Malabong matapos ang krisis sa Marawi City bago ang SONA o State of the Nation Address ni Pangulong Rodrigo Duterte.
Giit ni AFP o Armed Forces of the Philippines Spokesman Brig. General Restituto Padilla Jr., kailangan pa nilang linisin ang tinatayang 600 gusali na inokupa ng Maute terrorists group.
Magugunitang nagtakda muli ng palugit na labing-limang (15) araw si Pangulong Duterte sa militar para tapusin ang Marawi siege.
Aalamin naman ni Defense Secretary Delfin Lorenzana kay Pangulong Duterte kung palalawigin pa o hindi Batas Militar sa buong Mindanao.
Pumapalo na sa mahigit limang daan (500) ang death toll sa Marawi, kabilang ang halos apat na raang (400) terorista, halos isang daang (100) miyembro ng security forces at apatnapu’t limang (45) sibilyan.
By Jelbert Perdez
Kinilala ng Pangulong Rodrigo Duterte ang tulong ng Amerika at China sa kampanya ng pamahalaan kontra sa mga terorista sa Marawi City.
Winelcome rin ng Pangulo ang pahiwatig na tulong ng Russia para sa anti-terrorism campaign ng gobyernong Duterte.
Sa kanyang pagharap sa mga turistang Filipino American sa Davao City, tiniyak ng Pangulo na susunod ang bansa sa 1951 Mutual Defense Treaty sa pagitan ng Pilipinas at Amerika.
Gayunman, binakbakan pa rin ng Pangulo si dating US President Barack Obama dahil sa mga batikos nito sa kampanya ng administrasyon laban sa iligal na droga.
By Judith Larino
Handa na sa kanilang pagsabak sa matinding ensayo sa Japan ang women’s national volleyball team ng Pilipinas.
Sinasabing ito’y bilang paghahanda sa mga naka-linyang kompetisyon sa Asian Seniors Championship at Southeast Asian (SEA) Games sa Agosto.
Sinasabing determinado ang koponan na makapagbigay ng magandang performance para sa bansa.
Kabilang sa mga inaasahang sasabak sa SEA Games sina three-time UAAP most valuable player Alyssa Valdez, Mika Reyes, Jaja Santiago, Rachel Anne Daquis at Jovelyn Gonzaga.
By Jelbert Perdez
Isa na namang evacuee ang tinamaan ng ligaw na bala habang nagpapahinga sa itinalagang quarters para sa kanila sa ikalawang palapag ng isang gusali sa loob ng compound ng kapitolyo sa Marawi City.
Ipinabatid ng 55-taong gulang na si Sulaiman Mangorsi na kalalabas lamang niya ng banyo at tumabi sa higaan sa kaniyang misis nang makaramdam ng sakit sa kaliwang braso.
Bigla aniyang namanhid ang kanyang braso na nakitaan niya ng sugat.
Sinabi ni Mangorsi na kaagad siyang isinugod sa Amai Pakpak Medical Center kung saan siya inoperahan na matapos bumaon sa kalamnan ang bala ng caliber 56 na tumama sa kaniya.
By Judith Larino
Nananatiling unliquidated ang halos tatlong (3) milyong pisong inilaan para sa operasyon ng PCOO o Presidential Communications Operations Office para sa mga opisyal na biyahe ng Pangulong Rodrigo Duterte.
Sa kanilang audit report, ipinabatid ng COA o Commission on Audit na bigo ang labing apat na PCOO officials na tumugon sa panahong ibinigay sa kanila para i-liquidate ang kanilang cash advances.
Ayon sa COA, sa bawat biyahe ng Pangulo, sa loob o labas ng bansa ay mayroong itinatalagang opisyal ng PCOO bilang special disbursing officer na siyang kukuha ng cash para sa media operational expenses.
Bahagi ng operational expenses ang supplies, arkila ng equipment at mga sasakyan, pagkain at iba pang kailangan.
Ipinabatid ng COA na si Presidential Spokesman Ernesto Abella ang may pinakamaraming unliquidated cash advances na pumapalo sa halos dalawang (2) milyong piso para sa biyahe ng Pangulo sa Brunei at Indonesia at pagdalo ng chief executive sa ASEAN Summit sa Laos.
Nai-settle naman ni Abella ang cash advances matapos ang halos dalawang buwan.
Nasa halos P230,000 naman ang nakalista sa pangalan ni Assistant Secretary Michel Kristian ablan para sa isang national communications workshop noong September 2016 at nakapag-liquidate ito matapos ang walumpu’t pitong (87) araw.
Ang iba pang PCOO officials na hindi pa nakakapag-liquidate ng cash advances sina Ma. Teresa Hernandez, Miguel Achacoso, Ace Contemprato, Ramon Cualoping III at Karl Fajardo.
Samantala, tanging si dating PCOO Undersecretary Renato Marfil naman ang nag-iisang opisyal ng nakalipas na Aquino administration na hindi pa nakapagli-liquidate ng halos P20,000 na cash advance nito.
By Judith Larino
Dalawang (2) turista ang nasawi habang apat (4) na iba pa ang nasugatan makaraang pagsasaksakin sa isang beach resort sa Hurghada, Egypt.
Batay sa ulat ng Al-Ahram News Agency, inilarawan ang mga napatay na mga Ukrainian.
Subalit ayaw namang kumpirmahin ni Ukrainian Foreign Ministry Official Vasyl Kyrylych na mga kababayan nila ang mga nasawi.
Sinasabing lumangoy lang mula sa kabilang beach resort ang suspek at nang makita ang mga biktima ay walang awang pinagsasaksak ang mga ito.
By Jelbert Perdez
*Photo: EPA
Ang Hulyo ay disaster consciousness month, ano ang mga ginagawa ng ating gobyerno para paghandaan ang pagtama ng mga kalamidad sa bansa kagaya na lamang ng lindol? Ano ang ginagawa mong paghahanda?
Ang malalimang pag-Siyasat ng DWIZ sa tumamang magnitude 6.5 na lindol sa Leyte kamakailan lang.
PAKINGGAN:
Photo Credit: @phivolcs_dost / Twitter
