Apat ang arestado makaraang mahuli sa aktong gumagamit ng ipinagbabawal na gamot sa Cubao, Quezon City kagabi.
Kinilala ni Police Insp. Ceferino Gatchalian Jr, hepe ng QCPD o Quezon City Police District Station 10 ang naarestong sila Ryan Alvarez at Albert Guan.
Arestado rin ang parking attendant na si Conrado Arzala na isang senior citizen gayundin ang live – in partner nitong si Fe Letran.
Ikinasa ng pulisya ang operasyon sa Montana Street, Tahuan Compound sa Barangay Immaculate Conception sa naturang lugar.
Unang naging target ng mga pulisya si Arzala kung saang positibo itong nabilhan ng shabu ng isang pulis na nagpanggap na poseur buyer.
Nang magpasama ang pulis kay Arzala sa bahay nito, tumambad sa kanila ang paggamit ng shabu ng tatlo pang suspek na siyang naging hudyat para salakayin na ang lugar.
Ikinakasa na ng QCPD Station 10 ang isasampang kasong paglabag sa Republic Act 9165 o Comprehensive Dangerous Drugs Act of 2002 para sa apat na nahuling suspek.
