Humirit si dating Senador Jinggoy Estrada sa Sandiganbayan 5th Division ng dalawang araw na medical furlough.
Nakasaad sa apat na pahinang mosyon ni Estrada na kinakailangan niyang sumailalim sa videocolonoscopy sa Cardinal Santos Medical Center sa San Juan City dahil sa nakitang elevated blood tests.
Ang videocolonoscopy ay isang medical procedure kung saan gagamit ng isang camera na ipapasok sa anus ng isang tao para masuri ang kanyang colon, rectum, at small intestine.
Binanggit din ni Estrada sa kanyang mosyon na tatagal lamang ng tatlumpung minuto hanggang isang oras ang nasabing procedure, pero ang preparasyon aniya dito ay aabutin ng isang araw.
Sakaling pagbigyan ng Korte, sinabi ni Estrada na handa siyang bayaran ang lahat ng gagastusin sa furlough at sasamahan siya ng mga tauhan ng PNP Custodial Center.
- Meann Tanbio
Inihayag ng BSP o Bangko Sentral ng Pilipinas na lumago sa dalawang bilyong dolyar ($2-B) ang portfolio investments noong Hunyo.
Ayon sa BSP, mas mataas ng 36% sa nairehistro na $1.5 bilyon noong Mayo at 11% kumpara sa $1.8 bilyon noong Hunyo ng nakalipas na taon.
Halos 82% ng portfolio investments noong Hunyo ay inilagay sa stock market at ang balanse ay ipinasok sa peso government securities.
Sinabi ng BSP na nakatulong sa pagtaas ng foreign portfolio investments ang inaasahang pagtatapos ng kaguluhan sa Marawi City, ang inaasahang pagpasa ng tax reform package ng gobyerno at ang magandang pananaw ng mga dayuhan sa kita ng mga kumpanya.
- Meann Tanbio
Hihilingin ng DA o Department of Agriculture sa kongreso na mabigyan sila ng walumpung bilyong pisong (P80-B) budget para sa susunod na taon.
Ayon kay Agriculture Secretary Emmanuel Piñol, personal niyang pakikiusapan si Senate Commiittee on Finance Chairperson Loren Legarda na bigyan ang kagawaran ng P80-B para maisagawa ang mga programa na naglalayong mapaunlad ang sektor ng agrikultura.
Sinabi ni Piñol na ilalaan nila ang nasabing pondo sa programang pagpapautang sa mga magsasaka at mangingisda, popondohan ang produksyon ng bawang at sibuyas, pagtatanim ng palay, at iba pang programa ng kagawaran.
Nauna rito, inihayag ng kalihim na P36.4 bilyon lamang ang naaprubahan ng Department of Budget and Management (DBM) para sa tier 1 budget sa taong 2018, mas mababa ng 21% sa budget ng DA ngayong taon na nasa P46 bilyon.
Listahan ng mga importer ng mga produktong agrikultura lilinisin
Nabibilang na ang araw ng mga importer ng produktong agrikultura ng karne, gulay, isda at iba pang produktong pang-agrikultura na kaduda-duda ang business operation.
Ito ang ibinabala ni Agriculture Secretary Emmanuel Piñol matapos makipag-ugnayan sa PNP o Philippine National Police para pangunahan ang pag-iimbestiga sa estado ng kumpanya na nag-aaplay sa DA para makakuha ng import permit ng mga produktong agrikultura.
Ayon kay Piñol, sinimulan nang suriin ang listahan na hawak ng Bureau of Animal Industry at Bureau of Plant Industry kung lehitimo ang kanilang operasyon at may kapasidad na makapag-angkat ng produkto sa ibang bansa.
Target aniya nilang matapos sa lalong madaling panahon ang mandatory evaluation at verification para tuluyang malinis ang listahan ng mga importer ng mga produktong agrikultura.
- Meann Tanbio
Isang sundalo ang nawawala sa Marawi City.
Kinumpirma ni AFP Public Affairs Office Chief Col. Edgard Arevalo na higit isang buwan nang missing in action ang isang miyembro ng Philippine Marines na sinasabing nahulog sa Agos River noong Hunyo 10 sa kasagsagan ng paglusob ng mga ito sa kuta ng grupong MAUTE – ISIS.
Gayunman, hindi muna pinangalanan ni Arevalo ang nawawalang sundalo na miyembro umano ng 7th Marine Battalion at kasamahan ng 13 marines na nasawi sa labing-apat na oras na putukan sa Marawi noong Hunyo.
Wala pa aniya silang impormasyon kung buhay pa o patay na ang nawawalang sundalo dahil hindi pa nila masuyod ang ilog kung saan ito nahulog dahil sa presensya ng mga terorista doon.
- Meann Tanbio | Story from Jonathan Andal
Umaabot na sa P6.3-M ang nalikom na cash donations ng militar para sa mga biktima ng bakbakan sa Marawi City.
Ayon kay AFP Public Affairs Office Chief Col. Edgard Arevalo, P5.5-M sa nakalap nilang donasyon ay mapupunta sa pamilya ng mga nasawing sundalo kung saan tig-P35,000.00 ang kanilang inisyal na matatanggap.
Sinabi pa ni Arevalo na nasa P800,000.00 naman ang ipamamahagi para sa mga residente ng Marawi na lumikas dahil sa giyera.
Matatandaang nagbukas ng dalawang special accounts sa Landbank ang AFP o Armed Forces of the Philippines para sa mga nais magbigay ng donasyon sa mga biktima ng bakbakan sa Marawi City.
- Meann Tanbio | Story from Jonathan Andal
Pansamantalang isinara at ipinatigil ang mga aktibidad sa isang kilalang cave sa Sagada ngayong araw.
Ito ay para mabigyan ng pagkakataon ang pagsasagawa ng search and rescue operations para sa nawawalang tourist guide na naagos ng tubig sa loob ng Victoria Cave sa Barangay Angkeling kahapon.
Kinilala ang nawawala na si Roderick Malecdan na kabilang sa pitong (7) guides na naipit nang tumaas ang tubig sa loob ng kweba.
Ligtas na ang anim na guides na kasama ni Malecdan habang nagpapatuloy pa ang rescue operations para rito.
- Krista De Dios
Inalok ng South Korea ang North Korea na magsagawa ng military talks upang maresolba ang tensyon sa pagitan ng dalawang bansa.
Sa mungkahi ng Defense Ministry ng South Korea, plano nilang isagawa ang pag-uusap sa border ng bayan ng Panmunjun sa Biyernes samantalang nais ng North na isagawa ito sa Agosto 1.
Sakaling, matuloy ang pag-uusap, magkakaroon na ng pagkakataon ang nagkahiwalay na mga pamilya noong 1950 hanggang 1953 Korean war na muling magkita-kita.
Umaasa naman ang South Korea sa positibong sagot ng North Korea.
Ito ang unang pagkakataong inalok ng pag-uusap ng South Korea ang North sa ilalim ng bagong halal na Presidente ng South na si Moon Jae –In.
- Krista De Dios
Tiwala si Deputy Speaker Fredinel Castro na malabong makakuha ng endorser ang impeachment complaint laban kina Vice President Leni Robredo at Ombudsman Conchita Carpio Morales.
Ito ang pananaw ni Castro kaugnay ng pahayag ng isang mambabatas na nakakuha na ng endorser ang impeachment complaint kina Robredo at Morales na nakatakdang isumite sa Agosto.
Ayon kay Castro, sa kaniyang pagkakaalam ay hindi pa umuusad ang mga nasabing reklamo dahil walang mambabatas ang nais na i-endorso ito.
Sinabi naman ni House Justice Committee Chairman Rey Umali, na sakaling tuluyan nang maihain ang impeachment complaint laban sa dalawang opisyal ay kanila itong ipo-proseso alinsunod sa rules na ipinatutupad sa Kamara.
- Krista De Dios | Story from Jill Resontoc
Magkahalong emosyon ang nararamdaman ni Senator Leila De Lima sa naging pasya ng Ombudsman na kasuhan si dating Pangulong Noynoy Aquino kaugnay ng Mamasapano incident.
Ayon kay De Lima, batid niyang ikinalulugod ng pamilya ng mga nasawing apatnaput apat (44) na SAF Commandos ang nasabing development dahil naibsan ang matagal nang hinihinging hustiya.
Aniya, bagamat hindi niya masisisi ang mga pamilya ng SAF 44 at ang naging desisyon ng Ombudsman ay nagpaabot naman si De Lima ng sentimyento at panalangin para sa dating Pangulo sa ikinahaharap na bagong pagsubok.
Dagdag ni De Lima, tiyak na ikinalulugod pa rin ni PNoy na magkakaroon ito ng oportunidad na ipagtanggol ang sarili at malinis ang kanyang pangalan.
Giit pa ng senador, kilala niya ang dating Pangulo na sobrang pinahahalagahan at nirerespeto ang buhay kaya naging napakahirap para dito ang kinahinatnan ng SAF 44.
Pag-imbestiga sa EJK sa bansa iginiit
Iginiit ni Senador Antonio Trillanes IV na dapat pagtuunan na lamang ng pansin at imbestigahan ni Senador Richard Gordon ang mga kaso ng pagpaslang o EKJ sa bansa.
Sa halip ng plano ni Gordon na muling buksan ang imbestigasyon sa Mamasapano incident at ang planong pagpapatawag kay dating Pangulong Noynoy Aquino sa senado.
Ayon kay Trillanes, masusi nang naimbestigahan ng senado ang pumalpak na operasyon ng SAF sa Mamasapano, Maguindanao at napatawag na rin lahat ng resource persons sa public hearing at executive session.
Dagdag pa ni Trillanes na nakapag-sumite na rin ng report ang committee on public order na humawak ng imbestigasyon sa insidente sa pangunguna ni Senador Grace Poe.
- Krista De Dios | Story from Cely Bueno