Siyam (9) ang nalunod kabilang ang limang bata habang isang teenager ang nawawala matapos ang pagragasa ng baha sa isang kilalang swimming spot sa isang ilog sa Arizona, USA.
Ayon sa hepe ng Fire and Medical District ng Water Wheel Falls Arizona, walang nakapagbigay ng babala sa mga naliligo sa Verde River dahil sa biglaang pagtaas ng lebel ng tubig dito.
Narekober na bangkay ng siyam na biktima noong Linggo habang patuloy na pinaghahanap ang isang labingtatlong (13) gulang na teenager.
Ang pagtaas ng tubig sa nasabing ilog ay dulot malakas na pag-ulan sa Arizona at mga nakaharang na debris matapos ang nangyaring wildfire sa lugar.
By Krista de Dios
Patay ang dalawa (2) katao habang siyam (9) ang sugatan sa pananaksak ng isang lalaki sa China.
Ayon sa Xinhua News Agency, naganap ang insidente sa Wal-Mart Supermarket sa Shenzhen City.
Agad namang naaresto ng Chinese Police ang 30-anyos na salarin.
Batay sa mga ulat, mabilis ang pagtaas ng bilang ng mga kaso ng krimen sa China kasabay ng paglakas ng ekonomiya ng nasabing bansa.
By Krista de Dios
Sumampa na sa mahigit dalawang daang (200) milyong piso ang halaga ng mga pinsalang naidulot ng 6.5 magnitude na lindol sa Leyte noong Hulyo 6.
Batay sa tala ng NDRRMC o National Disaster Risk Reduction and Management Council mahigit isang daang (100) eskwelahan ang nasira, sampung (10) ospital, tatlumpu’t anim (36) na gusali ng gobyerno at pitong (7) commercial buildings.
Mahigit sa tatlong libong at limang daang (3,500) kabahayaan namang nasira ng lindol habang umaabot sa dalawampu’t pitong libong (27,000) mga residente ang apektado.
Sumampa naman sa apat ang bilang ng nasawi at nasa apatnaraan at apatnapu’t walo (448) ang sugatan.
By Krista de Dios | ulat ni Jonathan Andal (Patrol 31)
Nilinaw ng HRVCB o Human Rights Victims Claims Board na walang kaugnayan sa kanila ang dalawang bilyong dolyar na danyos para sa biktima ng Martial Law na ibinasura ng Court of Appeals o CA.
Ayon kay Retired Chief Supt. Lina Sarmiento, Chairperson ng HRVCB, ang ibinasura ng CA ay ang napanalunan ng mga biktima sa US Federal Court sa Hawaii.
Samantala, ang ipinagkakaloob na danyos anya ng HRVCB ay itinakda ng batas at ang pondong ginagamit nila ay ang perang ibinalik ng Swiss Bank sa bansa.
“Labas po kami sa kasong yun, ang perang ating pong ipamimigay fixed po ito, hindi dito kukunin ang whatever na ibibigay sa kanila, ang pagiging magkamag-anak lamang po ng kanilang grupo sa amin ay yung mga nanalo sa Hawaii sila po ay itinuturing na conclusively presumed so medyo maluwag po tayo sa pagdedesisyon sa kanilang mga claims sa pagsasabi ng batas sila ay conclusively presumed, liban doon wala na po.” Ani Sarmiento
Sa ngayon, apat na libong (4,000) human rights victims na ang nabigyan ng danyos ng HRVCB.
Sinabi ni Sarmiento na ang naturang bilang pa lamang ang na aprubahan mula sa mahigit apatnapung libong (40,000) applicants na lumusot na sa adjudication board.
May pitumpu’t limang libong (75,000) aplikante para makakuha ng danyos subalit hindi anya lahat ay maaprubahan.
“Ang lahat naman po ng claims ay may desisyon so lahat ng claimants makakatanggap ng desisyon kung bakit na-approved o denied ang kanilang claims, so nilalagay namin doon kung bakit na-deny syempre walang ebidensya o walang personal na alam yung mga nag-testigo sa affidavit.” Pahayag ni Sarmiento
Una rito ay ibinasura ng Court of Appeals ang inihaing petisyon ng mga biktima ng Martial Law ni yumaong dating Pangulong Ferdinand Marcos.
Ito’y upang ipatupad ang naging desisyon ng US Federal Court noong Pebrero 1995 kung saan pinagbabayad ng dalawang bilyong dolyar na danyos ang pamilya Marcos sa mga naging biktima ng paglabag sa karapatang pantao sa panahon ng diktadurya.
Batay sa inilabas na desisyon ng 12th Division ng Appelate Court, hindi maaaring ipatupad sa Pilipinas ang desisyon ng US Federal Court lalo’t wala itong hurisdiksyon sa mga usaping panloob ng Pilipinas.
Ayon kay CA Associate Justice Normandie Pizarro, walang kapangyarihang magpasya o humatol ang alinmang dayuhang korte alinsunod na rin sa itinatadhana ng Saligang Batas ng Pilipinas hinggil sa usapin ng soberenya.
By Len Aguirre | Ratsada Balita (Interview) | Jaymark Dagala
Plano ng Pilipinas na magpatupad ng bilateral free trade agreement sa Amerika bilang bahagi ng pagpapalakas ng relasyon sa pagitan ng dalawang bansa.
Ayon kay Trade Usec. Ceferino Rodolfo, matagal nang nais ng Pilipinas na mapaganda pa ang ugnayan nito sa Amerika bilang tading partner nito.
Bagama’t hindi na bahagi ang Amerika ng TPP o Trans Pacific Partnership, sinabi ni Usec. Rodolfo na plano nilang paigtingin ang GSP o General System of Preference na siya namang patuloy na ginagawa ng Pilipinas.
Sa isinagawang TIFA o Trade and Investment Framework Agreement Meeting noong isang linggo, inihayag ng Amerika na bukas sila sa nasabing plano ng Pilipinas.
By Jaymark Dagala
Tanging ang Pilipinas lamang mula sa mga kalapit bansa nito sa rehiyon ng Asya-Pasipiko ang may positibong pananaw sa North Korea sa kabila ng pagpapakawala nito ng mga missile.
Ito ang lumabas sa survey ng US based Pew Research Center kung saan, mahigit sa kalahati ng mga Pilipino o 53 percent ang nagsabing walang problema sa kanila ang ginagawa ng NoKor sa pagsasagawa ng mga missile test.
Gayunman, lumabas din sa survey na bagama’t nakakuha ng paborableng tugon ang NoKor mula sa Pilipinas, aabot sa animnapung (60) porsyento ang nagsabing nag-aalala sila sa mga armas nuclear ng NoKor.
Batay sa survey, pinangangambahan ng mga Pinoy na tamaan ang Pilipinas ng mga pakakawalang missile ng NoKor sakaling sumiklab ang digmaan sa pagitan nito at ng mga bansang kumokontra rito tulad ng Amerika.
By Jaymark Dagala
Hindi pinaporma ng Gilas Pilipinas ang team ng Chinese Taipei sa kanilang paghaharap sa William Jones Cup Basketball Tournament kagabi.
Nadomina ng Gilas Pilipinas ang kabuuan ng laro dahil sa matinding performance ni Matthew Wright bagamat nahirapan dahil sa pagbawi ng Chinese Taipei sa fourth quarter.
Dinagdagan pa ni Kiefer Ravena ang lamang ng Gilas nang maka-three point shot na nagbigay sa Gilas ng 80-69 advantage sa tatlong minuto at labing limang segundo na lamang bago matapos ang laro.
Naitala sa 88-72 ang final score ng nasabing bakbakan.
Una nang napaluhod sa team ng Canada ang Gilas noong Sabado.
Makakaharap naman ng Gilas ngayong araw na ito ang B team ng Chinese Taipei.
By Judith Larino
Nakatakdang makipagpulong ng mga senador kay Pangulong Rodrigo Duterte upang tanungin kung may nais pa itong palawigin ang idineklara niyang Batas Militar sa Mindanao.
Ayon kay Senate President Koko Pimentel, sinasabing closed door ang magiging pagpupulong sa Malacañang kasama ang mga security officials upang silipin ang pinakahuling sitwasyon sa Marawi City.
Sa panig naman ni Senador JV Ejercito, batid niyang security briefing lamang sa Marawi ang magiging paksa ng pagpupulong.
Inaasahan naman ni Senador Richard Gordon na hihirit ng extension si Pangulong Duterte sa Martial Law sa Mindanao upang ganap na matapos ang problema roon.
Pero babala naman ni Minority Leader Franklin Drilon, hindi dapat lumagpas ng animnapung (60) araw ang idineklarang Batas Militar sa itinatakda ng konstitusyon.
By Jaymark Dagala
