalapit na gasolinahan.
Narekober ang labi ng mga rescuer dakong ala-6 kahapon ng umaga sa isang palayan.
Aminado si Bulacan Provincial Disaster Risk Reduction Management Office head Liz Mungcal na napakasakit para sa kanya ang pagkawala ng lima dahil pamilya na ang turing niya sa mga ito.
Sa kabila nito, ipinagmamalaki anya nila ang kabayanihan ng mga nasawing rescuer dahil hanggang sa huli ay nagbuwis ng buhay ang mga ito para makapagbigay-serbisyo sa mga mamamayan.
Tiniyak naman ni Governor Daniel Fernando ang paggawad ng mataas na parangal at tulong sa pamilya ng mga rescuer.
Anim na dike sa bayan ng Candaba, Pampanga ang nasira makaraang rumagasa ang tubig mula sa Pampanga River nang manalasa ang bagyong Karding sa Central Luzon.
Dahil dito, nalubog sa baha ang ekta-ektaryang mga palayan kaya’t naunsyami ang pag-a-ani ng ilang magsasaka.
Ayon sa Candaba Municipal Disaster Risk Reduction Management Office, wasak ang mga dike sa barangay Mapaniqui, Barangca, Visal Sto. Nino, Visal Sto. Cristo, Pulonggubat at San Pablo.
Mula sa 33 barangay, mahigit kalahati o 16 sa mga ito ang lubog sa tubig.
Samantala, nanlumo rin ang ilang magsasaka sa Tarlac City dahil pinadapa ng bagyo ang mga palay na aanihin na sana.
Inihayag ni barangay San Manuel Chairman Crisanto Deang na 90% ng mga aanihin sanang palayan ang pinadapa ng malakas na hangin.
Gayunman, sa pagtaya ng provincial government, nasa 30% pa lamang ng mga palayan sa lalawigan ang nakapag-ani na.
Nalampasan na ng bagong kaso ng COVID-19 sa National Capital Region ang naunang peak nito noong Agosto.
Ito ang inihayag ng OCTA Research Group makaraang makapagtala ng additional 1,600 COVID-19 cases sa Metro Manila kumpara sa 1,502 new cases noon namang Agosto a – 7.
Ayon kay OCTA Research Fellow, Dr. Guido david, tumaas sa 18.5% ang positivity rate kumpara noong 15.7% habang sumampa sa 1.30 ang reproduction rate kumpara sa 1.21%.
Dumoble rin anya ang one-week growth rate ng kaso ng COVID-19 sa 25% noong linggo, September 25 kumpara sa 13% noong September 18.
Inaasahan ng OCTA na tataas pa ang mga kaso ng COVID-19 hindi lamang sa NCR kundi sa iba pang bahagi ng bansa sa mga susunod na araw.
Nalubog din sa baha ang ilang bahagi ng lalawigan ng Bulacan dahil sa malakas na ulang dala ng bagyong Karding.
Ayon kay Bulacan Governor Daniel Fernardo, kabilang sa pinaka-matinding nalubog ang Bayan ng San Miguel.
Bagaman, nagpadala na sila ng rescue team sa naturang lugar, aminado si Fernando na kasalukuyan nilang hindi ma-contact ang mga miyembro ng team.
Samantala, inaalam na rin nila ang sitwasyon sa bayan ng Doña Remedios Trinidad na binayo naman ng malakas na hangin.
Nagpatupad na ng forced evacuation ang Quezon City Disaster Risk Reduction and Management Office sa ilang flood-prone area dahil sa epekto ng bagyong Karding.
Kabilang sa mga sapilitang inilikas ang nasa 1,800 kataong naninirahan sa tabi ng creek sa barangay Bagong Silangan na nagpalipas sa Bagong Silangan Elementary School, ilan pang residente ng barangay Tatalon at Batasan Hills.
Isa sa mga sanhi ng pagbaha ang pag-apaw ng tubig sa mga ilog Marikina at Tullahan.
Nalubog din sa baha ang ilang bahagi ng kanto ng A. Bonifacio at Araneta Avenues habang lagpas gutter din ang tubig sa Valencia St. sa Barangay del Monte.
Nanawagan naman si Mayor Joy Belmonte sa mga residente na iwasan munang bumalik sa kanilang bahay hangga’t walang abiso ang lokal na pamahalaan.
Umabot na sa 2,293 pamilya o mahigit 8,300 katao sa Luzon, karamiha’y sa Metro Manila, ang nagsilikas dahil sa bagyong Karding.
Ayon sa National Disaster Risk Reduction and Management Council (NDRRMC) kabilang sa mga evacuee ang nasa 900 pamilya o 3,400 katao sa NCR, partikular sa Marikina at Quezon cities.
Bukod sa NCR, apektado rin ang mga residente sa Central Luzon, CALABARZON, Cagayan Valley, Ilocos Region at Bicol Region.
Unang naglandfall ang bagyo sa Burdeos, Quezon kahapon na nasundan ng ikalawang landfall sa Dingalan, Aurora kagabi.