Binawian ng buhay ang 6 na katao kabilang ang isang sanggol matapos araruhin ng trailer truck ang kasalubong na mga sasakyan sa bayan ng Tumauini, Isabela kahapon.
Kinilala ang mga biktima na si Kudlip Singh, 38- anyos na drayber ng motorsiklo; Arnel Menor, 37-anyos na drayber naman ng tricycle.
Kabilang din sa nasawi ang misis nito na si Diana Rose at 6 na buwang gulang nilang anak; Ernesto Caronan, 71-anyos at asawang si Elma, 74- anyos.
Batay sa imbestigasyon ni Police Lieutenant Jessie Alonzo, Deputy Chief Ng Tumauini Police, magkasunod na binabaybay ng tricycle at motorsiklo ang national highway sa Barangay Balug nang salpukin ang mga ito ng trailer truck.
Umamin naman ang drayber ng truck na kasalanan niya ang nangyaring insidente dahil nasa ilalim ito ng impluwensya ng alak.
Mahaharap naman ang drayber sa reklamong Reckless Imprudence Resulting In Multiple Homicide at Damage To Properties.
