Cely Ortega-Bueno

Malalaman na ngayon kung ano ang nabuong bersyon ng Senado sa tax reform bill.

Nakatakda nang isponsoran ni Ways and Means Committee Chairman Sonny Angara ang committee report ukol sa nabanggit na tax measure.

Ayon kay Senator Angara, pirmado na ng mga miyembro ng Committee on Ways and Means ang committee report pero may mga nakasulat na mag-interpellate at may mag-introduce ng amendments.

Isa si Senate President Pro-Tempore Ralph Recto sa pumirma pero ayon sa senador mayroon siyang mga reservation at maraming isusulong na amendments.

Sinabi naman ni Senator JV Ejercjto na mayroon din siyang ilang alalahanin sa tax reform bill partikular sa inflationary effect ng ilang nilalaman nito kayat may mga isusulong siyang amendments.

Umaasa si Senator Ejercito na mas maganda at mas katanggap tanggap ang maipapasang bersyon ng tax reform bill sa Senado.

Sinabi naman ni Senator Joel Villanueva na malaki ang kaibahan at mas mahusay ang Senate version ng nabanggit na tax measure pero may gagawin para silang pagbabago para maging mas balanse at katanggap-tanggap ito.

—-

Ilalarga na ng National Bureau of Investigation simula Oktubre 2 ang kanilang   Multi – Purpose  Clearance bilang tugon sa programa ni Pangulong Rodrigo Duterte na padaliin ang pagkuha ng mga government document.

Inihayag ni NBI Deputy Director for Information and Communications Technology Service Jose Yap sa programang ‘Balita Na, Serbisyo Pa’,  na  maaari nang magamit ang multi-purpose clearance kahit sa anong requirements.

Sa ilalim nito, pinag-isa na  ang pagkuha ng naturang clearance para sa pag-biyahe abroad, local employment, pagkuha ng firearms, business at naturalization.

Fix rate anya  ang pagkuha ng nasabing clearance sa presyong 115 pesos  pero  makakaroon lamang ito  kung  online payment.

Samantala, plano naman ng ahensya na magkaroon ng NBI clearance renewal card.

SMW: RPE

Makaraang i-cite for contempt ng Senate Blue Ribbon Committee kahapon ay nag-isyu na ng warrant of arrest ang Senado laban kay dating Bureau of  Customs o BOC Commissioner Nicanor Faeldon.

Ito’y matapos ang ilang beses na hindi pagdalo ni Faeldon sa pagdinig kaugnay sa P6.4 bilyong pisong halaga ng shabu shipment na nakalusot sa BOC sa kabila ng inisyung subpoena dito.

Ipinabatid ni Senate Sergeant at Arms Retired General Jose Balajadia na kagabi pa ibinaba sa kanila ang nasabing arrest warrant na pirmado ni Senate President Koko Pimentel.

Oras na maaresto ay mananatili sa kustodiya ng Senado si Faeldon hangga’t hindi dumadalo sa pagdinig.

10 AM UPDATE:

Gayunman, ipinabatid ni Senator Richard Gordon na hindi na isisilbi ang warrant of arrest ngayong araw laban kay Faeldon dahil nangako ang kampo nitong dadalo na sa susunod na pagdinig ng Senado sa Lunes, September 11, 2017.

Ayon kay Gordon, sakaling hindi pa humarap sa Lunes si Faeldon ay doon na siya ipapaaresto.

AR/ DWIZ 882

Malinaw na propagandista at attack dog si Senador Antonio Trillanes.

Ito ang inihayag ni Atty. Rainer Madrid, head ng legal team ni Davao City Vice Mayor Paolo Duterte matapos magharap ang Senador at Bise Alkalde sa Senate Blue Ribbon Committee hearing, kahapon.

Ayon kay Madrid,  dismayado sila dahil inakala nilang  eksplosibo ang   isisiwalat si  Trillianes  pero pawang  hindi  “validated” na impormasyon kaya’t maituturing na tsismis lang ang inilahad nito sa pagdinig.

Anya, papayuhan na lamang niya ang kanyang kliyente na ipakita ang sinasabing tattoo  nito sa likod kung aamin daw na bakla si  Trillianes.

Sa kabila nito, walang binabalak na anumang legal action ang kampo ni Duterte laban sa mambabatas  dahil hindi nila papatulan  ang mga anila’y tsismis  na isinisiwalat nito.

By: Drew Nacino

SMW: RPE