Nakahanda si Chairman Dionisio Santiago ng Dangerous Drugs Board o DDB na magbalik bilang direktor ng BuCor o Bureau of Corrections.
Ayon kay Santiago, susunod lamang siya kung magpasya ang Pangulong Rodrigo Duterte na ilagay siya sa BuCor batay sa rekomendasyon ni Justice Secretary Vitaliano Aguirre.
Aminado si Santiago na bahagya lamang niyang nasawata ang illegal drugs trade sa loob ng New Bilibid Prison noong una siyang manungkulan bilang direktor ng BuCor sa panahon ng administrasyon ni dating Pangulong Gloria Arroyo.
Isa sa nakikita niyang malaking problema ang ay ang malaking suplay pa rin ng droga na nakakalat sa labas ng NBP.
“Ang importante diyan sa mga taong yan ay makapag-communicate eh, they may not necessarily do their manufacturing sa loob pero marami pa ring gumagalaw sa labas eh, andiyan yung network, best effort tayo dito, kailangan talaga natin ng help ng law enforcement kagaya ng PDEA.” Ani Santiago
Samantala, sumiklab ang galit ni Santiago sa ulat na ilang dating tauhan niya sa PDEA o Philippine Drug Enforcement Agency ang kumikilos para buhayin ang kaso laban sa kanya at harangin ang kanyang appointment sa pamahalaan.
Tinukoy ni Santiago si dating PDEA at dati ring BuCor Deputy Diector Rene Orbe na tumayong testigo sa isinampang kaso laban sa kanya subalit ibinasura rin ng korte.
Kung tutuusin ang grupo anya ni Orbe at resigned BuCor Chief Benjamin delos Santos ang pasimuno sa mga kalokohan sa loob ng pambansang piitan.
“G*go yang mga yan kaya sila ang bumabara sa akin, they are reviving my case , magalit na sila pero hindi nila mapipigil ang bunganga ko, we cannot stop the drugs in the Philippines id some people who are appointed are into drugs, naimbestigahan na yan they made money out of the inmates diyan, sila ang responsible ng transfer ng inmates from Maximum to Medium.” Pahayag ni Santiago.
By Len Aguirre | Ratsada Balita (Interview)
Aabot sa walumpung libong (80,000) diapers para sa mga bata ang ipinamahagi sa mga evacuation centers na kinaroroonan ng mga apektadong residente ng kaguluhan sa Marawi City.
Ang naturang mga donasyon ay nagmula sa ARMM o Autonomous Region in Muslim Mindanao, Philippine Business for Social Progress at iba pang private donors.
Ayon kay ARMM Cabinet Secretary Khal Mambuay-Campong, layon nitong tulungan ang mga magulang para hindi na maghanap pa ng mga diaper na importante aniya lalo’t kapos ang suplay ng tubig sa mga evacuation center.
Maliban sa mga diaper, tuloy-tuloy din ang pagpapadala ng ARMM government ng hygiene kits at mga gamot sa apektadong residente ng Marawi.
By Ralph Obina
Niyanig ng 7.8 na lindol ang Russia.
Natukoy ang sentro ng lindol sa layong tatlongdaang (300) kilometro sa Eastern Coast ng Kamchatka.
Nasundan pa ang naturang lindol ng aftershock na nasa magnitude 5.
Wala namang inaasahang tsunami matapos ang naturang pagyanig.
Una rito, 7.4 magnitude na lindol lamang ang nairehistrong lakas ng lindol ngunit kalaunan ay itinaas ito sa magnitude 7.8.
By Ralph Obina
Muling nanalo ang Gilas Pilipinas kontra sa team ng Chinese Taipei.
Matapos manalo sa team A, nakaharap naman ng Gilas ang team ng Chinese Taipei sa nagpapatuloy na Jones Cup sa Taiwan.
Nabatid na unang lumamang ang Chinese Taipei sa unang quarter subalit gumanti sa second qaurter sina Kiefer Ravena at Mike Myers kayat Gilas na ang lumamang subalit naging dikitan ang laban.
Dumating pa sa puntong naging emosyonal ang mga players kabilang si Matthew Wright na nagkaroon ng tensyon sa isang manlalaro ng Team B.
Sa huli, hindi naligalig ang Gilas at naitala ang 93 points kontra sa 82 points ng Chinese Taipei Team B.
By Judith Larino
Umakyat na sa mahigit limangdaan (500) ang bilang ng mga nasasawi sa nagpapatuloy pa ring bakbakan sa pagitan ng militar at Maute terror group sa Marawi City.
Ayon kay Joint Task Force Marawi Spokesman Lt. Col. Jo-ar Herrera, nasa apatnaraan at limang (405) mga terorista na ang nasawi sa bakbakan.
Siyamnapu’t pito (97) naman aniya ang nalagas sa panig ng mga awtoridad habang nasa apatnapu’t lima (45) ang mga sibilyan.
Samantala, nasa isanlibo pitongdaan at limampu’t tatlong (1,753) sibilyan ang nailigtas ng militar sa isinasagawang clearing operations sa mga lugar na kinubkob ng Maute group.
By Jaymark Dagala
Tiniyak ng pamahalaan ang tuluy-tuloy na pagpapatupad ng 4P’s o Pantawid Pamilyang Pilipino Program ng pamahalaan.
Ito ang ginawang paglilinaw ni Social Welfare Secretary Judy Taguiwalo kasunod ng nakatakdang pagtatapos ng partnership ng ahensya sa ADB o Asian Development Bank sa taong 2019.
Giit ng kalihim, hindi matatapos ang pagbibigay tulong ng pamahalaan sa mga mahihirap na Pilipino dahil magpapatuloy ang gagawin nilang pagsusuri sa pamamagitan ng kanilang Kumustahan Program.
Batay sa pinakahuling tala ng DSWD, aabot na sa isa’t kalahating milyong mahihirap na Pinoy ang benepisyaryo ng 4P’s na sinimulan pa noong administrasyong Arroyo.
By Jaymark Dagala
Ikinakasa na ng LTFRB o Land Transportation Franchising and Regulatory Board ang kasong isasampa laban sa PISTON o Pinagkaisang Samahan ng Transport Operators Nationwide.
Ito’y makaraang paralisahin ng PISTON at ng iba pang grupong tutol sa transport modernization ang daloy ng trapiko bunsod ng isinagawa nilang transport caravan.
Gayunman, hindi muna idinetalye ni LTFRB Board Member at tagapagsalita nitong si Atty. Aileen Lizada kung anong kaso ang isasampa laban kay San Mateo at sa iba pang grupong lumahok sa nasabing protesta.
Una nang nagbanta si San Mateo sa mga sunud-sunod pang pagkilos protesta hangga’t hindi lubusang nauunawaan ng publiko ang epekto ng plano ng pamahalaan na gawing moderno ang sektor ng transportasyon sa bansa.
By Jaymark Dagala
Halos isa sa sampung mga sanggol ang hindi nakatatanggap ng bakuna kontra sa tatlong nakamamatay na sakit noong isang taon
Ito’y batay sa joint report ng UNICEF at ng World Health Organization kung saan, aabot sa 12.9 milyong sanggol ang walang natanggap na bakuna.
Lumabas din sa report na 6.6 milyong sanggol ang bagama’t nakatanggap ng unang bakuna ngunit hindi naman nakumpleto ang immunization course.
Mula taong 1980 hanggang 2010, bumaba ng halos 86 porsyento ng mga sanggol ang nakatanggap ng full course ng routine immunization para sa nasabing taon.
By Jaymark Dagala
