Libu-libo katao ang lumahok sa malawakang rally sa Istanbul, Turkey sa unang anibersaryo ng nabigong kudeta na layuning magpatalsik kay President Recep Tayyip Erdogan sa pwesto.
Binigyang pugay naman ng mga raliyista sa pangunguna ni Erdogan ang dalawandaan animnapung nasawi na karamiha’y sundalo sa ipinakita nilang kabayanihan at katapangan upang tuluyang madurog ang mga tinatawag nilang traydor.
Nag-martsa ang libu-libong turko sa bosphorus bridge na ngayo’y tinawag ng July 15 martyr’s bridge bilang pakikiisa at suporta kay Erdogan.
Ibinabala rin ng pangulo na kanyang ibabalik ang bitay at pupugutan ang sinumang sangkot sa pagpapabagsak sa gobyerno na posible namang magwakas sa ambition ng Turkey na mapabilang sa European Union.
Ang Turkey ang tanging Islamic country sa middle east na walang parusang kamatayan.
By Drew Nacino (Photo Credit: Associated Press)
Nanindigan ang Malacañang na na-liquidate nang maayos partikular ng Presidential Communications Operations Office (PCOO) ang mga naging biyahe ng pangulo sa ibang bansa.
Inihayag ito ni Presidential Spokesman Ernesto Abella bilang tugon sa pahayag ng Commission on Audit (COA) na ilang milyong piso umano ang hindi na-liquidate sa mga naging biyahe nito sa Brunei, Indonesia at ilan pang bansa sa mga naging presidential trips ni Pangulong Rodrigo Duterte.
Ayon kay Abella, mismong si PCOO undersecretary Noel Puyat ang makapagpapatunay na agad nili-liquidate ang mga cash advances ilang araw matapos makabalik sa bansa ang pangulo.
Sa pagkakaintindi ng kalihim, pinoproseso pa ng accounting ang lahat ng liquidation para isumite sa COA.
Kaugnay nito, sinabi ni Usec. Puyat na sa pinakahuling annual audit report ng COA, walang notice of suspension, disallowance o charges na inisyu sa PCOO para sa taong 2016.
Ang napansin aniya ng COA ay ang gastos ng nakalipas na administrasyon na P 20 million mula Enero hanggang hunyo ng nakalipas na taon na ginamit umano sa media representation gaya ng pagkain, inumin, gifts at raffle prizes at karamihan dito ay hindi suportado ng official documents.
By Meann Tanbio
Labinlima pang gusali ang nabawi ng mga tropa ng gobyerno mula sa ISIS-Maute group sa Marawi City, Lanao del Sur.
Ayon kay Armed Forces of the Philippines Spokesman, Brig. Gen. Restituto Padilla, mahigit limandaang armas na anya ng mga terorista ang kanilang narekober simula noong Mayo a-bente tres.
Tinatayang isanlibo pitundaang sibilyan naman anya ang narescue mula sa mga terorista.
Nagdeploy na rin ang army ng civil-military operations regiment sa lungsod bilang inisyal na hakbang para sa rehabilitasyon ng lungsod.
Pagsusupply ng mga armas ng Amerika upang labanan ang ISIS-Maute group, kinumpirma ng pangulo
Samantala, inamin ni Pangulong Rodrigo Duterte na nag-su-supply ng mga armas ang Amerika sa Armed Forces of the Philippines upang labanan ang ISIS-Maute group sa Marawi City, Lanao del Sur.
Ito’y sa kabila ng nagpapatuloy na mga patutsada ni Pangulong Duterte at kahit sinuplayan din ng Tsina ng mga baril at bala ang mga tropa ng gobyerno.
Gayunman, nilinaw ng punong ehekutibo na walang mga bagong military alliances ang Pilipinas sa ibang bansa kahit mayroong iba pang pinagkukunan ng mga armas at bala.
Isa anyang paglabag sa RP-US agreement sakaling pumasok ang Pilipinas sa isa pang kasunduan.
Samantala, bukas naman si Pangulong Duterte sa lahat ng tulong para sa karagdagang firepower na magmumula sa ibang bansa.
By Drew Nacino
Ikinalugod ng ilan sa byuda ng apatnapu’t apat na nasawing miyembro ng PNP-Special Action Force ang pagsasampa ng kaso laban kay dating Pangulong Noynoy Aquino kaugnay sa nabigong operasyon sa Mamasapano, Maguindanao noong 2015.
Ayon kay Kristine Clemencio, byuda ni PO1 Mark Lory Clemencio ng Carigara, Leyte, umaasa sila na ang paghahabla sa dating pangulo ang simula ng kanilang paghahanap ng katarungan.
Inihayag naman ni Dr. Christine Cempron, biyuda ni PO1 Romeo Cempron na napakasaya nila dahil sa wakas ay nagkaroon na sila ng pag-asa na makamit ang hustisya na kanilang inaasam makalipas ang dalawang taon.
Aminado si Clemencio nanatili ang kanilang takot dahil maaaring mabaliwala ang kaso laban kay Aquino lalo’t maimpluwensya pa rin ito bilang dating pangulo.
Magugunitang sinampahan si Aquino ng kasong usurpation of authority sa ilalim ng article 177 ng revised penal code at violation ng section 3-a ng anti-graft and corrupt practices act.
Dawit din sina dating Philippine National Police chief Alan Purisima at dating Special Action Force chief Getulio Napeñas.
By Drew Nacino
Tinanghal na Miss Philippines-Earth ang medical physicist mula Maynila na si Karen Ibasco sa ginanap na coronation night sa Mall of Asia Arena in Pasay City.
Ipinasa ni Loren Mar Artajos ang kanyang korona sa bente sais anyos na si Karen na napili mula sa tatlumpu’t siyam na kalahok ng naturang beauty pageant.
Si Ibasco ang kakatawan sa Pilipinas sa Miss Earth pageant na gaganapin sa bansa sa Nobyembre.
Nasungkit naman ni Kim de Guzman ng Olongapo, ang Miss Philippines-Air title habang si Jessica Marasigan ng Caloocan ang tinanghal na Miss Philippines-Water.
Iginawad naman kay Nella Bautista mula Misamis Oriental ang Miss Philippines-Fire title habang si Vanessa Mae Castillo ng Batangas ang tumanggap ng titulong miss Philippines-Ecotourism.
By Drew Nacino
Personal na binisita ni Pangulong Rodrigo Duterte sa Jolo, Sulu ang labing dalawang (12) sundalong nasugatan sa engkwentro sa Mindanao noong Hulyo 8.
Ginawaran ng Pangulo ng wounded personal medal sina 1 Lt. Niño John Paner; Lt. Ian Solatre; Cpl. Jeric Ghil Villaruz; Cpl. Alan Bartolome; PFC Rhenievon Saliw-An; PFC Jeremy Ganagan; PFC Jaifryll Tamayo; PFC Reynan Maristela; PFC Vergel Bali; PFC Polard Banggawan; Pvt. Tonie Mar Talatayud; at Pvt. John Paul Annang.
Nasugatan ang mga nabanggit na sundalo makaraang maka-engkwentro ang grupo na pinamumunuan ni Abu Sayyaf Leader Almujer Yada sa Barangay Darayan sa Bakan ng Patikul sa Sulu.
Kasalukuyang naka-confine sa Camp Teodulfo Bautista Station Hospital ang mga ito.
- Meann Tanbio
Muling iginiit ni Labor Secretary Silvestre Bello III na libre ang OFW ID o iDOLE card.
Kasunod na rin ito ng pahayag ng Kodao Productions na nadismaya ang ilang Pinoy makaraang madiskubre sa pamamagitan ng pag-access sa iDOLE portal na may bayad ng P501 ang nasabing OFW ID.
Sinabi ni Bello na libreng ipagkakaloob ang nasabing OFW ID na nakatakdang ilabas sa Agosto kapag naisapubliko na ang implementing rules ukol dito.
Ang iDOLE card ang papalit sa OEC o Overseas Employment Certificate na kinukuha ng mga umaalis na OFW sa Philippine Overseas Employment Administration (POEA).
- Meann Tanbio
Dinukot ng Abu Sayyaf Group ang limang (5) construction workers sa Patikul, Sulu.
Ayon sa Patikul Municipal Police Station, nangyari ang pagdukot ala-1:30 ng madaling araw nang salakayin ng mga bandido ang Kawpang Elementary School Sports Complex, saka dinukot ang lima.
Kinilala ang mga biktima na sina joel Adanza, Felimon Jung Guerrero, Edmundo Ramos at Jayson Ramos Vailosis na pawang residente ng Barangay Tumaga; at Jenly Miranda ng Barangay Pasonanca, Zamboanga City.
Humihingi umano ang Abu Sayyaf ng tig-isang milyong pisong (P1-M) ransom sa kaanak ng mga dinukot na biktima.
- Meann Tanbio
Lomobo pa ang bilang ng mga namamatay sa nagpapatuloy na bakbakan sa Marawi City.
Batay sa datos ng AFP o Armed Forces of the Philippines, umabot na sa 537 ang death toll kung saan siyamnapu’t tatlo (93) dito ay mula sa hanay ng pamahalaan, samantalang 399 ang nasawi mula sa panig ng mga terorista.
Pumapalo naman sa 45 sibilyan ang napatay sa walang tigil na bakbakan.
Samantala, aabot sa 502 mga baril ang nakumpiska at narekober mula sa mga bandido.
- Meann Tanbio