Tinatayang mahigit sa anim na libong (6,000) pulis ang ipapakalat ng Quezon City Police District sa Batasan Pambansa sa ikalawang SONA o State of the Nation Address ni Pangulong Rodrigo Duterte sa Hulyo 24.
Ayon kay QCPD District Director Chief Supt. Guillermo Lorenzo Eleazar, magpapatupad sila ng maximum tolerance sa mga rally at protesta ng iba’t ibang militanteng grupo.
Aniya, mahalagang mapanatili ang peace and order sa panahon ng SONA ng ating Pangulo.
Siniguro naman ni Eleazar na walang magaganap na dispersal sa hanay ng mga raliyista sapagka’t isa rin sa mga layunin nila ay protektahan ang mga magpoprotesta.
By Jelbert Perdez
Tiwala si Nadine Lustre na suportado siya ng kanyang pamilya sa usaping pagli-live in nila ng boyfriend na si James Reid.
Ayon kay Nadine, nais niyang maging tapat sa kanilang fans ni James kayat wala siyang pinagsisisihan sa tila pag-amin na nagsasama na sila ng boyfriend sa iisang bubong.
Sa kabila ito nang pagbatikos sa 23-anyos na aktres sa naging sagot na wala naman aniyang masama kung totoong nagli-live in na sila ng aktor.
Sinabi ni Nadine na pareho sila ni James na ayaw magtago ng bagay-bagay o magsinungaling bagamat mayroon aniyang mga bagay na hindi na kailangang i-broadcast pa o sabihin sa iba.
Binigyang diin ni Nadine na batid niyang susuportahan siya ng kanyang pamilya na higit na nakakakilala sa kanya at hindi niya rin pinagtataguan ng anumang nangyayari lalo na sa kanyang lovelife.
Basta aniya okay at masaya siya ay okay na rin at masaya para sa kanya ang kanyang pamilya.
Gayunman, nilinaw ni Nadine na malayo pa sa kanilang isip ni James na magpakasal at sa halip ay patuloy muna silang magfo-focus sa kanilang career.
‘Bey-bies’ ipinasilip na sa publiko!
Samantala, ibinahagi naman ng pop star na si Beyonce sa isang litrato ang kanyang twins na isang buwang gulang na.
Ipinakita ni Beyonce sa kanyang instagram ang first official photo niya kasama ang kanyang kambal na sina Sir Carter at Rumi.
Ang tinaguriang Queen Bey ay nakasuot ng isang mahabang dress, may kulay blue na veil sa kanyang ulo at bitbit ang kanyang twins habang nakatayo sa magagandang bulaklak bilang backdrop.
By Judith Larino
Photos: Beyonce / Nadine Lustre / Instagram
Hindi ikinababahala ng Duterte administration ang patuloy na paghina ng piso kontra dolyar kung saan malapit na ito sa 11-year low record.
Ayon kay Budget Secretary Benjamin Diokno nakikinabang ang mahigit kalahati ng mga Pilipino kapag bumababa ang halaga ng piso kontra sa dolyar dahil sa dollar remittances.
Sinabi pa ni Diokno na pabor din sa export sector ang paghina ng piso dahil nakakalikha ng dagdag na trabaho kaya’t hindi dapat mabahala sa P48 hanggang P52 na katumbas ng isang dolyar na pasok pa rin sa kanilang target.
Hindi rin aniya masyadong naka-depende ang Pilipinas sa foreign loan dahil sa pagpasok ng BPO income at Overseas Filipino Remittances.
By Judith Larino
Inamin ni Pangulong Rodrigo Duterte na hindi siya masaya bilang Presidente.
Ayon kay Duterte, kahit noong panahon pa lang ng kampanya ay alam na niya ang malaking problemang kakaharapin niya tulad na lang ng iligal na droga, kriminalidad at terorismo.
Ipinagmalaki naman ng Presidente na sa lahat ng mga kandidato na tumakbo sa pagka-Pangulo ay siya lang ang naglakas-loob na talakayin ang suliranin sa Mindanao.
Sa kabila nito, inamin ng Pangulong Duterte na hindi niya inaasahan na ganoon kalakas ang mga teroristang nakapasok sa rehiyon.
Muli ring nangako ang Pangulo na susugod siya sa Marawi City para ipakita ang solido niyang suporta ang tropa ng pamahalaan.
PAKINGGAN: Bahagi ng pahayag ni Pangulong Duterte
By Jelbert Perdez
Umaasa ang Malakaniyang na tuluyan nang makakamit ng pamilya ng SAF 44 ang katarungan sa desisyon ng Ombudsman na kasuhan ng kriminal ang dating Pangulong Noynoy Aquino kaugnay sa Mamasapano Incident.
Ayon kay Presidential Spokesman Ernesto Abella iginagalang nila ang hakbang ni Ombudsman Conchita Carpio Morales dahil mandato nito na imbestigahan ang mga opisyal ng gobyerno.
Sinabi ni Abella na kinikilala ng pangulong Rodrigo Duterte ang kabayanihan at sakripisyo ng mga napatay na miyembro ng PNP SAF.
Tiwala aniya silang ang nasabing hakbang ng Ombudsman ay magbibigay daan sa closure ng insidente bilang bahagi nang paghihilom ng sugat sa sinapit ng SAF 44 mula sa kamay ng mga rebeldeng Moro sa Maguindanao.
By: Judith Larino / Aileen Taliping
Naghain ng manifestation sa Korte Suprema ang ilang petitioner sa idineklarang Martial Law sa Mindanao ng Pangulong Rodrigo Duterte.
Hiniling ng mga petitioner sa pangunguna ni dating Solicitor General Florin Hilbay sa Korte Suprema na resolbahin ang kanilang naunang Petition for Mandamus para atasan ang Senado at Kamara na mag convene para mapag aralan ang Martial Law sa Mindanao.
Sinabi ni Hilbay na naghain sila ng manifestation dahil matatapos na ang 60 day period na epektibo ang martial law subalit wala pa ring joint session.
Nakasaad sa manifestation na ang ikinunsider lamang ng high tribunal sa pagsasabing legal ang martial law declaration ng Pangulo ay pinagbatayan nito ang mga impormasyon at data na available nuong panahon ng deklarasyon nito.
Ayon naman kay dating AKBAYAN Partylist Representative Etta Rosales dapat nang utusan ng Korte Suprema ang Kongreso na magsagawa ng joint session para malaman ng publiko ang resulta ng pagsasailalim sa batas militar sa buong Mindanao.
By: Judith Larino / Bert Mozo
Hindi sinunod ni resigned BUCOR Chief Benjamin Delos Santos ang kautusan ni Justice Secretary Vitaliano Aguirre na manatili muna siya sa puwesto habang wala pang tugon ang Malakaniyang sa kaniyang irrevocable resignation.
Sinabi ni Delos Santos na sa halip na pigilan siya ang dapat gawin ni Aguirre ay magtalaga ng OIC sa BUCOR hanggat hindi pa nagtatalaga ng bagong hepe rito ang Pangulong Rodrigo Duterte.
Ayon kay Delos Santos simula pa nuong Huwebes ay hindi na siya pumasok sa BUCOR nang isumite niya sa tanggapan ni Aguirre ang kaniyang irrevocable resignation na naka address sa Pangulong Duterte.
By: Judith Larino / Bert Mozo
Mas pinaniniwalaan ni Senate Minority Floorleader Franklin Drilon ang naging findings ng Senate Committee on Public Order sa Mamasapano incident kung saan wala silang nakitang criminal liability ang dating Pangulong Noynoy Aquino.
Sa halip inihayag ni Drilon na inirekomenda lang kasuhan sina dating PNP Chief Alan Purisima dahil sa paglabag sa Revised Penal Code gayundin kay dating PNP SAF Commander Getulio Napenias.
Ang pahayag ni Drilon ay kasunod na rin ng kautusan ng Ombudsman na kasuhan ng kriminal ang dating Pangulo kaugnay sa Mamasapano Incident.
By: Judith Larino / Cely Bueno
