Arestado ang 81 na indibidwal sa ikinasang One-day Simultaneous Anti-Criminality Law Enforcement Operation ng mga otoridad sa Bulacan.
Kabilang sa mga nadakip ng pulisya ang dalawang most wanted person sa Central Luzon na kinilalang sina Marwin Morelos alyas ‘Awin’ at Marion Morelos alyas ‘Aaron’ dahil sa dalawang kaso ng frustrated murder.
Nagsagawa rin ng 27 anti-illegal drugs operation ang pulisya kung saan nahuli ang 35 na hinihinalang drug peddlers.
Nasabat rin sa operasyon ang 134 pakete ng shabu na may timbang na 41.886 gramo at apat na pakete ng ‘damo’ na may kabuuang halaga na P285,624.
Samantala, 11 katao naman ang arestado sa tatlong magkakahiwalay na anti-illegal gambling operation kung saan nasamsam ang gambling paraphernalias at bet money. —sa panulat ni Mara Valle
