Posibleng mga dayuhan ang mga nasa puneraryang hindi pa naki-claim o walang kumukuha kaugnay sa pinaigting na anti-drug operations ng pamahalaan.
Ito ang inihayag ni Pangulong Rodrigo Duterte, kasunod ng pahayag ng mga may-ari ng punerarya na marami pa rin ang hindi nakukuhang mga bangkay mula noong simulan ang kampanya kontra droga.
Ayon sa Pangulo hindi malayong mga dayuhan ang hindi pa nake-claim na mga patay dahil walang kamag-anak ang mga ito sa bansa.
Nagrereklamo na umano ang mga may-ari ng punerarya na nalulugi na dahil marami sa mga nakaimbak sa kanilang punerarya ay walang kumukuha kayat nais na ng mga ito na ipalibing na.
By: Aileen Taliping
Nasabat ng mga otoridad ang mahigit 50 gramo ng shabu na nagkakahalag ng mahigit sa 90,000 Piso sa isang drug suspect sa Quezon Province.
Ayon kay Quezon Police Director Senior Supt. Rhoderick Armamento, naaresto ng operatiba ng pulisya ang drug suspect na si Gilbert Limbo habang sakay ng kanyang sasakyan sa barangay Malabanban Norte.
Nakuha kay limbo ang nasa 50.14 grams ng shabu na nakalagay sa 11 plastic sachets.
Si Limbo ay sinasabing big time supplier ng shabu sa mga drug pushers sa ilang mga barangay sa nasabing probinsya.
By: Krista de Dios
Isasapinal sa loob ng linggong ito ng Malacanang ang mga kukuning interpreters para sa ikalawang State of the Nation Address ni Pangulong Rodrigo Duterte.
Sinabi ni Presidential Communications Secretary Martin Andanar, hindi lamang iisa kundi marami ang kukunin para maintindihan ng husto ang mensahe ng Pangulo.
Ang English Interpreter aniya ay kailangang marunong umintindi ng Bisaya at Tagalog dahil baka hindi maiwasang magsalita ng Bisaya ang Presidente.
Sinabi ni Andanar na mayroon ding mga translators na Mandarin, Nihongo, Spanish at titingnan aniya kung isasama rin ang Russian at French para naman sa diplomatic community.
By: Aileen Taliping
Mahigit sa 20,000 mga residente ng Eastern Visayas ang hindi pa nakababalik sa kanilang mga tahanan matapos tumama ang 6.5 magnitude na lindol sa Leyte noong Hulyo 06.
Batay sa tala ng DSWD o Department of Social Welfare and Development, nasa 23 mga barangay sa Eastern Visayas ang matinding napinsala ng nasabing lindol.
Ayon sa ahensya, 12,000 sa mga residente ng Eastern Visayas ang nananatili pa rin sa 19 na mga evacuation centers sa Region 8.
Habang mahigit 9,000 ang pansamantalang nanunuluyan sa kanilang mga kaanak o kaibigan.
By: Krista de Dios
Aasahan ang medyo mahabang talumpati ni Pangulong Rodrigo Duterte sa kanyang ikalawang State of the Nation Address sa darating na July 24.
Sinabi ni Presidential Communications Secretary Martin Andanar na marami ng accomplishment na iuulat ang Pangulo di katulad ng unang SONA na nagsisimula pa lamang ito.
Inaasahan din aniya na ibibida ng Presidente ang mga benepisyong tinatanggap na ngayon ng mga mahihirap na Pilipino.
Sinabi ni Andanar na marami pang gagawin ang Duterte Administration lalo na sa kampanya sa katiwalian, illegal na droga at iba kayat abangan ang ikalawang SONA ng Presidente.
By: Aileen Taliping
Tiwala si Senador Joel Villanueva na mapapawalang sala si dating Pangulong Noynoy Aquino sa kasong isinampa laban dito kaugnay ng pagkasawi ng 44 na mga SAF Commandos sa Maguindanao noong 2015.
Ayon kay Villanueva, naniniwala siyang lalabas din ang katotohanan sa nangyaring operasyon at mababasura ang kaso laban sa dating Pangulo.
Matatandaang si Villanueva at dating pinuno ng TESDA noong panahon ng Aquino Administration.
By: Krista de Dios
Tatlong preso ang napatay habang isa ang nasugatan makaraang tumakas kasama ang 10 iba pa sa Jolo Municipal Police Station sa Jolo, Sulu.
Naganap ang insidente nang pagtakas kaninang ala 1:25 ng madaling araw .
Agad rumesponde ang mga otoridad kayat naagapang makatakas ang lahat ng mga detainees.
Sa ginawang pursuit operations napatay ang 3 preso habang nasugatan ang isa pa na ngayon ay hawak na ng mga otoridad.
Tumulong naman ang Armed Forces of the Philippines sa pagtugis sa mga nakatakas na preso sa pamamagitan ng paggamit ng K9 at drones para matunton ang mga pugante.
By: Aileen Taliping
