Ibinunyag ni PNP Chief Dir/Gen. Ronald Bato Dela Rosa ang umano’y planong pag-atake ng NPA o New People’s Army .
Ito’y bago o sa mismong araw ng ikalawang SONA o State of the Nation Address ni Pangulong Rodrigo Duterte sa Hulyo 24.
Kasunod nito, nanawagan si Dela Rosa sa publiko na makiisa sa pagpapanatili ng kapayapaan at kaayusan lalo’t nahaharap na naman ang bansa sa panibagonbg banta ng karahasan.
Sa kabila ng naturang impormasyon, tiniyak naman ni Dela Rosa na magpapatuloy ang hakbang ng pamahalaan para sa isang peace agreement nito sa mga rebeldeng komunista.
Dahil dito, sinabi ng PNP Chief na kanila nang sinumulan ang mga paglalatag ng contingency plan bilang paghahanda sa posibleng pag-atake ng mga rebelde.
By: Jaymark Dagala
Nagpatawag na ng Special Joint Session si Pangulong Rodrigo Duterte upang talakayin ng mataas at mababang kapulungan ng kongreso ang extension ng martial law sa Mindanao.
Ayon kay House Majority Floor Leader Rodolfo Fariñas, magsisimula ang joint special session alas 9:00 ng umaga sa Sabado, Hulyo 22.
Magugunitang isinumite ni Defense Secretary DelfIn Lorenzana kay Pangulong Duterte ang rekomendasyon na palawigin ang batas militar sa Mindanao lalo’t tila malabo pang magwakas ang bakbakan sa Marawi City.
By: Drew Nacino / Jill Resontoc
Sinabayan ng port holiday ng mga truckers ang ginawang transport strike ng mga jeepney drivers kahapon bilang pagtutol sa planong transport modernization ng Administrasyong Duterte.
Ito’y ayon kay Marie Zapanta ng Aduana Business Club ay dahil sa apektado rin sila ng mungkahing pag-phaseout sa mga lumang trak na may 15 taon na ang edad.
Giit ni Zapanta, sakaling maisakatuparan ang nilagdaang Department Order Ni transportation Secretary Art Tugade, tiyak na mauuwi sa pagkalugi ang mga nasa sektor ng trucking sa bansa.
Naglabas din ng sama ng loob si Zapanta sa pamahalaan dahil sa aniya’y hindi nabibigyang prayoridad ang sektor ng trucking lalo’t tila hindi napapansin ang nararanasan nitong pang-aabuso.
By: Jaymark Dagala
Kinansela ng Quezon City Government ang klase sa lahat ng antas sa buong lungsod sa darating na Lunes, Hulyo 24.
Ito’y para magbigay daan sa ikalawang SONA o State of the Nation Address ni Pangulong Rodrigo Duterte na gagawin sa Batasang Pambansa sa naturang lungsod.
Batay sa anunsyo ni Quezon City Mayor Herbert Bautista, saklaw ng kanselasyon ng klase ang mga pribado at pampublikong paaralan.
Ayon kay Bautista, ito’y bilang pag-iingat na rin sa inaasahang mga pagkilos na isasagawa ng iba’t ibang grupo na pabor at kontra sa administrasyon na magreresulta sa masikip na daloy ng trapiko sa nasabing araw.
By: Jaymark Dagala
Labis na ikinalugod ni Senate President Koko Pimentel ang mataas na approval rating na nakuha niya sa Pulse Asia Survey.
Ayon kay Pimentel, natutuwa siya dahil kahit walang professional “P.R. Team” na nakatutok upang i-promote ang kanyang imahe sa publiko ay nakakuha siya ng 62 percent approval rating.
Nangangahulugan ito na ibinatay sa kung ano ang nakikita ng publiko sa paraan ng paggampan niya ng tungkulin bilang leader ng mataas na kapulungan ng Kongreso.
Mapupunta anya ang credit sa buong Senado kabilang sa majority at minority blocs dahil ang ibinigay na rating sa kanya ay alinsunod sa paggampan niya sa tungkulin.
Binati naman ni Pimentel ang kanyang mga kapwa Senador sa nakuha niyang mataas na approval rating sa naturang survey.
By: Drew Nacino / Cely Bueno
Ipinagtanggol ng Malakaniyang ang panibagong pahayag ni Pangulong Rodrigo Duterte patungkol sa umano’y panibagong rape joke nito.
Ito’y makaraang palagan ng iba’t ibang grupo nuong isang linggo ang sinabi ng Pangulo na papupurihan niya kung sinuman ang makagagahasa sa isang Miss Universe kahit pa ikamatay nila iyon.
Ayon kay Presidential Spokesman Ernesto Abella, hindi aniya biro ang sinabi ng Pangulo kundi isang seryosong pahayag.
Hindi aniya dapat tingnan ng publiko na negatibo ang naging pahayag ng Pangulo hinggil sa rape sa halip, tila nais pakahulugan lamang niyon na bilib ang Pangulo sa sinumang makagagawa ng gayung hakbang kahit pa buhay nila ang maging kapalit niyon
By: Jaymark Dagala
Papasok na rin sa imbestigasyon ang National Bureau of Investigation o NBI sa pinakahuling insidente ng pagpatay sa isang Doctor to the Barrio ng Department of Health sa Cavite.
Sa Department Order 486 na pirmado ni Justice Secretary Vitaliano Aguirre, inatasan nito ang NBI na magsagawa ng imbestigasyon at case build-up sa pamamaril ng riding-in-tandem kay Dr. George Repique Junior noong gabi ng July 11 sa Trece Martires.
Si Repique ang Provincial Health Officer ng naturang lalawigan na tinambangan ng hindi pa nakilalang salarin habang lulan ng kanyang sasakyan pauwi kasama ang driver na si Riorito Bacasa.
Nakaupo si Repique sa likod ng sasakyan nang puntiryahin ng gunman at nagtamo ng limang tama ng bala habang tinamaan sa hita ang kanyang driver.
Pinagsusumite rin ng DOJ ang NBI ng report at rekomendasyon sa sandaling matapos na nito ang kanilang imbestigasyon.
By: Drew Nacino / Bert Mozo
Agad na kukuwestyunin ng Anti-Pork Barrel Scam Lawyer na si Atty. Levito Baligod ang napapaulat na pagpayag umano ng Sandiganbayan 5th division na pagpiyansahin para pansamantalang makalaya si dating Senador Jinggoy Estrada na akusado sa kasong plunder dahil sa Pork Barrel Scam.
Naniniwala si Baligod na malakas ang isinampa nilang reklamo laban kay Estrada at Napoles kaya hindi siya papayag na basta na lamang mapapapalaya si Estrada.
Sapat anya ang mga nalalaman ng mga testigo at dokumento para patunayan na nakinabang o tumanggap ang dating Senador ng pera mula sa kanyang PDAF allocation sa pamamagitan ng pagpapadaan ng pondo sa mga Non Government Organization na kunektado kay Janet Lim Napoles.
Mayo ng nakalipas na taon ay pinal na ring nagpasya ang dating komposisyon ng 5th Division na huwag katigan ang hirit na pyansa ni Estrada makaraan nitong ibasura ang inihaing Motion for Reconsideration ng dating Senador.
Gayunman, lumulutang na mayroon umanong draft resolution ang Sandiganbayan 5th division na binubuo ng mga bagong miyembro na sina Justices Rafael Lagos, Maria Theresa Mendoza-Arcega at Reynaldo Cruz na pawang mga appointee ni dating Pangulong Noynoy Aquino para pakawalan si Estrada sa pamamagitan ng pyansa.
By: Drew Nacino / Bert Mozo
