Angelica Doctolero

Nananatiling mataas ang moral ng leadership matapos ang kumpirmasyon ng pagbibitiw sa posisyon ni House Speaker Martin Romualdez.

Ito ang sinabi ni House Deputy Speaker at Zambales Rep. Jhay Khonghun, sa ambush interview ng mga media personnel na buo ang suporta ni Speaker Romualdez kay incoming House Speaker at Isabela 6th District Rep. Faustino “Bojie” Dy.

Ayon kay Khonghun, mananatili at hindi titigil ang adhikain ng leadership maging ang institusyon na tulungan ang pamahalaan partikular si Pangulong Ferdinand Marcos Jr.

Tiwala ang kongresista sa kakayahan ni Cong. Dy para pamunuan ang mababang kapulungan.

Nilinaw ng kongresista na ginawa ni Speaker Romualdez ang desisyon dahil mahal nito ang institusyon at administrasyon at para mahinto na ang mga akusasyon at patuloy na paninira sa mababang kapulungan.

Tiniyak naman ni Khonghun na tuloy-tuloy ang trabaho ng mga mambabatas sa Kamara lalo sa pagbuo ng mga panukalang batas at sa pagtupad sa kanilang tungkulin.

Kinumpirma ni House Deputy Speaker at Antipolo Rep. Ronaldo Puno na magreresign ngayong araw si House Speaker Martin Romualdez.

Sa isang panayam, sinabi ni Puno na ipinatawag sila kahapon ni Speaker Romualdez para sabihin ang planong pagbibitiw bilang lider ng Kamara ngayong araw.

Sinabi ni Puno na matagal nang plano ni Romualdez ang magresign sa tuwing magkikita-kita ang mga party leaders dahil sa mga kontrobersiya at mga paratang na ibinabato laban sa kaniya.

Nasisira na aniya ang reputasyon ng Mababang Kapulungan at marami nang kongresista ang nadadamay.

Aniya, sinubukan na nilang pigilan ang plano ng lider ng Kamara na huwag magbitiw sa posisyon.

Nagbigay rin sila ng suhestiyon na mag-leave of absence na lang si Speaker pero buo na aniya ang desisyon nito.

Iginiit ni Puno na posibleng si Deputy Speaker at Isabela 6th District Rep. Faustino “Bojie” Dy ang papalit sa maiiwang posisyon dahil na rin sa desisyon at rekomendasyon ni Speaker Romualdez.

Hiniling ni Romualdez sa mga mambabatas na suportahan si Cong. Dy na layong maging epektibo ang pamamahala sa institusyon.

Sinabi ni Puno na magkakaroon ng party meetings ngayong araw para pag-usapan ang pagbibitiw sa puwesto ni Speaker Romualdez.

Handa ang House Infrastructure Committee na anyayahan sa pagdinig ang mga mambabatas na masasangkot sa isyu ng flood control projects kung mayroong legal na basehan ang mga kritikong nagdadawit dito.

Kasunod ito ng panawagan ni Cavite 4th District Rep. Kiko Barzaga na maimbestigahan si House Speaker Martin Romualdez kaugnay sa isyu ng maanomalyang flood control projects dahil imposible ayon kay Barzaga na wala itong alam sa kontrobersiya.

Iginiit ni Cong. Ridon, na katulad ng umiiral na protocols at bilang bahagi ng imbestigasyon ng komite… tutugon sila sa nais ng kapwa kongresista basta’t makapagbigay ito ng kumpletong detalye na may kinalaman ang lider ng Kamara sa isyu ng flood control.

Aniya, bago pag-aralan ng Infra-Comm ang mga pahayag ni Barzaga, kailangan munang maglatag ng tamang alegasyon ang kapwa kongresista.

Humingi ng pasensya si House Deputy Speaker at Antipolo 1st District Rep. Ronaldo Puno sa pag-uugnay kay dating Senator at Finance Committee Chairperson Grace Poe sa naging final draft ng 2025 national budget.

Ito’y matapos malaman ni Puno, na hindi pinayagan si Poe na lumahok sa mga deliberasyon ng bicameral conference committee.

Gayunpaman, iginiit ng House leader na dapat magpatuloy ang proseso ng pagtukoy sa pananagutan hinggil sa iregularidad sa National Expenditure Program o NEP.

Palaisipan para sa mambabatas ang mga pagbabagong nangyari sa pagitan ng mga budget bills na inaprubahan ng dalawang kapulungan ng Kongreso at ang ipinadala sa Palasyo para pirmahan ni Pangulong Ferdinand Marcos Jr.

Matatandaang noong 19th Congress, inalis si Ako Bicol Party-list Rep. Elizaldy Co, mula sa pagiging chairperson ng House Committee on Appropriations dahil sa isyu ng insertions sa 2025 national budget.

Dismayado si House Deputy Speaker at Antipolo 1st District Rep. Ronaldo Puno sa ginawang pagsasapubliko ni Leyte 4th District Rep. Richard Gomez sa impormasyon ng mga mamamahayag na nais lamang kuhanin ang kanyang panig ukol sa gumuhong flood control projects sa Matag-ob, Leyte.

Matatandaang ibinahagi ni Gomez sa kanyang social media account ang iba’t ibang screenshots mula sa mga media outlet kung saan, nalantad ang bawat mga numero na tinawag niya pang “media spin,” “may nagkukumpas,” at “ginastusan” ang mga mamamahayag na ang nais lamang ay humingi ng reaksiyon o opinion mula sa kanya.

Sa pulong balitaan, sinabi ni DS Puno na mas mabuting i-akyat sa House Committee on Ethics and Privileges na pinamumunuan ni 4Ps Partylist Rep. JC Abalos ang isyu ng naging asta ni Cong. Gomez laban sa mga mamamahayag.

Ayon kay Puno, hindi pwede ang ganoong pag-uugali ng kongresista at sa halip ay magpaliwanag na lamang si Gomez.

Dagdag pa ni Puno, kaya sila naging mambabatas dahil tingin ng publiko ay marunong silang magpaliwanag.

Idiniin pa ni Puno na hindi maganda na dadaanín sa pang-iinsulto ang naturang isyu.

Sa isang statement, kinondena na ng National Union of Journalists of the Philippines o NUJP ang ginawa ni Gomez.

Walang hinanakit at hindi masama ang loob ni dating PNP Chief Gen. Nicolas Torre the Third makaraang sibakin sa kaniyang puwesto bilang hepe ng Philippine National Police

Sa ambush interview sa Kamara, sinabi ni Torre na kaniyang nirerespeto ang naging desisyon na siya’y alisin sa puwesto maging ang opinyon ni dating PNP chief at ngayo’y Senator Panfilo “Ping” Lacson sa kaniyang ginawang hakbang sa PNP.

Sinabi ni Torre na wala siyang pinagsisisihan dahil sa tagal niya sa kaniyang serbisyo, hindi na umano bago ang ganitong uri ng sitwasyon.

Nang matanong naman kung handa siyang tumanggap ng bagong posisyon sa gobyerno, sinabi ni Torre na ayaw niya munang pangunahan ang desisyon at mas makabubuting hintayin na lang ang opisyal na announcement kung may iaalok mang bagong trabaho para sakanya.

Mananatili aniya ang kanyang suporta kay Pangulong Ferdinand Marcos Jr. maging sa buong administrasyon at handa pa rin aniya siyang maglingkod sa gobyerno.

Kinumpirma naman ng opisyal na nakatakda siyang mag-file ng leave of absence pero hindi pa napag-uusapan ang turn-over lalo’t wala pang abiso at 4-star general pa rin naman aniya siya.

Sa kabila nito, handa umanong magbigay ng payo si Torre sa bagong PNP chief na si Lieutenant General Jose Melencio Nartatez na aniya’y mahusay na police officer.

Nilinaw din ni Torre na “in good terms” umano sila ni DILG Secretary Jonvic Remulla.

Itinanggi ng Presidential Communications Office o PCO na sila ay nagmementina at nagbabayad sa mga tinatawag na “reactors” pati “vloggers.”

Sa budget deliberation ng House Committee on Appropriations, sinabi ni SAGIP Partylist Rep. Paolo Henry Marcoleta na mayroon umanong nagkwento sa kanya na nasa 100 hanggang 200 ang reactors ng PCO para magbigay ng positibong reaksyon o komento sa mga social media post na tungkol sa Marcos Jr. administration.

Maliban dito, nasa 76 vloggers umano ay mine-maintain ng PCO.

Batay din sa impormasyong nakuha ni Marcoleta, nasa P7,000 pa nga ang bayad sa mga reactor kada buwan.

Bilang tugon sinabi ni PCO Acting Sec. Dave Gomez, na walang ganito o hindi nagbabayad ang PCO.

Binigyang-diin ni Gomez na mayroong “organic” at mga totoong tao na sumusuporta kay Pang. Ferdinand Marcos Jr.

Sinabi ni Gomez, na kahit tingnan pa sa budget ng PCO ay walang makikita ang naturang kongresista.

Aminado ang mga guro na hindi sapat ang limang araw na training na ibinigay ng Department of Education bilang paghahanda sa kanilang pagtuturo ng comprehensive sexuality education sa mga mag-aaral.

Sa eksklusibong panayam ng DWIZ, sinabi ni Benjo Basas, ang Chairman ng Teachers Dignity Coalition, na hindi dumaan sa konsultasyon ang mga guro na magtuturo ng CSE program.

Binigyang diin ni Basas, na maselan ang bagong programa sa sektor ng edukasyon kaya dapat na mas matutukan ito sa ilalim ng mas pinalawak na special training ng mga guro.

Matatandaang sa naging pagdinig ng House Committee on Basic Education, kinwestiyon kung bakit nagsisimula sa kinder ang Comprehensive Sexuality Education dahilan ng pag-alma ng mga magulang.

Sinabi ni Basas, na sakaling aprubahan ang senate bill 1979 o “Prevention of Adolescent Pregnancy” Act dapat ikunsidera ang relihiyon at kultura ng bawat isa.

Pinagsusumite ni House Quinta Committee Co-Chair Mark Enverga ang Department of Agriculture ng supply chain analysis sa mga produktong agrikultura.

Sa pagdinig ng Murang Pagkain Super Committee, natukoy na isa sa dahilan kung bakit nananatiling mataas amg presyo ng bigas ay ang mahabang supply chain.

Sa pahayag ni Agriculture Usec. Asis perez, may tatlong layers na dinadaanan ang bigas bago mapunta sa mga retailer dahilan kaya mahaba ang proseso nito bago makarating sa merkado.

Ibinulgar ni cong. Enverga, na mayroong P11 na patong sa bigas ang mga importer mula bago pa ito makarating sa mga retailer.

Hindi rin aniya maaaring isisi ang lahat sa retailers dahil maging sila ay may dagdag pang mga gastos gaya ng bayad sa pwesto at iba pang dues na sinisingil ng mga lokal na pamahalaan.